UDUTERONOMI 34

₁UMosi wakhuphukela emrhobeni weJordani kwaMowabi entabeni iNebo, esiqongolweni sePisiga, emalungana neJerikho. USomnini wamkhombisa yoke inarha: ukusuka eGiliyadi ukuyokufika kwaDani, ₂yoke iNafitali, inarha yakwa-Efrayimu neyakwaManase, yoke inarha yakwaJuda ukuyokufika elwandle elingetjingalanga, ₃isewula yenarha nomrhoba weJordani, okutjho umrhula weJerikho idorobho lamasundu, ukuyokufika eTsowari. ₄USomnini wathi kuye: “Nasi inarha engayifungela ku-Abrahamu, u-Isaka noJakopo ngathi ngizayinikela iinzukulwana zabo. Ngikuvumele bonyana uyibone ngamehlwakho, kodwana awuzukungena kiyo.”

₅Yeke uMosi inceku kaSomnini wahlongakalela lapho enarheni yakwaMowabi ukuya ngelizwi lakaSomnini. ₆USomnini wambulungela ngakeminye yemirhoba enarheni yakwaMowabi malungana neBhethe-Pewori. Akunamuntu owazi ithuna lakhe bekube namhlanje. ₇UMosi gade aneminyaka elikhulu namatjhumi amabili lokha nahlongakalako. Amehlwakhe gade asabona kuhle begodu asese namandla emzimbeni. ₈Ama-Israyeli alilela uMosi kwaMowabi ngemrhobeni weJordani amalanga amatjhumi amathathu. Ngemva kwalapho amalanga wokulila nokuzila aphela.

₉UJotjhuwa umsa kaNuni wayezele ngommoya wokuhlakanipha ngombana uMosi wayembeke izandla. Yeke ama-Israyeli amlalela, enza njengombana uSomnini ayale uMosi. ₁₀Nje-ke solo kwalokho azange bekusaba nomphorofidi onjengoMosi kwa-Israyeli uSomnini atjhidelene khulu naye. ₁₁Azange kube nonjengaye uSomnini amnikela zoke iimbonakaliso nemikarisomraro kobana azenze enarheni yeGibhide kuFaro nakizo zoke iinceku zakhe nenarhenakhe yoke. ₁₂Woke ama-Israyeli awabona amandla amakhulu nezenzo ezesabekako ezikulu uMosi azenzako.