U-EKSODUSI 27

₁USomnini wathi kuMosi: “Wenze i-aldari ngeengodo zomtholo libe sikwere ngaphezulu. Ubude nobubanzi libe mamitha amabili nesiqunjwana. Libe limitha nesiqunjwana ukuphakama. ₂Ulenzele iimpundu emajikenalo amane; zinamathele kilo bese ulinameka ngekoporo.

₃“Ulenzele izitja zokufaka umlotha, iintjhefula, izitja zokunyenyeza, iimforogo nezitja zokutjhisela itjhwalo. Zoke izitja zalo uzenze ngekoporo.

₄“Godu ulenzele umsefo wekoporo njengenede ngemaqadi walo. Wenze amasongo amane wekoporo emajikenalo amane. ₅Ubeke umsefo ngaphasi komqoqo we-aldari ukuze ulembelele uphelele phakathi e-aldarini. ₆Wenzele i-aldari iingodo, kube ziingodo zomtholo bese uzinameka ngekoporo. ₇Iingodwezo zifakwe emasongweni ukuze zibe ngemaqadi we-aldari lokha naligugwako. ₈Ulenze ngamaplanka libe nomkghotho ngaphakathi njengombana wakhonjiswa lona entabeni.”

₉Godu uSomnini wathi kuMosi: “Wenze isirhodlo sethaberinakeli ngalendlela: Ngeswazini langesewula lethaberinakeli ulembelelise umlembelembe wamatjhila welineni emhlophe anomthungo abe mamitha amatjhumi amane nahlanu. ₁₀Ihlangothi lesirhodlwelo alibe neensika ezimatjhumi amabili namanzinziso wakhona amatjhumi amabili kwenziwe ngekoporo, kodwana iinkhonkhwani zeensika kanye nemipherho yakhona kwenziwe ngesiliva.

₁₁“Ngokunjalo ngeswazini langetlhagwini lethaberinakeli kube nomlembelembe wamatjhila omamitha amatjhumi amane nahlanu ubude. Akube neensika ezimatjhumi amabili namanzinziso wakhona amatjhumi amabili kwenziwe ngekoporo, kodwana iinkhonkhwani zeensika kanye nemipherho yakhona kwenziwe ngesiliva.

₁₂“Ububanzi besirhodlo, ngeswazini langetjingalanga lethaberinakeli, bube nomlembelembe wamatjhila omamitha amatjhumi amabili nambili nesiquntu. Godu bube neensika ezilitjhumi kanye namanzinziso wakhona alitjhumi.

₁₃“Ububanzi besirhodlo ngeswazini langaphambili lethaberinakeli ngepumalanga bube mamitha amatjhumi amabili nambili nesiquntu. _14-15Ihlangothi lesirhodlo langaphambili libe nemilembelembe emibili yamatjhila ephahle isango. Ubude bomlembelembe ngamunye bube mamitha asithandathu nesiquntu nesiqunjwana. Yomibili imilembelembe leyo ibe neensika ezintathu namanzinziso amathathu. ₁₆Esangweni lesirhodlo akube nesivalo esimamitha alithoba ububanzi, senziwe ngelineni emhlophe ethungwe ngewulu ehlaza komkayi, ebubende netlerebede. Asibe neensika ezine ezinamanzinziso amane.

₁₇“Zoke iinsika magegana nesirhodlo zibe nemipherho yesiliva, iinkhonkhwani zesiliva namanzinziso wekoporo. ₁₈Ubude besirhodlo bube mamitha amatjhumi amane nahlanu, ububanzi bube mamitha amatjhumi amabili nambili nesiquntu. Ukuphakama komlembelembe kube mamitha amabili nesiqunjwana. Umlembelembe lowo ube ngewelineni emhlophe enomthungo; amanzinziso wakhona enziwe ngekoporo. ₁₉Zoke izitja zethaberinakeli zananyana ngimuphi umsebenzi, nazo zoke iinkhonkhwani ezibamba itende nesirhodlo zizakuba ngezekoporo.”

₂₀USomnini wathi: “Wena-ke Mosi utjele ama-Israyeli bonyana alethe kuwe amafutha we-oliva atsengileko nacwebileko wokukhanyisa ilithi leembani. Iimbani azihlale zivutha ₂₁ngetendeni lokuhlanganela ngaphandle kwesiyaya esingaphambi kobufakazi. U-Aroni namadodanakhe kumele bahlale babona bonyana iimbani ziyakhanya phambi kwakaSomnini ukusukela ntambama bekuse. Lokhu kuzakuba simiso esijame nini nanini sama-Israyeli iinzukulwana ngeenzukulwana.”