2 UTHIMOTHI 1

₃Ngiyamthokoza uZimu engimlotjha ngesazelo esimsulwa njengombana abokhokho bami gade basenza. Ngikukhumbula njalo emithandazwenami emini nebusuku. ₄Ngokukhumbula iinyembezi zakho, ngilangazelela ukukubona khona ihliziywami izakuzala ithabo. ₅Godu ngikhunjuzwa ukukholwa kwakho kweqiniso, iye, ukukholwa okwathoma kwaba kugogwakho uLowisi nonyoko uYunike, engineqiniso bona kuhlezi kuwe. ₆Ngalokho ngiyakukhumbuza bona uvuselele isiphiwo sakaZimu esikuwe ngokubekwa izandla zami ₇ngombana uZimu akhange asiphe ummoya wobutjhatjha, kodwana wamandla, wethando nowokuzikhalima.

₈Nje-ke ungabi neenhloni ngokufakaza ngeKosi nangami mina sibotjhwa sayo, kodwana hlanganyela nami ebuhlungwini ngebanga levangeli, uzeyame ngamandla kaZimu, ₉owasisindisa bewasibiza ngebizo elicwengileko, kungasi ngemisebenzi yethu kodwana ukuya ngokwehloso nomusa wakhe. Umusa lo sanikelwa wona ngoKrestu zingakabi ukuba khona iinkhathi, ₁₀kodwana kwanjesi sewambulelwe ngokufika koMsindisi wethu uKrestu Jesu, owaqeda ukufa waletha ukuphila nokungabhubhi ekukhanyeni ngevangeli.

₁₁Ngebanga levangeli ngakhethwa bona ngibe mtjhumayeli, mpostoli nomfundisi; ₁₂kungalokho ngisebunzimeni obungaka. Nokho-ke anginanhloni ngombana ngiyamazi loyo engikholwa kuye, begodu ngiyethemba bona unamandla wokulonda lokho okubekwe kimi bekube mhlokho. ₁₃Bambelela esifundweni esiphilileko owasizwa kimi ngokukholwa nangethando elikuKrestu Jesu. ₁₄Okuhle okubekwe kuwe, kulonde ngoMoya oCwengileko ohlala kithi.

₁₅Uyazi bona boke abase-Asiya sebangihlanukele, ngitjho aboFigelo no-Erimogenesi. ₁₆Kwanga iKosi ingaba nomusa endlini ka-Onesiforu ngombana bephele angivusela begodu angananhloni ngami njengombana bengibotjhiwe. ₁₇Iye, lokha nakaseRoma wangibhudula bewangifunyana. ₁₈Kwanga iKosi ingenza kobana azuze umusa weKosi mhlokho! Begodu nawe wazi kuhle bona kungangani alotjha ngakho e-Efesu.