UHEZEKIYELI 2

₁Ilizwi lathi kimi: “Ndodana yomuntu, sikima ujame ngeenyawo zakho, mina ngizokukhuluma nawe.” ₂Kuthe lokha nalikhuluma nami ummoya wangena kimi wangenza ngajama ngeenyawo. Nje-ke ngalizwa likhuluma nami. ₃Lathi: “Ndodana yomuntu, ngikuthuma kuma-Israyeli, isizwe esihlubukako nesele singihlubukile. Wona naboyisemkhulu baphambukile kimi bekube kunamhlanje. ₄Basizukulwana esinentanyana nesinekani, nokho ngikuthumela kiwo. Nje-ke ufese uthi kiwo, ‘Nakhu okutjhiwo nguSomnini uSomandla.’ ₅Ngitjho nanyana ayalalela namkha ayakhunyalala ngombana vele ayindlu ehlubukako, azakwazi nokho bonyana bekukhona umphorofidi phakathi kwawo. ₆Nje-ke wena ndodana yomuntu, ungawesabi ama-Israyeli begodu namezwawo ungawesabi. Ngitjho nanyana uzombelezwe mahlabahlaba nameva, iye, uphila phakathi kwabofezela, amezwawo ungawesabi begodu ungethuswa mamehlwawo wokuhlubuka ngombana vele ayindlu ehlubukako. ₇Wena uzakukhuluma amezwami kibo ngitjho nanyana bayezwa namkha bayakhunyalala ngombana bayindlu ehlubukako. ₈Kodwana wena ndodana yomuntu, yizwa lokho engikutjho kuwe; unganghanghabali njengendlu ehlubukako le. Khamisa, udle lokho engikunikela khona.”

₉Nje-ke ngaqala, ngabona isandla esilulelwe kimi, ngaphakathi kwaso kunomsongo otloliweko. ₁₀Sawendlala phambi kwami. Wona bewutlowe ngaphambili nangemuva; utlolwe amezwi wesililo, wokuquma nokububula.