UPowula nabapostoli bamala
1Sengathi beninganginyamezelela ebudlhadlheni bami obuncanobu, iye, akhese ningibekezelele hle! 2Nginetjhisakalo ngani, iye, nginetjhisakalo kaZimu ngombana nganendisa endodeni eyodwa, enguKrestu ukuze nginethule kuye nilitlawu lakotlawu. 3Kodwana nginevalo ngani kobana njengombana u-Efa akhohliswa yinyoka enobuqili, imikhumbulo yenu nayo ingahle iyengwe ekuzinikeleni kwenu kuKrestu okuqotho nokumsulwa. 4Ngitjho ngombana nakufika umuntu afese atjhumayele omunye uJesu ohlukileko kilo esimtjhumayelako, namkha nanamukela omunye ummoya ohlukileko kilowo eniwamukeleko, namkha ivangeli elihlukileko kilelo esele nilamukele, niba msinyana ekuzinikeleni kokunjalo.
5Angikhumbuli nokho bona ngingonyazeka kunabo boke abapostoli abadumilekwabo. 6Mhlambe iye, ngilitjhapha ekukhulumeni, kodwana angisilo itjhapha elwazini; lokhu sakubonakalisa kini ngazo zoke iindlela, nakizo zoke izinto.
7Kghani ngonile ngokuzithoba kwami ukuze nina niphakanyiswe ngebanga lokobana ngatjhumayela ivangeli lakaZimu kini ngesihle na? 8Ngaphamba amanye amabandla ngokwamukela isekelo kiwo ukuze ngisize nina. 9Ngesikhathi ngisesenani begodu ngiswele, azange ngitlhagele namunye wenu ngombana iindingo zami bezithwelwe bangani bami beMasedoniya. Ngaleyondlela ngazibamba begodu ngizokuragela phambili nokuzibamba ekubeni mthwalo kini. 10Njengombana iqiniso lakaKrestu lingaphakathi kwami nje, ukuzikhakhazisa kwami angeze kwathuliswa eemfundeni ze-Arhaya. 11Kubayini na? Kghani kungombana nginganithandi na? Awa, uZimu uyazi bona nginithanda tle.
12Engikwenzako ngizokuraga ngikwenze ukuze ngingabaphi ithuba labo abalifunela ukuthathwa inga balingana nathi kilokho abazikhukhumeza ngakho. 13Abazikhukhumezakwabo babapostoli bamala, iinsebenzi ezinekohliso, bazenza inga babapostoli bakaKrestu! 14Akumangazi lokho! Ngitjho noSathana uyazitjhatjhanisa azenze ingilozi yokukhanya. 15Nje-ke akurari lokha iinceku zakhe nazo nazizitjhatjhanisako zizenze inga ziziinceku zokulunga. Isiphetho sazo sizakufanelana nezenzo zazo.
Ukutlhaga kwakaPowula ekubeni mpostoli
16Ngiyabuyelela ngithi akungabi noyedwa odlumbana bona ngisidlhayela. Kodwana nakube kunjalo, khona-ke ngamukelani njengesidlhayela ukuze nami ngikwazi ukuzikhakhakhakhazisa. 17Lokho engikutjhoko mayelana nesibindi sokuzikhakhazisesi, angikutjho ngegunya leKosi, kodwana ngikutjho njengesidlhayela. 18Njengombana abanengi bazikhukhumeza ngokwephaseli nje, nami-ke ngizozikhukhumeza 19ngombana ninyamezelela iindlhayela ngethabo, khisibe nina nihlakaniphile. 20Lokha umuntu nanenza amakhoboka, adla ngani, adlala ngani, adlhodlhomela ngani namkha aniwakala ebusweni, seniyambekezelela. 21Ngivuma ngeenhloni kobana saba buthakathaka khulu kilokho.
Kodwana nanyana yini umuntu angazikhukhumeza ngakho, ngikhuluma njengesidlhayela, nami ngizikhukhumeza ngakho lokho. 22BamaHebheru na? Nami nginguye. Bama-Israyeli na? Nami nginguye. Baziinzukulwana zaka-Abrahamu na? Nami ngingiso. 23Baziinceku zakaKrestu na? Ngikhuluma njengehlanya, ngiyinceku engcono kunabo. Ngisebenze ukudlula bona, ngabanjwa kanengi kunabo, ngabethwa kanenginengi begodu kube kanengi ngijika emlonyeni wokufa. 24Kwaba mahlandla amahlanu ngirithwa maJuda imivuvu ematjhumi amathathu nethoba. 25Ngadulwa bekwaba kathathu ngeentonga. Ngakghadlhwa ngamatje ihlandla elilodwa. Amahlandla amathathu ngaphahlazelwa umkhumbi, kwathi ubusuku nemini ngasunduzelwa ngelwandle.
26Ngibe sekukhambeni kanenginengi,
ngaba sengozini yemilambo.
Ngibe sengozini yabagongodi,
ngaba sengozini yabantu bekhethu.
Ngibe sengozini yabatjhili,
ngaba sengozini nangingedorobheni.
Ngibe sengozini nangiselwandle,
ngaba sengozini kubazalwana bamala.
27Ngisebenze nzima ngazikhandla, ngasikhathi ngingalali. Ngiphethwe yindlala nomrhawu, ngahlala nginganakudla. Ngiququdwe makhaza nginganazambatho. 28Ngaphandle kwakho koke lokhu, ngihlala ngiqalene nokukhathazeka kwami okukhulu ngamabandla woke. 29Ngubani obuthakathaka mina ngingabi buthakathaka na? Ngubani okhubekiswako mina ngingatjhi na?
30Nakube kufanele ngizikhakhazise, ngizozikhakhazisa ngezinto ezikhombisa ubuthakathaka bami. 31UZimu onguYise weKosi uJesu, ekumele adunyiswe isiphelani, uyazi bonyana angileyi amala. 32Ngemzini weDamaseku, umbusi ongaphasi kwekosi u-Areta wathumela abalindi bona balinde umuzi wamaDamaseku ukuze ngibotjhwe. 33Kodwana ngehliswa ngesiqwebu ngefesidere elisemthangaleni, kwaba kuphunyurha kwami njalo ezandleni zakhe.
