U-ESTA 3

₁Emva kwezintwezo ikosi u-Arhatjhiverotjhi yakhuphula ngokwesikhundla uHamani umsa kaHamedata umAgagi, yamdlondlobalisa yamnikela isikhundla esingaphezu kweenkhulu zoke ezazikanye naye. ₂Zoke iinsebenzi zekosi ebezisebandla esigodlweni beziguqa zihloma iinhloko phasi phambi kwakaHamani ngombana ikosi beyiyale njalo ngaye. Kodwana uMoridekayi bekangaguqi abe ahlome ihloko phasi phambi kwakhe.

₃Nje-ke iinsebenzi zekosi ebezisebandla esigodlweni zathi kuMoridekayi: “Kubayini weqa umyalo wekosi?” ₄Zakhuluma naye imihla ngemihla kodwana akhange afune ukuzilalela. Ngalokho zabikela uHamani kobana abone bonyana ukuziphatha kwakaMoridekayi kufuze kubekezelelwe na ngombana gade azitjelile bona yena umuJuda. ₅Lokha uHamani nakabona bonyana uMoridekayi akhange amguqele abe ahlome ihloko phasi phambi kwakhe, kwathi akafe, ₆wasopha ukumbulala. Kuthe bona abikelwe kobana abantu bakaMoridekayi basisizwe siphi, akhange afune ukubulala uMoridekayi ayedwa, kodwana nabantu bakhe boke. Ngalokho waluka iqhinga lokubhubhisa woke amaJuda kiwo woke umbuso ka-Arhatjhiverotjhi.

₇Ngenyanga yokuthoma (lokhu kutjho inyanga kaNisani), ngomnyaka wetjhumi nambili ka-Arhatjhiverotjhi, baphosa ipuri (lokhu kutjho ifumbe) phambi kwakaHamani kobana ihlose ilanga nenyanga. Ifumbe leyo yakhupha inyanga yetjhumi nambili (lokhu kutjho inyanga ka-Adari). ₈Nje-ke uHamani wathi ekosini u-Arhatjhiverotjhi: “Kunabantu abathileko abahlakazeke hlangana nabantu kizo zoke iimfunda zombuswakho. Abantwabo bayazahlukanisa: Imithethwabo yehlukile keyabantu boke begodu abathobeli imiyalo yekosi. Abantu abanjalo akusikuhle bonyana ikosi ibalise banjalo. ₉Nakube kuthokozisa ikosi, akumenyezelwe bonyana bapheliswe. Nje-ke mina ngizakukhokhela abasebenza umsebenzi lowo amakhilogremu aziinkulungwana ezimakhulu amathathu namatjhumi alikhomba nahlanu wesiliva. Isilivelo bangalifaka eenlulwini zesigodlo.”

₁₀Nje-ke ikosi yakhupha idzilamnwana yesigibo esandleni sayo yanikela uHamani umsa kaHamedata umAgagi osisitha samaJuda. ₁₁Yakhuluma noHamani yathi kuye: “Isiliva nabantwabo kusesandleni sakho, yeke yenza okuthandako ngesizweso.”

₁₂Nje-ke kwathi lokha inyanga yokuthoma nayinamalanga alitjhumi nantathu, kwabizwa abososiba bekosi. Mhlokho kwatlolwa isimemezelo ukuya ngakho koke uHamani ayala ngakho. Kwatlolelwa ababusi abakhulu bekosi, abengameli beemfunda zoke nabarholi babantu ngokuhlukahlukana kwabo. Isifunda esinye nesinye satlolelwa umtlolwaso ngokwamalimi wabantu baso. Lokho kwenziwa ebizweni lekosi u-Arhatjhiverotjhi bekwagitjwa ngedzilamnwanayo. ₁₃Iincwadi zathunyelwa ngeengijimi eemfundeni zoke zekosi kobana kubhujiswe, kubulawe, kupheliswe woke amaJuda, abakhulu nabancani, abafazi nabantwana bekuphangwe nepahlawo. Lokho kwenziwe ngelanga elilodwa, mhlana zilitjhumi nantathu enyangeni yetjhumi nambili okuyinyanga ka-Adari. ₁₄Umkhuphelo wesimemezelo bekufuze ukhutjhwe njengomthetho esifundeni esinye nesinye kwaziswe boke abantu ukuze bakwazi ukuzilungiselela ngelangelo. ₁₅Nje-ke iingijimi zaphuma zisunduzwa myalo wekosi. Isimemezelweso sakhutjhwa ngitjho nebuphephelweni beTjhutjhani. Kwathi ikosi noHamani basaditjhe njalo ngokusela, kwabe idorobho lona lisesiyaluyalwini.