UHEZEKIYELI 41

₁Nje-ke umuntu loyo wangingenisa ngesirhodlweni esikhulu. Walinganisa ububanzi bamaboda ahlukanisa isirhodlwana sobungeno nesirhodlo esikhulu; bebumamitha amathathu ngapha nangapha. Lobo-ke bekububanzi bamaboda lawo. ₂Ubungeno besirhodlo esikhulu bebumamitha amahlanu ububanzi namaboda aya emahlangothinaso amamitha amabili nesiquntu ngapha nangapha. Godu walinganisa ubude besirhodlo esikhulu, gade bumamitha amatjhumi amabili namamitha alitjhumi ububanzi.

₃Yeke wangena ngendaweni ecwenge khulu. Walinganisa ububanzi bamaboda ahlukanisa isirhodlo esikhulu nendawo ecwenge khulu; bebulimitha ngapha nangapha. Ubungeno bebumamitha amathathu ububanzi namaboda aya emahlangothini wendawo ecwenge khulu bekamamitha amathathu nesiquntu ngapha nangapha. ₄Walinganisa indawo ecwenge khulu; beyimamitha alitjhumi mahlangothi woke. Wathi kimi: “Le yindawo ecwenge khulu.”

₅Walinganisa iboda lethempeli, gade limamitha amathathu ububanzi; godu walinganisa ububanzi bamalawana anamathelene nethempeli emahlangothini amathathu, bebumamitha amabili. ₆Amalawana lawo akhiwe aba nemigangadelo emithathu, elinye ngehla kwelinye; wona gade amatjhumi amathathu emgangadelweni ngamunye. Gade kunemiqoqo ebodeni lethempeli emahlangothini amathathu kobana isekele imigangadelo yamalawana ukuze kungalimazeki iboda lethempeli ngaphandle. ₇Ngalokho amalawana lawo gade aba banzi ngokuya ngokukhuphuka komunye nomunye umgangadelo ngombana iboda lawo belikhuphukela phezulu. Gade kunomqaqado osuka emgangadelweni ophasi phasi ukudlula kophakathi ukuya kongaphezulu.

₈Ngabona bonyana ithempeli gade lizombelezwe sisendlalelo esidundubeziweko, mahlangothi woke, besisekelo samalawana anamathelene nethempeli. Ukuphakama kwaso bekungangehlanga elipheleko, okutjho amamitha amathathu. ₉Iboda elingaphandle lamalawana anamathelene nethempeli gade limamitha amabili nesiquntu ububanzi. Indawo evulekileko hlanu kwamalawana lawo ngaphandle nayo beyimamitha amabili nesiquntu ububanzi.

Hlangana namalawana anamathelene nethempeli ₁₀namalawu wabaphristi gade kunendawo evulekileko emamitha alitjhumi ububanzi mazombe nethempeli. ₁₁Bekuneminyango yamalawana anamathelene nethempeli eqale ngendaweni evulekileko, omunye ngetlhagwini, omunye ngesewula. Imithangala yendawo evulekileko beyimamitha amabili nesiquntu ngehlangothini elinye nelinye.

₁₂Umakhiwo ogade uqalene nendawo evulekileko ngemva kwethempeli ngetjingalanga gade umamitha amatjhumi amathathu nahlanu ububanzi namamitha amatjhumi amane nahlanu ubude. Umthangala womakhiwo lowo gade umamitha amabili nesiquntu ububanzi mazombe.

₁₃Nje-ke walinganisa ithempeli; gade limamitha amatjhumi amahlanu ubude, kanti indawo evulekileko, umakhiwo wethempeli kanye nemithangala yakhona bekumamitha amatjhumi amahlanu ububanzi. ₁₄Godu ilingaphambili lethempeli ngepumalanga neendawo ezivulekileko ngapha nangapha bezimamitha amatjhumi amahlanu.

₁₅Walinganisa ububanzi bomakhiwo oqale endaweni evulekileko ngemuva kwethempeli namalawana wakhona ngapha nangapha; gade kumamitha amatjhumi amahlanu.

Amaboda besirhodlo esikhulu sangaphakathi sethempeli nesirhodlwana sobungeno salo ₁₆bekanamekwe ngesigodo. Amafesidere anomluko okutjho imiqoqwana eyelekeneko ngapha nangapha naphezulu, nawo bekanamekwe ngesigodo mahlangothi woke. Ukunamekwa bekusuka phasi bekube semafesidereni ₁₇ukufikela ngehla kweminyango. Ingaphakathi lethempeli kanye nengaphandle kwalo, iye, mazombe namaboda woke ngaphakathi nangaphandle bekunemifanekiso ebaziweko ebekwe ngokulandelana. ₁₈Imifanekiso leyo bekungeyamakerubhi nemithi yesundu. Phakathi kwekerubhi nekerubhi bekunomuthi wesundu. Ikerubhi ngalinye linobuso obubili: ₁₉Ubuso bomuntu bebuqaliswe ngemthini wesundu ngakelinye ihlangothi nobuso bebhubezi buqaliswe ngakelinye. Emabodeni wethempeli loke mazombe ₂₀ukusukela phasi ukuya endaweni ngehla kweminyango bekumakerubhi nemithi yesundu. Ebodeni ₂₁Iesirhodlo esikhulu bekunegoseni enamahlangothi alinganako. Ubungeno bangaphambili bendawo ecwenge khulu nabo bebunjalo. ₂₂Gade kune-aldari leengodo lilimitha nesiquntu ukuphakama nemitha mahlangothi woke; belinamajika. Isikhondo kanye namahlangothi walo gade kwenziwe ngesigodo. Umuntu loyo wathi kimi: “Leli litafula eliphambi kwakaSomnini.” ₂₃Isirhodlo esikhulu nendawo ecwenge khulu gade kuneminyango engamibili. ₂₄Umnyango ngamunye gade unamabadi amabili ajikako; kumabadi amabili komunye namabili komunye. ₂₅Eminyango yesirhodlo esikhulu gade kubazwe amakerubhi kanye nemithi yesundu njengombana bekunjalo nemabodeni. Gade kunomgoqo wesigodo ngaphambi kwesirhodlwana sobungeno ngaphandle. ₂₆Amafesidere anomluko nemithi yesundu beyingapha nangapha emabodeni wesirhodlwana sobungeno. Amalawana anamathelene nethempeli nawo gade anemigoqo.