UManase ubusa kwaJuda
1UManase gade aneminyaka elitjhumi nambili lokha nakabekwa bona abe yikosi. Wabusa eJerusalema iminyaka ematjhumi amahlanu nahlanu. Ibizo lakanina bekunguRhefitsiba. 2Wenza ubumbi phambi kwakaSomnini njengeenkghabhudlho ezenziwa zizizwe uSomnini aziqotjha phambi kwama-Israyeli. 3Wabuye wakha iindunduma uyise uHezekhiya agade azibhuruzile; wakhela uBhali ama-aldari, wenza nomfanekiso waka-Atjhera njengombana u-Arhabi ikosi yakwa-Israyeli gade enzile. Wakhothamela zoke iinkwekwezi zomkayi, wazilotjha.
4Wakha ama-aldari ethempelini lakaSomnini, lapha uSomnini gade athe khona: “Ibizo lami ngizalibeka eJerusalema.” 5Iye, wakha ama-aldari wokulotjha iinkwekwezi zomkayi eenrhodlweni zombili zethempeli lakaSomnini. 6Wanikela indodanakhe bona ibe mhlabelo. Waba ngophengulako nofuniselako, wabeka izangoma neenyanga. Wenza ubumbi obunengi phambi kwakaSomnini, wamthukuthelisa. 7Wathatha umfanekiso waka-Atjhera agade awenzile wawubeka ngethempelini uSomnini akhuluma ngalo kuDavida nakuSolomoni indodanakhe wathi: “Kilelithempeli neJerusalema engilikhethileko kizo zoke iinkoro zakwa-Israyeli, ibizo lami ngizalibeka khona isiphelani. 8Angisoze ngenze bona iinyawo zabakwa-Israyeli zizule enarheni engayinikela aboyisemkhulu, nakube kwaphela bazakutjhejisisa benze koke engabayala ngakho, nokobana bazakugcina woke umthetho incekwami uMosi eyabayala ngawo.”
9Kodwana abantu akhange balalele: UManase naye wabaphambukisa, baze benza okumbi ukudlula izizwe uSomnini azibhubhisa phambi kwama-Israyeli.
10USomnini bekakhulumile ngeenceku zakhe abaphorofidi. Abaphorofidaba bathi: 11“Ngombana uManase ikosi yakwaJuda enze iinkghabhudlhwezi, iye, wenze okumbi khulu ukudlula ama-Amori agade akhona ngaphambi kwakhe begodu uwisele noJuda ezonweni ngamanyala wabosingazimu bakhe, 12yeke nakhu okwatjhiwo nguSomnini uZimu wakwa-Israyeli, ‘Yelelani, ngizokwehlisela ihlekelele phezu kweJerusalema noJuda kangangobana kuzakuthi lokha abantu nabezwa ngayo bahlahlathelwe mzimba. 13Ngilinganisile iJerusalema ngalihlola. Yeke isibetho salo sizakuba njengeSamariya nanjengesibetho engabetha ngaso indlu ka-Arhabi. Isitja esisilapheleko siyasulwa sigutjuzwe. Ngizokwenza okufanako ngeJerusalema: Ngizoyithanyela ngiyiphendukezele! 14Abaseleko abalilifa lami ngizobafulathela bengibanikele ezandleni zezitha zabo. Bazokuthunjwa bebaphangwe zizitha zabo 15ngombana benze okumbi khulu emehlwenami begodu bangithukuthelisile kusukela mhlana aboyisemkhulu baphuma eGibhide bekube namhlanje.’ ”
16Ngaphezu kwalokho, uManase wathulula iingazi ezinengi khulu zabantu abanganamlandu. Wagcwalisa yoke iJerusalema ngeengazi. Lokhu bekungaphandle kwezono zakhe abangela ngazo bonyana uJuda one. Nguye owabangela uJuda enze ubumbi phambi kwakaSomnini.
17Zoke izehlakalo zokubusa kwakaManase, koke akwenzileko ngitjho nezono azenzako, kutlolwe encwadini yemilando yamakhosi wakwaJuda. 18UManase wahlongakala wabekwa esivandeni sesigodlo sakhe, isivande saka-Uza. U-Amoni indodanakhe waba yikosi esikhundleni sakhe.
U-Amoni ubusa kwaJuda
19U-Amoni gade aneminyaka ematjhumi amabili nambili lokha nakathoma ukubusa. Wabusa eJerusalema iminyaka emibili. Ibizo lakanina bekunguMetjhulemethi indodakazi kaRharutsi weJothiba. 20Wenza ubumbi phambi kwakaSomnini njengoManase uyise. 21Wakhamba kizo zoke iindlela ezakhanjwa nguyise: Walotjha bewakhothamela amanyala wabosingazimu uyise agade awalotjha. 22Wahlubuka uSomnini uZimu waboyisemkhulu, akhange akhambe eendleleni zakaSomnini.
23Iinduna zaka-Amoni zamakhela ubukhwebetjhana zambulalela esigodlweni sakhe. 24Kodwana abantu bendawo babulala boke abagade benze ubukhwebetjhana ngekosi u-Amoni. Babeka uJosiya indodanakhe bona abe yikosi esikhundleni sakhe.
25Zoke izehlakalo zokubusa kwaka-Amoni nakho koke akwenzileko kutlolwe encwadini yemilando yamakhosi wakwaJuda. 26Wabekwa ethuneni lakhe esivandeni saka-Uza. UJosiya indodanakhe waba yikosi esikhundleni sakhe.
