UMTJHUMAYELI 3

₁Yoke into inesikhathi ebekelwe sona,

iye, kunesikhathi sayo yoke into

ngaphasi komthunzi welanga:

₂Kunesikhathi sokubeletha nesikhathi sokufa,

isikhathi sokutjala nesikhathi sokusiphula okutjaliweko;

₃isikhathi sokubulala nesikhathi sokuphilisa,

isikhathi sokugiriza nesikhathi sokwakha;

₄isikhathi sokulila nesikhathi sokuhleka,

isikhathi sokuzila nesikhathi sokugida;

₅isikhathi sokulahla amatje

nesikhathi sokuwabuthelela,

isikhathi sokugona nesikhathi sokufulathela;

₆isikhathi sokufuna nesikhathi sokulahla,

isikhathi sokugodla nesikhathi sokusaphaza;

₇isikhathi sokudabula nesikhathi sokuthunga,

isikhathi sokuthula nesikhathi sokukhuluma;

₈isikhathi sokuthanda nesikhathi sokuzonda,

isikhathi sepi nesikhathi sokuthula.

₉Isisebenzi sizuzani ekutjhabatjhekeni kwaso na?

₁₀Ngibone umthwalo uZimu awethwese abantu

kobana abatshwenye ngawo:

₁₁Wenze yoke into yafaneleka ngesikhathi sayo.

Godu wanikela abantu ilwazi

lokulemuka iinkhathi,

kodwana abatlhadlhuleki

ngomsebenzi uZimu awenza ekuthomeni

bekube sekupheleni.

₁₂Ngilemukile bonyana

ayikho into ethokozisa umuntu

ngaphandle kokuzijabulisa

nokuzenzela okuhle nasaphilako,

₁₃okutjho bona woke umuntu kufanele agome,

asele abe azikholise kikho koke ukutjhabatjheka kwakhe.

Lokho kusisipho esibuya kuZimu.

₁₄Ngilemukile bonyana koke uZimu akwenzako

kuzakuhlala isiphelani,

akunanto engangezelelwa nanyana iphungulwe kilokho.

UZimu wenza lokho ukuze umuntu amesabe.

₁₅Okukhona, kwakhe kwaba khona

nokusazakuba khona, kukhona.

UZimu ubuyekeza okwadlulako.

₁₆Godu kukhona engakubona ngaphasi komthunzi welanga:

Esikhundleni sokugweba ngeqiniso,

kuhlezi ubukhohlakali

nesikhundleni sokulunga,

kuhlezi ubukhohlakali.

₁₇Ngadlumbana ngathi:

“UZimu uzakugweba

olungileko nokhohlakeleko

ngombana kunesikhathi sayo yoke into

nesawo woke umsebenzi.”

₁₈Godu ngadlumbana ngathi:

“Kungebanga labantu kobana uZimu abazizinye

ukuze babone bonyana sebayafana neenlwana.”

₁₉Okwehlela iinlwana kwehlela nabantu.

Iye, behlelwa sisehlo esifanako:

Njengombana iinlwana zifa

nabantu bayafa.

Koke kunomphefumulo ofanako;

umuntu akasingcono kunesilwana

ngombana koke kulilize.

₂₀Koke kuya endaweni yinye;

koke kwavela ethulini,

ngokunjalo koke kuzakubuyela ethulini.

₂₁Ngubani owaziko

bonyana umphefumulo wabantu utjhinga phezulu,

weenlwana utjhinge phasi na?

₂₂Yeke ngabona

bonyana akunanto engcono emuntwini

kunobanyana azikholise ngomsebenzakhe

ngombana lokho kusisabelo sakhe.

Ngubani ongambonisa

kobana kwenzakalani ngemva kokufa kwakhe na?