U-EKSODUSI 1

₁U-Israyeli onguJakopo waya eGibhide. Amadodanakhe akhamba naye, enye nenye nomndenayo. Naka amabizwawo:

₅Ngesikhatheso uJosefa bekasele aseGibhide. Yeke iinzukulwana zakaJakopo gade zimatjhumi alikhomba ngesibalo.

₆UJosefa nabo boke abafowabo kanye nazo zoke iinzukulwanezo bahlongakala, ₇kodwana ama-Israyeli abeletha, ahluma abe anda ngesibalo kangangobana azala inarha yeGibhide.

₈Ngokukhamba kwesikhathi eGibhide kwaba nekosi etja egade ingamazi uJosefa. ₉Yathi ebantwini bayo: “Qalani, ama-Israyeli kwanjesi sele andile kunathi. ₁₀Yeke asibeni nelisu ngawo, sikhandele bona angandi. Nakungasinjalo nakube kuyenzeka bona siqalane nepi azakuba libutho nezitha zethu bese alwa nathi, athumbe inarha.”

₁₁Ngalokho bawabekela abatjhotjhozeli kobana bawagandelele emsebenzinawo okatelelako. Bekufuze akhe iPitomu neRamesese njengamadorobho wakaFaro wokubeka ipahla. ₁₂Kodwana bathi nabarhagala ngokuwagandelela nawo arhagala ngokwanda, anaba. Ngalokho amaGibhide athoma ukukhathazeka khulu ngama-Israyeli. ₁₃Nje-ke aqinisa isandla phezu kwawo, ₁₄abe enza ipilo yama-Israyeli bona ibe munyu ngokuwasebenzisa umsebenzi obudisi weentina nedaka nangayo yoke imihlobo yemisebenzi yemasimini. Kiyo yoke imisebenzi ebudisi, amaGibhide asebenzisa ama-Israyeli ngesihluku.

₁₅Ikosi yeGibhide yakhuluma kuTjhifira noPuwa okubabelethisi bamaHebheru ₁₆yathi: “Lokha nanisiza abafazi bamaHebheru ukubeletha bese nanibona kumsana, mbulaleni, nakumntazana mliseni aphile.”

₁₇Kodwana ababelethisi besaba uZimu, azange benze lokho ikosi yeGibhide ethe bakwenze. Balisa abesana baphila. ₁₈Nje-ke ikosi yeGibhide yabiza ababelethisi yababuza yathi: “Nikwenzeleni lokhu? Kubayini nilise abesana baphile na?”

₁₉Ababelethisi baphendula uFaro bathi: “Abafazi bamaHebheru abafani nebamaGibhide, bona banamandla, kuthi umbelethisi angakafiki ibe sebabelethile.”

₂₀Ngalokho uZimu waba nomusa ebabelethisini, nabantu banda baba banengi khulu ukudlula. ₂₁Ngebanga lokobana ababelethisi besaba uZimu, wabapha imbeleko.

₂₂Yeke uFaro wakhupha umyalo othi: “Boke abesana ababelethwako baphoseleni emlanjeni iNayili, kodwana abentazana bona nibalise baphile.”