UDavida uba yikosi yakwa-Israyeli
1Zoke iinkoro zakwa-Israyeli zeza kuDavida eRhebroni zathi: “Siziingazi zakho. 2Eenkhathini ezidlulileko, uSawula asese yikosi phezu kwethu, nguwe ogade udosa u-Israyeli ukuya epini. USomnini wathi kuwe, ‘Nguwe ozakwelusa abantu bami u-Israyeli begodu nguwe ozakubusa u-Israyeli.’ ” 3Ngaleyondlela boke abaphathi bakwa-Israyeli beza ekosini uDavida eRhebroni. UDavida wenza nabo isivumelwano eRhebroni phambi kwakaSomnini; base bayamzesa waba yikosi phezu kwaka-Israyeli.
4UDavida gade anamatjhumi amathathu weminyaka lokha naba yikosi, wabusa amatjhumi amane weminyaka. 5ERhebroni wabusa uJuda iminyaka elikhomba neenyanga ezithandathu, kwathi eJerusalema wabusa phezu kwaka-Israyeli woke noJuda iminyaka ematjhumi amathathu nantathu.
UDavida uthumba iJerusalema
6Ikosi uDavida nabantu bakhe baya eJerusalema bona basahlele amaJebusi ahlala lapho. AmaJebusi arhuwelela uDavida athi: “Awuzukungena la; ngitjho iimphofu neenrhole zizokukhandela lula.” Ngalokho bebazitjela bonyana uDavida angeze angena lapho. 7Khonapho, uDavida wathumba ubuphephelo beZiyoni, okwathi ngemva kwesikhathi baba muMuzi kaDavida. 8Mhlokho, uDavida wathi: “Woke ofuna ukuhlula amaJebusi, kuzakufanela bona asebenzise umsele wamanzi.”
UDavida wayihloya ikulumo ethi: “Iinrhole neemphofu zizokukhandela lula.” Ngikho-nje kuthiwa: “Iimphofu neenrhole azizukungena ethempelini.”
9UDavida wathuthela ebuphephelweni, wabubiza bona muMuzi kaDavida. Wakha izindlu ukusukela endundumeni ezombeleze ubuphephelo ukuya emthangaleni wedorobho. 10Waragela phambili wakhula ngamandla ngombana uSomnini uMninimandlawoke gade anaye.
11URhiramu ikosi yeTirosi wathumela iinthunywa kuDavida kanye neengodo zomsedari nababazi, nabakhi ngelitje; bakhela uDavida isigodlo. 12UDavida walemuka bona uSomnini umjamise waba yikosi phezu kwaka-Israyeli, nokobana uphakamise umbuswakhe ngebanga labantu bakwa-Israyeli.
13Emva kokobana uDavida asuke eRhebroni, wathatha imingena eminye nabafazi eJerusalema, wabelethelwa amadodana namadodakazi amanye. 14Lawa mabizo wabantwana abelethelwa bona lapho: UTjhamuwa, uTjhobabi, uNathani, uSolomoni, 15uYibhurhari, u-Elitjhuwa, uNefegi, uJafiya, 16u-Elitjhama, u-Eliyada no-Elifelethi.
UDavida uhlula amaFilista
17Kwathi lokha amaFilista nezwa bona uDavida uzeswe bonyana abe yikosi yakwa-Israyeli, aphuma woke ayomzuma. Kodwana uDavida wezwa ngalokho waya ebuphephelweni. 18Lokha amaFilista nasabalala emRhobeni waBezimu, 19uDavida wabuza uSomnini wathi: “Ngingawasahlela amaFilista na? Uzawanikela ezandleni zami?” USomnini wamphendula wathi: “Iye khamba, ukuwanikela ngizawanikela amaFilista ezandleni zakho.” 20Yeke uDavida waya eBhali-Peratsimu, wawahlula lapho amaFilista, bewathi: “USomnini urhurhule izitha zami njengamanzi agobhoza arhurhule koke.” Ngebangelo, indawo leyo yabizwa bona yiBhali-Peratsimu. 21AmaFilista atjhiya abosingazimu bawo lapho, uDavida nabantu bakhe babadobha.
22Godu amaFilista akhuphuka asabalala ngemRhobeni waBezimu. 23UDavida wabuza uSomnini, yena wamphendula wathi: “Unganqophi kibo, kodwana bazombe ngemuva bese ubasahlela ngaphambi kwemithi yebhalisamu. 24Masinyana-nje nawizwa itjhada lamagadango ngaphezu kwemithi yebhalisamu, rhaba ngombana uSomnini uzabe akhamba phambi kwenu ukumadlha ipi yamaFilista.” 25UDavida wenza njengombana uSomnini amyalile, wamadlha amaFilista indlela yoke kusukela eGeba ukuya eGezeri.
