UHEZEKIYELI 6

₁Ilizwi lakaSomnini lafika kimi lathi: ₂“Ndodana yomuntu, beka amehlwakho eentabeni zakwa-Israyeli uphorofide ngokujamelana nazo ₃uthi, ‘Nina ntaba zakwa-Israyeli, lalelani ilizwi lakaSomnini uSomandla! Nakhu okutjhiwo nguSomnini uSomandla eentabeni nemibundwini, emilanjaneni nemirhobeni: Mina ngokwami ngizokwehlisela isabula phezu kwenu, ngibhubhise iindunduma zenu zokulotjha. ₄Ama-aldarenu azakubhuruzwa, nama-aldarenu wetjhwalo ephulwe. Ngilahle ababuleweko benu phambi kwamanyalenu okubosingazimu. ₅Iye, ngizakufuthela iindumbu zama-Israyeli phambi kwamanyalawo lawo; amathambenu ngiwahlakaze ema-aldarinenu mazombe. ₆Kizo zoke iindawo zenu enihlala kizo, imizenu izakuba marubhi neendunduma zenu zokulotjha zizakutjhiywa bezibe marubhi. Ama-aldarenu azokurhubutjheka: Azokwephulwa, amanyalenu okubosingazimu azokutjhabalala nama-aldarenu wetjhwalo ephulwe iinquqwana. Umsebenzi wezandla zenu lowo uzakufelela. ₇Ababulawako bazakuwela phakathi kwenu. Nje-ke nizakwazi bonyana nginguSomnini.

₈“ ‘Kodwana labo abasinde esabuleni, ngizanitjhiyela bona hlangana nezizwe, lokha nanihlakazelwa emazweni. ₉Labo abasindileko benu bazangikhumbula bahlangana nezizwe lapha bathunjelwe khona, kobana ngadabula kangangani iinhliziyo zabo ezihlobongako nezingifulatheleko, iye, namehlwabo wekanuko agade adlhemadlhema ngemva kwamanyalabo. Nje-ke bazazinyenya bona ngobumbi ababenzileko, mayelana neenkghabhudlho zabo zoke. ₁₀Bazakwazi bonyana nginguSomnini; gade ngingethuseli lokha nangithi ngizakwehlisa ihlekelele leyo phezu kwabo.’

₁₁“Nakhu okutjhiwo nguSomnini uSomandla, ‘Wahla izandla ugide ngeenyawo phasi uthi: Maye, ngebanga lazo zoke iinkghabhudlho zendlu yakwa-Israyeli ngombana bazokuwa ngesabula, ngendlala nangezifo. ₁₂Labo abakude bazakufa ngesifo, abaseduze bawe ngesabula. Boke abaseleko nabasindileko bazakufa ngendlala. Leyo-ke, yindlela engizakuvuthela ngayo ilaka lami phezu kwabo. ₁₃Nje-ke nizakwazi bonyana nginguSomnini lokha ababulawako babo nabarabhalaliswa hlangana namanyalabo ema-aldarinabo mazombe, iye, kuphi nakuphi lapha banikela khona umnikelo okhethekileko kiwo woke amanyalabo phezu kwayo yoke imibundu ephakemeko, phezu kweenqongo zoke zeentaba, ngaphasi komunye nomunye umuthi ohlaza nomunye nomunye umuthi omkhulu wamakari. ₁₄Ngizakwelula isandla sami ngakibo, ngenze inarha ibe libhudu nethusako kizo zoke iindawo abahlala kizo, kusukela erhalawumbeni ukuya eRibhila. Ngalokho bazakwazi bonyana nginguSomnini.’ ”