UDUTERONOMI 16

₁Gcinani inyanga ka-Abibi, nenzele uSomnini uZimenu iPhasika ngombana ngenyanga ka-Abibi uSomnini uZimenu wanikhupha eGibhide ebusuku. ₂Nizakuhlabela uSomnini uZimenu iPhasika eenkomeni, ezimvini neembuzini zenu endaweni ezakukhethwa nguSomnini kobana ajamise ibizo lakhe lapho. ₃Ningaligomi ngesikwa esinengumelo. Ligomeni amalanga alikhomba ngesikwa esinganangumelo, isikwa esinikhumbuza igandelelo ukuze kiwo woke amalanga wokuphila kwenu nikhumbule ilanga enaphuma ngalo eGibhide nirhabile. ₄Kungabi nehlama enengumelo phakathi kwenu kiyo yoke imikhawulwenu amalanga alikhomba. Inyama eniyihlabe ntambama elangeni lokuthoma, ingahlali bekuse. ₅Anikavunyelwa ukuhlaba iPhasika kinamkha ngiliphi lamadorobhenu eniwaphiwe nguSomnini uZimenu ₆ngaphandle kwendawo ezakukhethwa nguSomnini uZimenu, bona ajamise ibizo lakhe lapho. Nizakuhlaba iPhasika lapho ntambama nakutjhinga ilanga ngesikhathi enaphuma ngaso eGibhide. ₇Nipheke inyama yakhona niyigomele endaweni ezakukhethwa nguSomnini uZimenu bese ekuseni nibuyele lapha nihlala khona. ₈Nizakugoma isikwa esinganangumelo amalanga alikhomba bese elangeni lekhomba nenzele uSomnini uZimenu umgidi omkhulu. Nje-ke mhlokho ningawuthinti umsebenzi.

₉Nizakubala iimveke ezilikhomba ukusuka ngesikhathi nithoma ukugweba ibhali. ₁₀Nigidinge umnyanya weemVeke kuSomnini uZimenu ngokunikela ngomnikelo wesihle ukuya ngendlela uSomnini uZimenu anibusise ngayo. ₁₁Nijekezele phambi kwakaSomnini uZimenu, nina namadodana namadodakazenu, amakhoboka namakhobokakazenu, amaLevi asemadorobhenenu, iinkhonzi, iintandani kanye nabahlolokazi abaphakathi kwenu, endaweni ezakukhethwa nguSomnini uZimenu bona ajamise ibizo lakhe lapho. ₁₂Nizakhumbula bonyana nakhe naba makhoboka eGibhide, ngalokho nitjheje ukugcina iimiswezo.

₁₃Gidingani umnyanya wemiTlhatlhana amalanga alikhomba lokha nanibutha eselelweni nebutlhodlhelweni benu. ₁₄Yenamani ngomnyanyenu lowo, nina namadodana namadodakazenu, amakhoboka namakhobokakazenu, amaLevi, iinkhonzi, iintandani nabahlolokazi abaphakathi kwamadorobhenu. ₁₅Gidingani umnyanya kaSomnini uZimenu amalanga alikhomba endaweni ezakukhethwa nguSomnini ngombana uzanibusisa kiyo yoke imikhiqizwenu nakiyo yoke imisebenzi yezandla zenu ukuze nename noke.

₁₆Kuzakuthi kathathu ngomnyaka boke abaduna benu bavele phambi kwakaSomnini uZimenu endaweni azayikhetha: ngomnyanya wesiKwa esinganaNgumelo, emnyanyeni weemVeke nemnyanyeni wemiTlhatlhana. Ningaveli phambi kwakaSomnini nimkhonoze, ₁₇kodwana woke umuntu akanikele ngendlela akghona ngayo ukuya ngesibusiso sakaSomnini uZimenu ambusise ngaso.

₁₈Khethani abagwebi neenkhulu kiwo woke amadorobhenu uSomnini uZimenu anipha wona ukuya ngeenkoro zenu bese bagweba abantu ngeengwebo ezinokulunga. ₁₉Ningahlanakeli ubulungiswa, ningakhethi ubuso, ningamukeli ukufunjathiswa ngombana ukufunjathiswa kuphophaza amehlo wohlakaniphileko bese kwenza abaneqiniso babe bakhohlisi. ₂₀Yenzani ubulungiswa kwaphela ukuze niphile benizuze inarha eniyiphiwa nguSomnini uZimenu.

₂₁Ningathi nanakha i-aldari lakaSomnini uZimenu bese nitjala umuthi ojamele u-Atjhera eqadi kwalo. ₂₂Ningazijamiseli amatje akhethekileko ngombana uSomnini uZimenu uyazizonda izintwezo.