U-EKSODUSI 25

₁USomnini wathi kuMosi: ₂“Tjela ama-Israyeli bonyana angilethele umnikelo. Abaphathi abawuthathe komunye nomunye umuntu onehliziyo evumako. ₃Nanti ihlobo lomnikelo enizalithatha kiwo: igolide, isiliva nekoporo, ₄iwulu ehlaza komkayi, ebubende netlerebede, ilineni emhlophe kanye noboya beembuzi, ₅iinkhumba zamaqama ezifakwe umbala obovu, iinkhumba ezitjhukiweko bezazeswa ngamafutha, iingodo zomtholo, ₆amafutha weembani, iinungo zamafutha wokuzesa kanye namakha wetjhwalo, ₇amatje we-oniksi namatje wokukghabisa i-efodi neporiyana yomphristi.

₈“Ngenzelani indawo ecwengileko ukuze ngihlale phakathi kwama-Israyeli. ₉Nenze ithaberinakeli nakho koke okukilo ngendlela yomfanekiso engizakukhombisa wona.”

₁₀Godu uSomnini wathi kuMosi: “Ngenzelani umfaji ngeengodo zomtholo ube limitha nesiqunjwana ubude, ube siquntu nesiqunjwana semitha ububanzi nokuphakama. ₁₁Uwunameke ngegolidembala ngaphakathi nangaphandle bese uwuphetha ngegolide. ₁₂Uwubumbele amasongo wegolide amane bese uwabethelela emajikeni wawo amane ngaphasi, amasongo amabili ngehlangothini lawo namanye amabili ngakelinye ihlangothi. ₁₃Ulungise iingodo zomuthi womtholo, uzinameke ngegolide. ₁₄Ufake iingodwezo ngaphakathi kwamasongo ngemahlangothini womfaji ukuze uwuthwale ngazo. ₁₅Iingodo azibe ngemasongweni womfaji; zingasuswa kiwo. ₁₆Ufake ubufakazi besivumelwano engizakunikela bona ngemfajini. ₁₇Wenze isisibekelo somfaji ngegolidembala sibe limitha nesiqunjwana ubude, sibe siquntu nesiqunjwana semitha ububanzi.

₁₈“Wenze amakerubhi amabili wegolide ngokuwakhanda ekugcineni kwemiphetho emibili yesisibekelo somfaji. ₁₉Ukhande ikerubhi linye ngehlangothini elinye nekerubhi elinye ngakelinye ihlangothi. Amakerubhi amabili angemaqadi wesisibekelweso akabe yinto yinye nesisibekelweso. ₂₀Amakerubhi akathabululele amaphikwawo ngaphezulu engamele isisibekelo somfaji aqalane ngobuso, womabili aqale isisibekelo. ₂₁Ufake ubufakazi besivumelwano engizakunikela bona ngaphakathi komfaji bese uvala umfaji ngesisibekelo. ₂₂Ngizakuhlangana nawe lapho, ngikhulume nawe ngingehla kwesisibekelo hlangana namakerubhi amabili aphezu komfaji wobufakazi. Ngizakuyala ngalokho okumalungana nama-Israyeli.”

₂₃USomnini wabuya wathi: “Yenza itafula ngomuthi womtholo libe ngaphasana kwemitha ubude, ngaphasana kwesiquntu semitha ububanzi, libe siquntu nesiqunjwana semitha ukuphakama. ₂₄Linameke ngegolidembala bese uliphetha ngesakhelelo segolide magegana nalo. ₂₅Ukusuka emphethweni ukuya ngaphakathi kube bubanzi besandla bese wakha umqoqo wesakhelelo segolide. ₂₆Lenzele amasongo amane wegolide, uwabophelele emajikenalo amane emilenzeni. ₂₇Amasongo wokufaka iingodo zokuthwala itafula akabe ngaphasana kwesakhelelo. ₂₈Lungisa iingodo zomuthi womtholo, uzinameke ngegolide, uthwale ngazo itafula.

₂₉“Lenzele izitja ezahlukahlukeneko, iinkapho nemijeka yokuvubela umnikelo wewayini. Koke lokhu kwenze ngegolidembala. ₃₀Beka izikwa ezibekwa phambi kwakaZimu etafulenapho zibe phambi kwami ngeenkhathi zoke.”

₃₁Godu uSomnini wathi: “Yenza ilithi leembani ngegolidembala. Isikhondo, isiqu, iimpundu okutjho amaqumbe namathuthumbo walo kube msebenzi okhandwe wahlanganiswa nalo. ₃₂Akube namagatja asithandathu aphuma ngemaqadi wesiqu selithi leembani, kube magatja amathathu ngehlangothini linye lesiqu bese amagatja amathathu abe ngehlangothini elinye. ₃₃Emagatjeni akube neempundu ezinjengama-alimondi okutjho amaqumbe namathuthumbo. Egatjeni ngalinye kilawo asithandathu kube neempundu ezintathu. ₃₄Kuthi esiqwini selithi leembani kube neempundu ezine ezinjengama-alimondi, zibe namaqumbe namathuthumbo. ₃₅Akube nequmbe linye esiqwini ngaphasi komsuka wamagatja akhamba ngamabili. Kube njalo kiwo woke amagatja asithandathu asuka esiqwini. ₃₆Amaqumbe namagatja wakhona akhandwe ndawonye nesiqu ngegolidembala.

₃₇“Lenzele iimbani ezilikhomba. Ubeke isibani phezu kwesiqu nangaphezu kwegatja negatja ukuze zikhanyise esibangeni esingaphambi kwelithi leembani. ₃₈Iincimasibani nezitjana zalo zibe ngezegolidembala.

₃₉“Ilithi leembani sele lihlangene nezitja zalo zoke libe makhilogremu amatjhumi amathathu nane wegolidembala.

₄₀“Qinisekisa bonyana wenza koke lokhu ngomfanekiso owakhonjiswa wona entabeni.”