U-AMOSI 9

“Betha iinqongolo zeensika

ukuze kusikinyeke imibunjwana yomnyango.

Arhirize ukuze awele phezu kweenhloko

zabo boke abantu –

abaseleko ngizababulalela epini ngesabula.

Akakho namunye ozakubaleka,

akakho ozakuphunyurha.

₂Nanyana bangemba batjhinge phasi

ekuzikeni kwethuna,

isandla sami sizabadzwebula khonapho.

Nanyana banganyukela phezulu emazulwini,

ngizabathatha khonapho ngibehlisele phasi.

₃Nanyana bangabhaca esiqongolweni

sentaba iKarameli,

ngizabazuma khonapho ngibabambe.

Nanyana bangabhaca ekuzikeni kwelwandle,

nalapho ngizabanikelela ngenyoka bona ibalume.

₄Nanyana izitha zabo zingabakghurumejela

ekuthunjweni,

ngizakulayela bona babulawe ngesabula khonapho.

Ngizabaphosa ilihlo,

ngibaqale kumbi ngingabaqali kuhle.”

₅USomninni uSomandla uMninimandlawoke,

othi nathinta iphasi lincibilike,

kuthi boke abahlala kilo batlhuwe;

inarha yoke iphuphume njengeNayili,

ibohle njengomlambo weGibhide;

₆nguye owakha isigodlo sakhe

esiphakamileko emazulwini

bewahloma isisekelo sakhona ephasini,

wabiza amanzi welwandle,

wawarhatjha ebusweni benarha,

ibizo lakhe nguSomnini.

“Nina ma-Israyeli,

kimapha anifani namaKutjhe na?

Azange ngikhuphe u-Israyeli eGibhide,

namaFilista eKafitori,

nama-Arami eKiri?

₈Ngambala, amehlo kaSomnini uSomandla

aphezu kombuso okhohlakeleko.

Yeke ngizawubhubhisa nya

ebusweni bephasi.

Kodwana ikumba kaJakopo

nokho angeze ngayibhubhisa.”

Kutjho uSomnini.

₉“Ngizakukhupha umyalo,

ngihlunge ikumba ka-Israyeli

hlangana nezizwe zoke,

njengamabele nahlungwa esefeni;

kodwana akunathorwana nayinye ezakuwela phasi.

₁₀Zoke izoni ezihlangana nabantu bami

zizakubulawa ngesabula,

boke labo abathi,

‘Abekunahlekelele ezasehlela

nanyana itjhidele kithi.’ ”

₁₁“Mhlokho ngizakuvuselela

itende lakaDavida eliwileko.

Ngilungise iindawo zalo ezonakeleko,

ngibuyisele isithunzi salo,

ngilakhe libe njengombana gade linjalo phambilini;

₁₂ukuze likwazi ukwamukela imisalela

yakwa-Edomu

nezizwe zoke ezibizwa ngebizo lami.”

Kutjho uSomnini ozakwenza koke akutjhwileko.

“Isikhathi siyeza,

lapha ovunako azakubhedlhwa khona ngolimako

notjalako abhedlhwe ngotlhodlha amadiribe.

Iwayini elitjha lizakuthonta

livela eentabeni,

ligeleze kiyo yoke imibundu.

₁₄Ngizakutjhugulula ubujamo babantu bami u-Israyeli:

Bazakuvuselela amadorobho agiriziweko,

bahlale kiwo.

Bazakutjala amadiribe

bebasele newayini lakhona;

balima iimvande,

bagome iinthelo zakhona.

₁₅U-Israyeli ngizamtjala endawenakhe,

ngingabe ngisamtsomula godu

endaweni engimnikele yona.”

Kutjho uSomnini uZimakho.