Umbono kaDanyela weqama nepongo
1Ngomnyaka wesithathu wokubusa kwekosi uBhelitjhatsari, mina Danyela ngabona umbono emva kwalowo ebengiwubone ekuthomeni. 2Embonweni lowo ngazibona ngiseTjhutjhani, ihlokodorobho esesifundeni se-Elamu. Nje-ke embonwenapho bengizibona ngiseqadi komsele i-Ulayi. 3Ngaphakamisa amehlo, qala nanto iqama lijame magegana nomsele. Belineempondo ezimbili ebeziphakamile kodwana elinye lilide kunelinye. Elide lelo bekungilo elimile muva. 4Ngabona iqama lelo lijokolela ngetjingalanga, ngetlhagwini nangesewula. Bekunganasibandana ebesingajama phambi kwalo begodu kungekho ekugade kungasinda emandlenalo. Belizenzela umathanda begodu linamandla.
5Kuthe ngisacabanga njalo, qala kwavela ipongo ngetjingalanga ivundla iphasi loke, ngaphandle kokuthinta phasi. Beyinephondo eliveleleko hlangana namehlwayo. 6Yona yeza eqameni ebelineempondo ezimbili engalibona lijame magegana nomsele, yalithelekela ngokubila kweengazi. 7Ngayibona ukuza kwayo eqamenelo kobana ifutheke khulu, yaliqhula beyephula iimpondo ezimbilezo. Iqamelo belinganamandla wokujama phambi kwayo. Yeke ipongo leyo yalithela phasi yaligadanga. Gade angekho ongasindisa iqamelo emandleni wepongo leyo. 8Nje-ke ipongo leyo yaba namandla khulu. Kuthe lokha nayizizwa amandla, iphondo layo elikhulwelo lephuka. Esikhundleni salo kwamila iimpondo ezine eziveleleko ziqale emimoyeni emine yezulwini.
9Eempondweni ezinezo kwamila iphonjwana elincani, lona-ke lakhula khulu latomulukela nca yangesewula, ngepumalanga nangendaweni ehle khulu. 10Lasoloko likhula belafika emkhambathini womkayi, laphosa phasi ezinye zeendalwa ezilapho, okutjho iinkwekwezi, lagadanga phezu kwazo. 11Ngitjho naphambi kwesiKhulu seendalwa zomkhambathi womkayi laziphakamisa ukuze kususwe umhlabelo wokutjhiswa wangemihla esiKhulwineso nendawaso ecwengileko yabhuruzwa. 12Ngebanga leemphambeko, umhlabelo wokutjhiswa wangemihla wajanyiselelwa ngemisebenzi eyonakeleko yokulotjha, nomthetho weqiniso walahlelwa phasi. Laphumelela kikho koke elikwenzako. 13Nje-ke ngezwa ocwengileko akhuluma, godu ngezwa nomunye ocwengileko asithi kimi: “Sizakuba ngangani isikhathi sombono omayelana nomhlabelo wangemihla neemphambeko ezibhubhisako na? Kuzabe kube nini indawo ecwengileko kanye nomsebenzi wokulotjha usilaphazwa na?” 14Wangiphendula wathi: “Kuzakuthatha ukuhlwa nokusa okuziinkulungwana ezimbili namakhulu amathathu bese indawo ecwengileko iyahlanjululwa.”
15Kuthe sengiwubonile umbono, mina Danyela ngafunisisa bona ngiwuzwisise. Nje-ke qala, phambi kwami kwajama omunye onesibumbeko somuntu. 16Ngezwa ilizwi lomuntu ngehla komsele i-Ulayi lirhuwelela lisithi: “Gabhariyela! Yenza bona umuntu loyo azwisise umbono!”
17Nje-ke watjhidela eduze nalapha ngijame khona. Sele afikile, ngethuka khulu bengawa ngobuso. Kodwana yena wathi kimi: “Ndodana yomuntu, zwisisa ngombana umbono ungowesikhathi semihla yokuphela.”
18Kwathi asakhuluma nami njalo, ngehlelwa mumoya ngilele ngobuso phasi. Kodwana wangithinta, wangisikimisa khonapho. 19Wathi: “Qala la, ngizokwazisa lokho okuzokubakhona emihleni yokuphela yesibetho ngombana lokho kusikhathi sokuphela esijanyisiweko. 20Mayelana neqama owalibonako elineempondo ezimbili, lokho kutjho amakhosi weMediya nePheresiya. 21Ipongo emaruthuruthu iyikosi yeGirisi bese kuthi iphondo elihlangana namehlwayo liyikosi yokuthoma. 22Mayelana nephondo elephukako kwathi endawenalo kwavela amanye amane, lokho kumibuso emine ezakubakhona ngokuvela esizweni sekosi leyo kodwana angekhe kwaba ngamandlayo.
23“Emihleni yokuphela yokubusa kwawo,
lokha iimphambeko sele zifike ezingeni elipheleleko,
kuzakusikima ikosi enobuso obutjhibileko
nenamano wobuqili.
24Izakuba namandla amakhulu,
kodwana ekungasiwo wayo.
Izakubanga ihlekelele engazange kheyibonwe
begodu izakuphumelela kikho koke ekwenzako.
Izakubhubhisa abanamandla nesizwe nabacwengileko.
25Ngobuqili bayo izakwenza
bonyana ukukhwabanisa kuvame.
Engqondwenayo izazibona iyikulu
begodu izakwenza abanengi
bonakale bangakatjheji.
Izakujamelana ngitjho nesiKhulu seenkhulu
kodwana izakuphohlozwa
ngaphandle kwesandla somuntu.
26“Umbono wobusuku nokusa otjelwe wona uliqiniso. Kodwana wena vala umbono ngokuwugiba ngombana ungowamalanga amanengi kusukela nje.”
27Mina Danyela, bengiqobekile begodu bengigula amalangana. Emva kwalapho ngavuka ngaragela phambili nomsebenzi wekosi. Bengisamangele ngombono kodwana akakho owakuyelelako lokho.
