KWEBE-EFESU 2

₁Nakungini, benifile eemphambekweni nezonweni zenu, ₂ebenijayele ukuphila kizo lokha nabegade nilandela iindlela zephaseli nezombusi wombuso womkayi, okumumoya osebenza phakathi kwalabo abangalaleliko. ₃Soke nje sakhe saphila phakathi kwazo ngesinye isikhathi, sanelisa iinkanuko zemvelo yethu yokonakala, salandela iinkanuko nemikhumbulwayo. Njengabo boke, ngokwemvelo besizizinto zokulahlwa. ₄Kodwana ngebanga lethando lakhe elikhulu, uZimu onothileko ngomusa, ₅wasenza saphila ngoKrestu nanyana besifile ngeemphambeko. Yeke kungomusa bona nibe ngabasindisiweko. ₆UZimu wasivusa naye bewasihlalisa kanye naye embusweni wezulu kuKrestu Jesu ₇ukuze kuthi eenkhathini ezizako akhombise umnono ongalinganisekiko womusa wakhe, obonakaliswe esiseni sakhe kithi ngoKrestu Jesu. ₈Nje-ke kungomusa kobana nibe ngabasindisiweko ngokukholwa begodu lokhu akuveli kini, kodwana kusisipho sakaZimu, ₉akuveli ngemisebenzi ukuze kungabikho ozozikhakhazisa. ₁₀Thina simsebenzi wezandla zakhe, kuKrestu Jesu kobana senze imisebenzi emihle uZimu asilungiselele yona ngaphambilini ukuze siphile kiyo.

₁₁Ngalokho khumbulani bona phambilini labo abazibiza bona “ngabasokako” (basitjho ukusoka okwenziwa emzimbeni ngezandla zomuntu) bebanibiza bona ningabatjhili ngokubelethwa. ₁₂Khumbulani bona ngesikhatheso beninganabudlelwano noKrestu, benininwa ekubeni zizakhamuzi zakwa-Israyeli, beningabalwa nesivumelwaneni sesithembiso. Beninganathemba begodu ninganaZimu ephasini. ₁₃Kodwana nina ebenikude noKrestu Jesu, senitjhideziwe ngeengazi zakhe. ₁₄Yena ngokwakhe ukuthula kwethu, iye, loyo owenza ababili baba munye, watjhabalalisa isiqabo okumthangala wobutha owahlukanisako, ₁₅ngokuphelisa enyamenakhe umthetho nemiyalo yawo kanye neemiso zawo. Umnqopho wakhe bekukubumba kuye umuntu oyedwa ngokuhlanganisa ababili, ngalokho enze ukuthula, ₁₆kuthi emzimbeni owodwa lowo enze ababili babuyisane noZimu esiphambanweni aphelisa ngaso ubutha. ₁₇Alo-ke, uKrestu weza watjhumayela ukuthula kini nina ebenikude nakilabo ebebaseduze, ₁₈ngombana ngaye, soke sikghona ukufikelela kuBaba ngoMoya munye.

₁₉Ngalokho-ke, anisesemiqhamuka namaphandle, kodwana nizizakhamuzi kanye nabantu bakaZimu begodu nimalunga womndeni kaZimu. ₂₀Nakhelwe phezu kwesisekelo sabapostoli nabaphorofidi ngoKrestu Jesu ngokwakhe, olilitje elisisekelo. ₂₁Kuye kuhlanganiswe umakhiwo woke, uphakame ube lithempeli elicwengileko kuSomnini. ₂₂Nani-ke, niyakhiwa ndawonye kuye kobana nibe yindlu lapha kuhlala khona uZimu ngoMoya wakhe.