Ukuhlula kwamaJuda
1Ilanga letjhumi nantathu lenyanga yetjhumi nambili, okuyinyanga ka-Adari, lafika. Lelo-ke bekulilanga lapha umthetho nomyalo wekosi bewufanele wenziwe ngalo, okutjho mhlana izitha zamaJuda bezithemba bonyana zizowabhudungela. Kodwana ilangelo laphendulelwa: AmaJuda kwaba ngiwo abhudungela labo egade bawazondile. 2Ahlangana emadorobhenawo eemfundeni zoke zekosi u-Arhatjhiverotjhi kobana azokubulala labo ebebafuna ukuwarhayila. Bekungekho obekangajama phambi kwawo ngombana boke abantu baba nokwesaba amaJuda. 3Boke ababusi beemfunda, ababusi abakhulu bekosi, abomengameli beemfunda neenkhulu zesigodlo zasiza amaJuda ngombana zaba nokwesaba uMoridekayi. 4Iye, uMoridekayi loyo besele kumumuntu omkhulu esigodlweni nedumo lakhe lasabalala neemfunda zoke. Wadlondlobala wakhula emandleni. 5Nje-ke amaJuda asahlela zoke izitha zawo ngesabula, azibulala aziqeda, azenzela umathanda kilabo ebebawazondile. 6Ebuphephelweni beTjhutjhani abulala abe aphelisa amakhulu amahlanu wamadoda. 7Abuya godu abulala uPharitjhanidata, uDalifoni, u-Asiphata, 8uPhorata, u-Adaliya, u-Aridata, 9uPharimatjhita, u-Arisayi, u-Aridayi noVayizata, 10okumadodana alitjhumi kaHamani umsa kaHamedata isitha samaJuda. Kodwana akhange ayithinte ipango.
11Khona mhlokho kwabikwa ekosini isibalo salabo ababulewe ebuphephelweni beTjhutjhani. 12Ikosi yathi ku-Esta indlovukazi: “Ebuphephelweni beTjhutjhani amaJuda abulele amadoda amakhulu amahlanu abe abhubhisa amadodana alitjhumi kaHamani. Kazi kungangani-ke ukubulala okwenziwe kezinye iimfunda zebukhosini! Kosikazi, nawunesililo, uzakwenzelwa sona. Yitjho isibawo sakho! Uzakuphiwa sona!”
13Nje-ke u-Esta wathi: “Nangabe kuhle ekosini, akuthi kusasa amaJuda aseTjhutjhani avunyelwe bonyana enze njengombana kusitjho umthetho wanamhlanjesi lo. Iindumbu zamadodana alitjhumi kaHamani aziphanyekwe eengodweni.”
14Nje-ke ikosi yayala bonyana kwenziwe lokho. Kwakhutjhwa isimemezelo eTjhutjhani, yeke iindumbu zamadodana alitjhumi kaHamani zaphanyekwe. 15AmaJuda agade aseTjhutjhani ahlangana godu ngelanga letjhumi nane lenyanga ka-Adari, abulala eTjhutjhanapho amadoda amakhulu amathathu. Kodwana akhange ayithinte ipango.
16Nje-ke namaJuda amanye agade aseemfundeni zekosi abuthana bonyana avikele ipilwawo nokobana akhe aphumule ezitheni zawo. Abulala iinkulungwana ezimatjhumi alikhomba nahlanu zalabo ebebawazondile. Kodwana akhange ayithinte ipango. 17Lokho kwenzeka elangeni letjhumi nantathu lenyanga ka-Adari. Kwathi ngelanga letjhumi nane aphumula enza ilangelo laba ngelomgidi wokwenama.
Umnyanya wePurimu
18AmaJuda agade aseTjhutjhani begodu ahlangene ngelanga letjhumi nantathu neletjhumi nane, aphumula ngelanga letjhumi nahlanu okulilanga alenza umgidi wokwenama. 19Ngalokho amaJuda wezabelo zoke agade ahlala emizaneni enganamithangala, athatha ilanga letjhumi nane lenyanga ka-Adari njengelokwenama, lomgidi nelokuphumula. Godu kwaba lilanga lokuritjhana.
20UMoridekayi wazitlola izintwezo, wathumela iincwadi kumaJuda woke ebegade angeemfundeni zoke zekosi u-Arhatjhiverotjhi, kude neduze. 21Bekawazisa bonyana agidinge qobe mnyaka ilanga letjhumi nane neletjhumi nahlanu lenyanga ka-Adari, 22kube malanga amaJuda afunyene ngawo ukuphumula ezitheni zawo nenyanga ephendulele isizi lawo ekwenameni nokulila kwawo ekugidingeni. Enza amalanga lawo aba ngewokugidinga nokwenama, iye, namalanga wokuritjhana nokupha abadududu izipho. 23Nje-ke amaJuda akwamukela lokho njengomkhuba kobana enze njengombana uMoridekayi awatlolele. 24Lokho wakwenza ngombana isitha samaJuda uHamani umsa kaHamedata umAgagi, gade enze ilisu elimbi ngamaJuda kobana awaqede. Begodu gade enze bona kuphoswe ipuri (lokhu kutjho ifumbe) ngawo ukuze awararanise abe awaqede nya. 25Kodwana emva kobana u-Esta eze phambi kwekosi, ikosi yakhupha umyalo ngokutlola kobana ilisu lobukhohlakali uHamani agade alilukile ngamaJuda, kufuze libuyele ehlokwenakhe. Yena namadodanakhe baphanyekwa eengodweni.
26Ngalokho babiza amalanga lawo bona yiPurimu ngokususela ebizweni elithi ipuri. Nje-ke ngebanga lakho koke ebekutlolwe encwadini eyatlolwa nguMoridekayi, nalokho amaJuda aqalana nakho endabeni le kanye nalokho okwawehlelako, 27akwamukela njengomkhuba wawo noweenzukulwana zawo kanye nabo boke azihlanganisa nawo bonyana azakulonda amalanga amabili lawo ngaphandle kokuhluleka. Kuzakuba njengombana kutloliwe begodu kuzakwenziwa ngesikhathi esibekiweko, qobe mnyaka. 28Amalanga lawo azakukhunjulwa begodu azakulondwa iinzukulwana ngeenzukulwana, imindeni ngemindeni, iimfunda ngeemfunda nemizi ngemizi. Iye, amalanga wePurimu akukameli eqiselwe amehlo emaJudeni namkha aliswe ukugidingwa eenzukulwaneni zawo.
29Nje-ke indlovukazi u-Esta oyindodakazi ka-Abirhayeli, banoMoridekayi umJuda, bakhupha umtlolo wesibili ogunyaza ngokugcweleko incwadi yokuthoma mayelana nePurimu. 30Kwathunyelwa iincwadi ezineenlokotho ezihle nezikhuthazako kiwo woke amaJuda eemfundeni ezilikhulu namatjhumi amabili nalikhomba zombuso ka-Arhatjhiverotjhi. 31Eencwadinezo bekuqiniswa bonyana kugidingwe amalanga wePurimu ngeenkhathi zawo ezijanyisiweko. Lokho bekufanele kube njengesimiso esabekwa nguMoridekayi umJuda emaJudeni besaqiniswa ngu-Esta indlovukazi. Begodu kube ngendlela wona agade azimisele ngayo kanye neenzukulwana zawo ngendaba yokuzila nokulila kwawo. 32Umyalo wendlovukazi u-Esta waqinisa isimiso sokugidinga iPurimu, nje-ke lokho kwatlolwa phasi encwadini yemilando.
