Ukwakhiwa kwe-aldari entabeni i-Ebali
1UMosi ngokusekelwa baphathi bakwa-Israyeli wayala abantu ngamezwi alandelako:
Gcinani yoke imiyalo enginiyala ngayo namhlanje. 2Mhlana niyama iJordani niya enarheni uSomnini uZimenu aninikela yona, zilungiseleleni ukubeka amatje amakhulu nokuwatjhatjha ngepembe, 3ukuze nitlole phezu kwawo woke amezwi womthetho lo. Lokho nikwenze naniyamako kobana ningene enarheni uSomnini uZimenu aninikela yona, inarha egeleza ibisi neliju, njengombana uSomnini uZimu waboyihlomkhulu anithembisa. 4Nasele niyame iJordani, nizakubeka amatje enginiyale ngawo namhlanje la, entabeni i-Ebali, niwatjhatjhe ngepembe. 5Nakhele lapho uSomnini uZimenu i-aldari lamatje, ningawaqoqodi ngesisetjenziswa sesimbi. 6Nizakwakhela uSomnini uZimenu i-aldari lamatje angakabazwa, nenzele uSomnini uZimenu iminikelo yokutjhiswa kilo. 7Yenzelani lapho iminikelo yetjhebiswano, nigomele khonapho benijekezele phambi kwakaSomnini uZimenu. 8Qinisekisani bonyana nitlole woke amezwi womthetho lo phezu kwamatjapho abonakale kuhle.
Ukumenyezelwa kwamanikelela entabeni i-Ebali
9UMosi ngokusekelwa baphristi bamaLevi wathi kiwo woke ama-Israyeli ngamezwi alandelako: Thulani nithi du, nilalele nina ma-Israyeli: Namhlanje sele nibabantu bakaSomnini uZimenu. 10Ngalokho lalelani uSomnini uZimenu, nilonde imiyalwakhe neemiso zakhe, enginiyala ngazo namhlanje.
11Godu uMosi wayala abantu khona mhlokho ngamezwi la:
12Nasele niyame iJordani, iinkoro ezilandelako zizakujama e-aldarini ngehlangothini lentaba iGerizimu lokha nakumenyezelwa iimbusiso: bakwaSimiyoni, bakwaLevi, bakwaJuda, bakwa-Isakari, bakwaJosefa nebakwaBhenjamini. 13Iinkoro ezilandelako zizakujama e-aldarini ngehlangothini lentaba i-Ebali lokha nakumenyezelwa amanikelela: bakwaRubeni, bakwaGadi, bakwa-Atjhere, bakwaZebuloni, bakwaDani nebakwaNafitali. 14AmaLevi azakumemezela kibo boke abantu bakwa-Israyeli ngelizwi elikhulu athi:
15“Akanikelelwe umuntu obaza namkha obumba isithombe bese asijamise ngemsitheleni, okuyinto eyenziwe ngezandla zakasosino. Lokho kusinyenyiso kuSomnini.”
Boke abantu bazakuphendula bathi: “Amen!”
16“Akanikelelwe umuntu odelela uyise nonina.”
Boke abantu bazakuthi: “Amen!”
17“Akanikelelwe otjhidisa isikhonkhwani sakamakhelwana.”
Boke abantu bazakuthi: “Amen!”
18“Akanikelelwe umuntu odurhisa isiphofu endleleni.”
Boke abantu bazakuthi: “Amen!”
19“Akanikelelwe umuntu ohlanakezela ilungelo lesikhonzi, lentandani nelomhlolokazi.”
Boke abantu bazakuthi: “Amen!”
20“Akanikelelwe umuntu olalana nomkayise ngombana wembule ubuze bomkayise.”
Boke abantu bazakuthi: “Amen!”
21“Akanikelelwe umuntu olalana nanamkha mhlobo bani wesilwana.”
Boke abantu bazakuthi: “Amen!”
22“Akanikelelwe umuntu olalana nodadwabo, kungaba yindodakazi kayise namkha indodakazi kanina.”
Boke abantu bazakuthi: “Amen!”
23“Akanikelelwe umuntu olalana nomkhwekazakhe.”
Boke abantu bazakuthi: “Amen!”
24“Akanikelelwe umuntu obulala omunye umuntu ngemsitheleni.”
Boke abantu bazakuthi: “Amen!”
25“Akanikelelwe umuntu owamukela ukufunjathiswa kobana abulale umuntu, ngokwenza njalo athulule iingazi ezimsulwa.”
Boke abantu bazakuthi: “Amen!”
26“Akanikelelwe umuntu ongadzimeleli emazwini womthetho lo.”
Boke abantu bazakuthi: “Amen!”
