U-EKSODUSI 37

₁UBhetsaleli wenza umfaji ngomuthi womtholo, waba limitha nesiqunjwana ubude, waba siquntu nesiqunjwana semitha ububanzi nokuphakama. ₂Wawunameka ngegolidembala ngaphakathi nangaphandle, wawuphetha ngegolide. ₃Wawubumbela amasongo amane wegolide, wawabethelela emajikenawo amane ngaphasi. Kwaba masongo amabili ngehlangothini lawo namanye amabili ngakelinye ihlangothi. ₄Wenza neengodo ngomtholo nazo wazinameka ngegolide, ₅wafaka iingodwezo ngaphakathi kwamasongo ngemahlangothini womfaji bonyana kuthwalwe ngazo umfaji. ₆Wenza isisibekelo somfaji ngegolidembala saba limitha nesiqunjwana ubude, saba siquntu nesiqunjwana semitha ububanzi.

₇Godu wenza amakerubhi amabili wegolide ngokuwakhanda ekugcineni kwemiphetho emibili yesisibekelo somfaji, ₈kwaba likerubhi linye ngehlangothini elinye nekerubhi linye ngehlangothini elinye. Amakerubhi amabili bekangemaqadi wesisibekelweso ayinto yinye naso. ₉Amakerubhi bekathabululele amaphikwawo ngaphezulu engamele isisibekelo somfaji aqalene ngobuso; womabili aqala isisibekelweso.

₁₀Godu wenza netafula ngomuthi womtholo laba ngaphasana kwemitha ubude, ngaphasana kwesiquntu semitha ububanzi, laba siquntu nesiqunjwana semitha ukuphakama. ₁₁Walinameka ngegolidembala, waliphetha ngomphetho wegolide magegana nalo. ₁₂Ukusuka emphethweni ukuya ngaphakathi kwaba bubanzi besandla, wakha umqoqo wesakhelelo segolide. ₁₃Wabumba amasongo amane wegolide, wawabophelela emajikeni wemilenzenalo emine. ₁₄Amasongo wokufaka iingodo zokuthwala itafula aba ngaphasana komphetho. ₁₅Walungisa iingodo zomtholo kobana kuthwalwe ngazo itafula, wazinameka ngegolide. ₁₆Godu wenza nezitja ngegolidembala ebekumele zibe phezu kwetafula, izitja ezihlukahlukeneko zakhona, iinkapho nemijeka yokuvubela umnikelo wewayini.

₁₇Wenza ilithi leembani ngegolidembala. Isikhondo, isiqu, iimpundu okutjho amaqumbe namathuthumbalo kwaba msebenzi okhandwe wahlanganiswa nalo. ₁₈Gade kunamagatja asithandathu aphuma ngemaqadi wesiqu selithi leembani, kwaba magatja amathathu ngehlangothini linye lesiqu namathathu ngehlangothini elinye. ₁₉Emagatjeni gade kuneempundu ezinjengama-alimondi okutjho amaqumbe namathuthumbo. Egatjeni ngalinye kilawo asithandathu kwaba neempundu ezintathu. ₂₀Esiqwini selithi leembani bekuneempundu ezine ezinjengama-alimondi, zaba namaqumbe namathuthumbo. ₂₁Bekunequmbe linye esiqwini ngaphasi komsuka wamagatja akhamba ngamabili. Kwaba njalo kiwo woke amagatja asithandathu asuka esiqwini. ₂₂Amaqumbe namagatja wakhona bekakhandwe ndawonye nesiqu ngegolidembala. ₂₃Wenza iimbani zakhona ezilikhomba, iincimasibani nezitjana zakhona ngegolidembala. ₂₄Ilithi leembani sele lihlangene nezitja zalo zoke, belimakhilogremu amatjhumi amathathu nane wegolidembala.

₂₅Wenza i-aldari letjhwalo ngomuthi womtholo. Gade lisikwere ngaphezulu okutjho isiquntu semitha ubude nesiquntu semitha ububanzi, lingaphasi kwemitha ukuphakama. Iimpundu zalo gade zinamathele kilo. ₂₆Walinameka ngegolidembala ngaphezulu nangemahlangothinalo kanye neempundu zalo, waliphetha ngegolide. ₂₇Walenzela amasongo wegolide aba ngaphasi komphethwalo. Kwaba masongo amabili ngehlangothini linye namabili ngehlangothini elifulatheleko kobana kube ziimphatho zalo lapha kufakwa khona iingodo zokulithwala. ₂₈Walungisa iingodo zomuthi womtholo, wazinameka ngegolide.

₂₉Godu wenza amafutha wokuzesa ahlukaniselweko namakha wetjhwalo elihlanzekileko. Kwaba njengomsebenzi womvangi weenhlahla.