2 KWEBEKORINTE 4

₁Yeke, njengombana kungomusa kaZimu bona sibe nekonzo le, asililahli ithemba. ₂Kunalokho silahle iindlela zokufihla izinto eziphathisa iinhloni, salile ukwenza ubuqili namkha ukuphambanisa ilizwi lakaZimu, kodwana ngokubeka iqiniso epepeneneni, siyazibuka kunembeza womuntu woke phambi koZimu. ₃Ngitjho nanyana ivangeli lethu lifihlakele, lifihlakele kilabo ababhubhako. ₄Uzimu wesikhathesi ufiphaze imikhumbulo yabangakholwako ukuze bangaboni umkhanyo wevangeli lephazimulo kaKrestu omfuziselo kaZimu. ₅Asizitjhumayeli thina, kodwana sitjhumayela uJesu Krestu njengeKosi, thina sibe makhoboka wenu ngebanga lakhe. ₆Yeke uZimu owathi: “Umkhanyo awukhanye ebumnyameni,” nguye owakhanyisa eenhliziyweni zethu ukusinikela umkhanyo welwazi lephazimulo kaZimu ebusweni bakaJesu Krestu.

₇Kodwana sinamagugu la ngezitjeni zomdaka ukuze kutjengiswe bonyana amandla amakhulu la ngewakaZimu begodu akaveli kithi. ₈Siyahlunguphazwa ngeendlela zoke kodwana asitshidlhwa, siyakakamala kodwana asipheli amandla. ₉Siyazunywa kodwana asilahlwa, simadlhwa phasi kodwana asibhujiswa. ₁₀Sihlala sithwele emizimbeni yethu ukufa kwakaJesu ukuze kuthi ukuphila kwakhe nakho kwembulwe emizimbeni yethu. ₁₁Thina esiphilako sihlala sinikelwa ekufeni ngebanga lakaJesu ukuze ukuphila kwakhe kwembulwe emizimbeni yethu efako. ₁₂Ngaleyondlela, kithi kusebenza ukufa kodwana kini kusebenza ukuphila.

₁₃Kutloliwe kwathiwa: “Ngakholwa, ngalokho ngakhuluma.” Nathi sakholwa, yeke sakhuluma ₁₄ngombana siyazi bona loyo owavusa iKosi uJesu nathi uzosivusa kanye noJesu begodu uzosiletha sikanye nani ebukhoneni bakhe. ₁₅Iye, koke kungebanga lenu ukuze kuthi umusa wandise ukuthokoza, kilo idumo lakaZimu, njengombana ufikelela abantu ngobunengi.

₁₆Ngalokho asipheli amandla. Nanyana umzimba wethu ngaphandle uluphala, ingaphakathi lethu livuselelwa imihla ngemihla. ₁₇Iinhlupheko zethu ezilula nezesikhatjhana zisilungiselela isilinganiso esikhulu sephazimulo engaphezu kokulinganiswa ₁₈ngombana asiqali lokho okubonwako kodwana siqale okungabonwako. Okubonwako kungekwesikhatjhana kodwana okungabonwako kungekwanini nanini.