IZENZO ZABAPOSTOLI 18

₁Ngemva kwalokho uPowula wasuka e-Athene waya eKorinte. ₂Lapho wafunyana umJuda ekuthiwa ngu-Akhwila obelethwa ePontusi, ogade aqeda ukubuya eTariyana nomkakhe uPrisila ngombana umbusi uKlawudiyusi bekayale woke amaJuda bona asuke eRoma. UPowula waya kibo. ₃Ngebanga lomsebenzakhe ofana nowabo, wahlala wasebenza nabo ngombana gade basenza ukuthunga amatende. ₄Njalo ngeSabatha bekaphikisana namaJuda namaGirigi ngesinagogini, alinga ukuwazuza.

₅Kuthe bona kufike uSilasi noThimothi bavela eMasedoniya, uPowula wazinikela ngokupheleleko ekutjhumayeleni, afakaza emaJudeni bona uJesu unguKrestu. ₆Kuthe lokha nabamphikisako bakhuluma kumbi ngaye, wazibilayeza ngokuthintitha ithuli ezambathweni zakhe, wathi kibo: “Iingazi zenu azibe phezu kweenhloko zenu! Mina anginamlandu. Kusukela kwanjesi, ngizakuya kabatjhili.” ₇Yeke watjhiya isinagogi waya endlini yomuntu okuthiwa nguTitiyusi Justusi, obekesaba uZimu, indlwakhe ihlanu kwesinagogi.

₈UKrisposi umphathi wesinagogi, wakholwa eKosini yena nawo woke umndenakhe; nabanengi ebezwa uPowula eKorinte, bakholwa babhajadiswa.

₉Ngobusuku obunye iKosi yakhuluma noPowula ngombono yathi kuye: “Ungesabi, kodwana raga ukhulume, ungathuli ₁₀ngombana nginawe. Akakho noyedwa ozakukubeka isandla akulimaze ngombana banengi ngedorobheni le okubabantu bami.” ₁₁Yeke uPowula wahlala lapho umnyaka nesiquntu, afundisa ilizwi lakaZimu phakathi kwabo.

₁₂Kuthe bona uGaliyo abe mbusi we-Arhaya, amaJuda ahlangana asahlela uPowula amdosela phambi kwekundla, ₁₃athi: “Indoda le idosa abantu bona besabe uZimu, ngendlela ephambene nomthetho!”

₁₄Kwathi uPowula asathi uyakhuluma, uGaliyo wathi emaJudeni: “Nangabe lokho bekulicala namkha ubukhohlakali obukhulu, bengizakwamukela ukusola kwenu maJuda. ₁₅Kodwana njengombana kukuphikisana ngamezwi namabizo nangomthetho wenu, kulungiseni ngokwenu lokho. Angithandi ukuba mgwebi weendabezi!”

₁₆Nje-ke wabaqotjha ekundleni. ₁₇Boke babhudungela uSosithenesi umphathi wesinagogi, bambetha phambi kwekundla. Kodwana uGaliyo akhange akunake lokho.

₁₈UPowula sele ahlezi isikhatjhana lapho, walayelisa abazalwana wathayela eSiriya aphekelelwa nguPrisila no-Akhwila. EKhengirheriya waguda ihlokwakhe ngombana gade angaphasi kwesifungo. ₁₉Kwathi nabafika e-Efesu wabatjhiya khona, kodwana yena waya ngesinagogini wakhulumisana namaJuda. ₂₀Kuthe lokha nabambawa bona ahlale nabo isikhatjhana, wala. ₂₁Kodwana ekubalayeliseni wathi: “UZimu navumako, ngizakubuya godu.” Yeke wathaya wasuka e-Efesu.

₂₂Kuthe bona afike eKhesariya, wakhuphuka wayokubingelela ibandla, emva kwalokho wehlela e-Anthiyorhiya. ₂₃Kwathi bona ahlale isikhatjhana lapho, wasuka, wakhamba wadabula esifundeni seGalatiya neseFrigiya aqinisa boke abafundi.

₂₄UmJuda othileko, okuthiwa ngu-Apolo, obelethwa e-Alekzandriya, weza e-Efesu. Gade asikhulumi esikwaziko ukukhuluma nesinelwazi ngemitlolo. ₂₅Yena-ke bekafundiswe ngendlela kaSomnini, ngokuzimisela okukhulu wakhuluma bewafundisa kuhle ngeendaba ezimayelana noJesu, nanyana bekasazi umbhabhadiso kaJwanisi kwaphela. ₂₆Nje-ke wathoma ukukhuluma ngesibindi ngesinagogini. Kodwana kuthe bona uPrisila no-Akhwila bamuzwe, bamthatha baya naye ekhaya bamhlathululela kuhle indlela kaZimu. ₂₇U-Apolo asafisa bona ayamele ngaphetjheya e-Arhaya, abazalwana bamkhuthaza babe batlolela abafundi kobana bamamukele. Ekufikeni kwakhe waba lisizo elikhulu kilabo abathe ngomusa kaZimu baba makholwa ₂₈ngombana ngamandla amakhulu waphikisa amaJuda epepeneneni, atjengisa ngokwemitlolo bona uJesu unguKrestu.