U-Amatsiya ubusa kwaJuda
1Ngomnyaka wesibili kaJehowatjhi umsa kaJehowarhazi ikosi yakwa-Israyeli, u-Amatsiya umsa kaJowatjhi ikosi yakwaJuda wathoma ukubusa. 2Gade anamatjhumi amabili nahlanu weminyaka lokha nakathoma ukubusa. Wabusa eJerusalema iminyaka ematjhumi amabili nethoba. Ibizo lakanina bekunguJehowadini, weJerusalema.
3U-Amatsiya wenza okulungileko phambi kwakaSomnini, kodwana ingasi njengombana uyisemkhulu uDavida enza. Kikho koke wakhamba emtlhaleni kayise uJowatjhi. 4Nokho iindunduma akhange zisuswe; abantu baragela phambili ngokwenza imihlabelo nokutjhisa itjhwalo lapho.
5Kuthe masinyana ngemva kokobana umbuso unzinze esandleni sakhe, wabulala iinkhulu ezabulala uyise ikosi. 6Nokho akhange athande ukubulala abantwana bababulali. Wenza njengombana kutlolwe encwadini yomthetho kaMosi, lapha uSomnini ayala khona wathi: “Aboyise abazukubulawa ngenca yabantwana namkha abantwana babulawe ngenca yaboyise; ngiloyo naloyo uzakufa ngenca yesono sakhe.”
7Ngu-Amatsiya owabulala ama-Edomu alitjhumi leenkulungwana emrhobeni wetswayi bewathumba neSela ngepi. Wayithiya bona yiJokithiyeli, ekulibizo layo bekube kunamhlanje.
8Yeke u-Amatsiya wathumela iinthunywa kuJehowatjhi umsa kaJehowarhazi omsa kaJehu ikosi yakwa-Israyeli, wamtjhijila wathi: “Yewize, sizokuzwana amandla.”
9Kodwana uJehowatjhi ikosi yakwa-Israyeli waphendula u-Amatsiya ikosi yakwaJuda wathi: “Umtjhatjhana ogade useLibhanoni wathumela umlayezo emthini womsedari eLibhanoni wathi, ‘Yendisela umntazana wakwakho esokaneni lakwami.’ Nje-ke isibandana sommango eLibhanoni seza safihliza umtjhatjhana lowo ngeenyawo zaso. 10Iye, nawe uwamadlhile ama-Edomu, ngikho nje sewuzikhakhazisa kangaka. Zikhakhazise ekuhluleni kwakho kodwana uhlale kwakho! Uzibizelelani umutja bona uzikhube wena kanye nabantu bakwaJuda na?”
11U-Amatsiya wathwala umsila, yeke uJehowatjhi ikosi yakwa-Israyeli wamsahlela. Yena no-Amatsiya ikosi yakwaJuda baqalana eBhethe-Tjhemetjhi kwaJuda. 12UJuda wamadlhwa ngu-Israyeli, kwaba ngileyo naleyo ndoda yabalekela kwayo.
13UJehowatjhi ikosi yakwa-Israyeli wathumba u-Amatsiya ikosi yakwaJuda, umsa kaJowatjhi omsa ka-Arhaziya. Wamthumba eBhethe-Tjhemetjhi. Nje-ke, uJehowatjhi waya eJerusalema wafese wabhuruza umthangala ingcenye engaba magadango amamitha amakhulu amabili, kusukela esangweni i-Efrayimu ukuya esangweni okuthiwa siKghudlhu. 14Wathatha loke igolide, isiliva kanye nazo zoke izinto ebezisethempelini lakaSomnini nebegade zisendlini yamagugu wesigodlo. Waraga nabathunjwa wabuyela eSamariya.
Ukuhlongakala kwakaJehowatjhi
15Ezinye izehlakalo zokubusa kwakaJehowatjhi, koke akwenzileko nokuhlula kwakhe, ngitjho nokulwa kwakhe no-Amatsiya ikosi yakwaJuda, kutlolwe encwadini yemilando yamakhosi wakwa-Israyeli. 16UJehowatjhi wahlongakala wabulungwa eSamariya namakhosi wakwa-Israyeli. UJerobhowamu indodanakhe waba yikosi esikhundleni sakhe.
Ukuhlongakala kwaka-Amatsiya
17U-Amatsiya umsa kaJowatjhi ikosi yakwaJuda waphila iminyaka elitjhumi nahlanu emva kokuhlongakala kwakaJehowatjhi umsa kaJehowarhazi ikosi yakwa-Israyeli. 18Ezinye izehlakalo zokubusa kwaka-Amatsiya zitlolwe encwadini yemilando yamakhosi wakwaJuda.
19Abantu bamakhela ubukhwebetjhana eJerusalema, yena wabalekela eLakitjhi, kodwana bathumela abantu emuva kwakhe eLakitjhi, bambulalela khonapho. 20Wabuyiswa sekathwelwe ngeenjomani, wabekwa eJerusalema kiboyisemkhulu eMzini kaDavida.
U-Azariya ubekwa bonyana abe yikosi kwaJuda
21Nje-ke isizwe sakwaJuda sathatha u-Azariya ogade aneminyaka elitjhumi nathandathu, sambeka bona abe yikosi esikhundleni sakayise u-Amatsiya. 22Nguye owavuselela i-Elathi wayibuyisela kwaJuda emva kokukhothama kwakayise.
UJerobhowamu umsa kaJehowatjhi ubusa kwa-Israyeli
23Kwathi ngomnyaka wetjhumi nahlanu wekosi u-Amatsiya umsa kaJowatjhi ikosi yakwaJuda, uJerobhowamu umsa kaJehowatjhi ikosi yakwa-Israyeli waba yikosi eSamariya. Wabusa iminyaka ematjhumi amane nanye. 24Wenza ubumbi phambi kwakaSomnini, akhange aphambuke ezonweni zakaJerobhowamu umsa kaNebathi, abangela ngazo bonyana u-Israyeli one.
25Nguye owabuyisela imikhawulo kwa-Israyeli ukusukela eLebo-Rhamathi etlhagwini ukuya elwandle eliFileko ngesewula, ngokuya ngelizwi lakaSomnini uZimu wakwa-Israyeli alikhulumako ngencekwakhe umphorofidi uJona umsa ka-Amitayi, weGathi-Rheferi. 26Lokhu kwenzeka ngombana uSomnini wabona isihlungu u-Israyeli agade agandelelwe ngaso; bekunganamenyeli namunye kwa-Israyeli. 27Njengombana uSomnini bekangakatjho nje bona uzakuphelisa ibizo laka-Israyeli ngaphasi komthunzi welanga, wabasindisa ngesandla sakaJerobhowamu umsa kaJowatjhi.
28Ezinye izehlakalo zokubusa kwakaJerobhowamu, koke akwenzileko, ukuhlula kwakhe ezipini, ngitjho nokubuyisela kwakhe kwa-Israyeli iDamaseku neRhamathi ebekungeyeYawudi, kutlolwe encwadini yemilando yamakhosi wakwa-Israyeli. 29UJerobhowamu wahlongakala wabulungwa namakhosi wakwa-Israyeli. UZakariya indodanakhe waba yikosi esikhundleni sakhe.
