U-EKSODUSI 12

₁USomnini wathi kuMosi no-Aroni eGibhide: ₂“Inyanga le izakuba yinyanga yokuthoma kini, kube ngeyokuthoma komnyaka. ₃Tjela yoke ihlangano yakwa-Israyeli bonyana elangeni letjhumi lenyanga le akube ngileyo naleyo ndoda ithathele umndenayo imvana, kube yimvana yinye ekumbeni ngayinye. ₄Nakube ikumba iba yincani khulu bona ingagoma imvana, khona abayihlukaniselane nabomakhelwana babo abaseduze, baqale isibalo sabantu abalapho. Kumele bayabe ngendlela yokobana omunye nomunye anele ngokwesilinganiso sokugoma kwakhe. ₅Khethani iimvana eziduna ezinomnyaka, zibe msulwa. Kungaba yimvana namkha imbuzana. ₆Zaluseni bekufike ilanga letjhumi nane lenyanga le, lokha yoke ihlangano yakwa-Israyeli nasele kumele izihlabe ngamarhwaqela. ₇Yeke bazakuthatha ezinye zeengazi bazitjhatjhe ngemaqadi naphezu kweengoseni zeenkumba zabo lapha bagomela khona. ₈Khona ntambamokho kumele bagome inyama ebaswe emlilweni, bayitjhebe ngeenrhabelo ezibabako nesikwa esinganangumelo. ₉Ningagomi inyama ehlaza namkha ephekwe ngamanzi, kodwana niyibase emlilweni isitutu njalo, isese nehloko, iinqatha neenredlo. ₁₀Ningatjhiyi ngitjho nesiqutjana senyamayo bekuse. Nakube nibanjwe kukusa ningakayiqedi, eseleko niyitjhise.

₁₁“Nasi-ke indlela enizayigoma ngayo: Izambatho zenu azibotjhwe edinini, nihlale nifake amapatlagwana namadondolo abe sezandleni zenu, niyigome nirhabile. KuliPhasika lakaSomnini. ₁₂Khona ngobusukobo ngizakudlula eGibhide ngimadlhe phasi woke amazibulo aduna wabantu neweenlwana. Ngizogweba boke abosingazimu beGibhide ngombana nginguSomnini. ₁₃Iingazi eziseenkumbeni lapha nikhona zizakuba litshwayo lokunivikela. Kuzakuthi nangibona iingazi, ngineqe. Angeze nathintwa matshwenyeko arhayilako lokha nangimadlha iGibhide. ₁₄Leli lilanga okumele nilikhumbule, niligidinge njengomnyanya kaSomnini, libe simiso sanini nanini eenzukulwaneni zenu. ₁₅Amalanga alikhomba nizakugoma isikwa esinganangumelo. Elangeni lokuthoma nisuse ihlama enengumelo eenkumbeni zenu ngombana nanyana ngubani ogoma nanyana yini enengumelo ukusuka elangeni lokuthoma bekube ngelekhomba, uzakujutjwa kwa-Israyeli. ₁₆Bambani umhlangano okhethekileko elangeni lokuthoma nelekhomba. Ningathinti umsebenzi nakancani kilamalanga abaliweko, ngaphandle kokulungiselela okudliwako kwaphela. ₁₇Gidingani umnyanya wesiKwa esinganaNgumelo ngombana kungelangeli lapha ngakhupha khona ihlanganwenu ngeengaba zayo eGibhide. Ugidingeni ube simiso sanini nanini eenzukulwaneni zenu. ₁₈Ngenyanga yokuthoma kumele nigome isikwa esinganangumelo ukusuka ekuhlweni kwelanga letjhumi nane bekube kusekuhlweni kwelanga lamatjhumi amabili nalinye. ₁₉Kuzabe kube malanga alikhomba kuzilwa ukuba nehlama enengumelo ngeenkumbeni zenu. Nanyana ngubani ogoma nanyana yini enesibiliso uzakujutjwa ehlanganweni yakwa-Israyeli, kungaba sikhonzi namkha umuntu wendabuko. ₂₀Ningagomi litho eliwunyelweko. Kuphi nakuphi lapha nakhe khona, gomani isikwa esinganangumelo.”

₂₁Yeke uMosi wabiza boke abaphathi bakwa-Israyeli wathi kibo: “Bambelani imindenenu imvana namkha imbuzana bese nihlaba iPhasika. ₂₂Thathani ihlukuzu lehisophi nilitjhebe eengazini ngesitjeni bese nitjhatjha iingazezo phezu kwegoseni nangemaqadi wayo. Kungabi nomuntu namunye wenu ozakuphumela ngaphandle komnyango wekumbakhe bekube sekuseni. ₂₃Lokha uSomnini nadabula enarheni bona ehlisele amaGibhide amatshwenyeko, uzakubona iingazi phezu kwegoseni nangemaqadi wayo bese weqa umnyango lowo. Angeze avumela umrhayili bonyana angene ngeenkumbeni zenu anehlisele amatshwenyeko. ₂₄Gcinani imiyalo le kube simiso senu sanini nanini neenzukulwana zenu.

₂₅“Godu lokha naningena enarheni uSomnini aninikela yona njengokwesithembiso sakhe, ragelani phambili ngokugcina umkhuba wokulotjha lo. ₂₆Kuzakuthi abantwabenu nabanibuza bonyana umkhuba wokulotjha lo utjho ukuthini, ₂₇nibatjele nithi mhlabelo wePhasika owenzelwa uSomnini oweqa iinkumba zama-Israyeli eGibhide wababalela imizi yethu lokha nakehlisela amaGibhide amatshwenyeko.”

Nje-ke abantu baguqa bahloma iinhloko phasi. ₂₈Ama-Israyeli akhamba enza poro njengombana uSomnini ayale uMosi no-Aroni.

₂₉Phakathi kobusuku uSomnini wamadlha woke amazibulo eGibhide, ukusuka ezibulweni lakaFaro esihlalweni sobukhosi ukuya ezibulweni lesibotjhwa ngejele kanye namazibulo wayo yoke ifuyo. ₃₀UFaro nazo zoke iinkhulu zakhe namaGibhide woke bavuka phakathi kobusuku. Kwaqubuka ukurhahlawula okukhulu eGibhide ngombana kwakunganandlu nayinye eyayinganasidumbu.

₃₁UFaro wabiza uMosi no-Aroni ngobusukobo wathi kibo: “Ayigubhe! Hlukanani nabantu bami nina nama-Israyelenu la! Khambani niyokulotjha uSomnini njengombana nikhombele. ₃₂Thathani izimvu neembuzi zenu kanye neenkomo zenu njengombana nitjhwile bese ningena indlela. Nami ningibeke.”

₃₃AmaGibhide akatelela abantu bonyana barhabe baphume enarheni ngombana athi: “Soke sizokufa nya!”

₃₄Ama-Israyeli athatha ihlamawo enganangumelo ayithwala emahlombe ngezitjeni zokudubela aziphuthela ngamatjhila. ₃₅Godu enza njengombana uMosi awayala abe akhombela amaGibhide kobana awaphe amagugu wesiliva newegolide kanye nezambatho. ₃₆USomnini gade enze amaGibhide bonyana abe nomusa khulu kuma-Israyeli. Nje-ke awapha lokho akukhombeleko, ngaleyondlela aphanga amaGibhide.

₃₇Ama-Israyeli akhamba asuka eRamesese anqomba eSukothi. Kwakungaba ziinkulungwana ezimakhulu asithandathu zamadoda akhamba ngeenyawo ngaphandle kwabafazi, abantwana nababuthakathaka. ₃₈Akhamba nezimvu neembuzi kanye neenkomo, kwaba mihlambi eminengi khulu. Godu kwaba nesiqubuthu sabantu bezinye izizwe esakhamba nawo.

₃₉Abhaga iimphaphatha ezinganangumelo ngehlama aphume nayo eGibhide. Ngebanga lokobana bekaqotjhiwe eGibhide, azange abe nesikhathi sokuzilungiselela imiphako nokuwumela ihlama.

₄₀Ama-Israyeli ahlala eGibhide isikhathi esiminyaka emakhulu amane namatjhumi amathathu. ₄₁Kwathi ngelanga lokugcina lokuhlangana kweminyaka emakhulu amane namatjhumi amathathu, yoke ihlangano kaSomnini yaphuma enarheni yeGibhide ngeengaba zayo. ₄₂Ngobusukobo uSomnini wabeka ilihlo phezu kwama-Israyeli kobana awakhuphe eGibhide. Ngebangelo woke ama-Israyeli, iinzukulwana ngeenzukulwana, ayalindela ngobusukobo ukuze ahloniphe uSomnini.

₄₃USomnini wathi kuMosi no-Aroni: “Nanzi iimiso zePhasika: Kungabi nomqhamuka oligomako. ₄₄Nakunekhoboka olithengileko lona lingaligoma ngemva kobana ulisokile. ₄₅Umhlali oqubileko nesisebenzi esiqatjhiweko bona bangaligomi. ₄₆Kumele ligonyelwe ngekumbeni yinye, kungabi nenyama ekhutjhelwa ngaphandle kwekumba. Ningephuli nalinye lamathambo. ₄₇Yoke ihlangano yakwa-Israyeli kumele iligidinge. ₄₈Lokha nakunesikhonzi phakathi kwenu esifuna ukugidinga iPhasika lakaSomnini, kumele sisoke boke abaduna esinabo, ngemva kwalokho-ke singaba nesabelo njengomuntu woke wendabuko kwa-Israyeli. Omduna ongakasoki angaligomi. ₄₉Umthetho lo wembatha nomuntu wendabuko kwa-Israyeli ngitjho nesikhonzi phakathi kwenu.”

₅₀Woke ama-Israyeli enza poro njengombana uSomnini ayale uMosi no-Aroni. ₅₁Khona mhlokho uSomnini wakhupha ama-Israyeli eGibhide ngeengaba zawo.