2 USAMYELA 22

USomnini ulidwala lami, isiphephelo sami nomsindisami.

₃UZimami ulirholo lami engiphephela kilo;

usihlangu sami namandla wesindiswami;

uyisikami, isiviko sami nomenyelami.

Nakibondwendweni uyangisindisa.

₄USomnini ufanele ukudunyiswa:

Nangilila kuye ungisindisa ezitheni zami.

₅Ngenganyelwa magagasi wokufa,

iinrhurhula ezibhubhisako zafuna ukungigubuzesa.

₆Iinkawule zezindla bezingirarele;

ngabandamelwa zizifu zokufa.

₇Ematlhuwenami ngalilela uSomnini,

ngarhuwelela uZimami.

Wezwa ilizwi lami asethempelini lakhe,

isililo sami safika eendlebeni zakhe.

₈Iphasi ladengezela begodu lahlengezela,

iinsekelo zamazulu zasikinyeka,

zathuthumela ngombana gade asilingekile.

₉USomnini nasilingekileko

ufana nentabamlilo ethunya intuthu

nekhafula amalangabi nekehla.

₁₀Wavula amazulu wehlela phasi;

ngaphasi kweenyawo zakhe

kuthe kupe amafu anzima tshu.

₁₁Kwaba ngathi uphapha ngekerubhi emafini,

isiwuruwuru saba ngasuthi maphiko aphapha ngawo.

₁₂Wagubuzeswa lilifu elinzima njengesisitho,

namafu wezulu amnyama wemkayini.

₁₃Ebuphaziphazini bobukhona bakhe

kwamekeza, kwaphambana imibani.

₁₄USomnini waduma asemafini,

kwezwakala ilizwi longoPhezulu.

₁₅Wadubula imisubi kwaphadlhalala izitha zami,

zadiyazeliswa kumekezela kobuphaziphazi bombani.

₁₆Lokha uSomnini navuthela ummoya ngeempumulo,

akhalima,

ukuzika kwelwandle kwambuleka,

iinsekelo zephasi zanekeka ebaleni.

₁₇Welula isandla sakhe aphezulu wangidzwebula;

wangenyula emanzini azikileko.

₁₈Wangisindisa esitheni sami esinamandla

nebajamelanini bami egade banamandla kunami.

₁₉Bangithelekela ngelanga lehlekelele,

kodwana uSomnini waba msizami.

₂₀Wangikhupha emkghothweni

wangibeka etjhatjhalazini,

wangisindisa ngombana angithanda.

₂₁USomnini wangivuza ngombana nginganamlandu;

wangisiza ngombana ngimsulwa.

₂₂Iye ngilondile iindlela zakaSomnini;

azange ngenze okumbi ngokuhlanuka uZimu.

₂₃Ngihlala ngilonda imithethwakhe;

azange ngiphambuke emiyalwenakhe.

₂₄Bengisolo ngiphetha ilizwi lakhe,

ngizilondile ngaba kude necala.

₂₅USomnini wangivuza ngombana nginganamlandu,

ngimsulwa phambi kwakhe.

₂₆Somnini, uziveza uthembekile kabathembekileko,

uziveza umsulwa kabamsulwa,

₂₇nakohlanzekileko uziveza uhlanzekile,

kodwana oneengwegwe akaphunyurhi kuwe.

₂₈Usindisa abazithobileko,

uqaphela abazigqajako ubehlise.

₂₉Ukukhanya kwami wena Somninami,

utjhugulula ubumnyama engikibo ubenze ukukhanya.

₃₀Ngesizo lakho angeze ngakhisimela;

ngoZimami ngingagiriza umthangala wedorobho.

₃₁UZimu akaphosisi,

ilizwi lakaSomnini alisoleki.

USomnini usiphephelo sabo boke ababalekela kuye.

₃₂Ngubani uZimu ngaphandle kwakaSomnini?

Ngubani idwala ngaphandle kwakaZimu?

₃₃NguZimu ongihlomisa ngamandla nowenza indlelami ilunge.

₃₄Ungenza ngiqhanase njengehlangu,

angivumele ngijame eenqongolweni.

₃₅Ubandulela izandla zami ukulwa,

imikhonwami ikghona ukucupha umsebe wekoporo.

₃₆Ukungivikela kwakho kungenza ngihlule;

nawuphendula imithandazwami ngiqina idolo.

₃₇Ugangadela indlelami,

bonyana ngingatshinyeki iingogoriyana.

₃₈Ngagijimisa izitha zami ngazifihliza;

azange ngijike zingakafi zoke nya.

₃₉Ngaziqoba nya,

zaparalala zangasavuka;

zarabhalala ngaphasi kweenyawo zami.

₄₀Wangihlomisa ngamandla wokulwa,

wathobisa izitha zami phambi kwami.

₄₁Wenza izitha zami bona zifulathele ipi,

ngarhayila amanabami.

₄₂Zarhuwelela zifuna isizo,

kodwana azange kube khona ongazisindisa;

zalilela uSomnini,

kodwana azange aziphendule.

₄₃Ngazitshidlha zasileka kwanga lithuli lehlabathi;

ngazigadanga njengeensila zeendledlana.

₄₄Somnini, ungisindisile nangisahlelwa sisizwe sekhethu,

wangenza ngaba yihloko yezizwe ezitjhili.

Abantu bakosobantu bayangikhothamela,

₄₅nemiqhamuka iyathuthumela phambi kwami,

yenze engikutjhoko.

₄₆Imiqhamuka iyangesaba,

iza itatazela kusukela esiphephelweni sayo.

₄₇USomnini uyaphila!

Alidunyiswe idwala lami!

Akaphakanyiswe uZimu,

olidwala nomsindisami!

₄₈UnguZimu ongibuyiselelako,

obeka izizwe ngaphasi kwami,

₄₉ongithukulula ezitheni zami.

Ungiphakamisela ngaphezu kwezitha zami,

angisindise kibondwendweni.

₅₀Nje-ke ngizakudumisa, Somninami,

hlangana nezizwe;

ngibhine iingoma zokudumisa ebizweni lakho.

₅₁Unikela ikosi ayibekileko ukuhlula okukhulu;

akhombise umusa ongapheliko kabazesiweko bakhe,

kuDavida neenzukulwana zakhe isiphelani.