UHEZEKIYELI 9

₁Nje-ke ngezwa uZimu amemeza ngelizwi elikhulu athi: “Tjhidelani lapha nina bahlunguphazi bedorobho, omunye nomunye anesikhali sakhe esandleni sakhe.” ₂Kwatjhidela amadoda asithandathu aphuma nca ngesangweni elingehla eliqale ngetlhagwini. Enye nenye beyinesibulawo esandleni sayo. Phakathi kwawo bekunomuntu owembethe ilineni, anepotomende yokutlolela ehlangothini lakhe. Amadoda lawo angena ajama hlangana ne-aldari lekoporo.

₃Iphazimulo kaZimu ka-Israyeli yenyuka ngehla kwamakerubhi ebeyiphezu kwawo, yaya embunjwaneni womnyango wethempeli. Nje-ke uSomnini wabiza umuntu ogade embethe zelineni aphethe nepotomende yokutlola ehlangothini lakhe; ₄wathi kuye: “Khamba loke idorobho iJerusalema, ubeke iphawu esiphongweni sabantu ababubulako nabalilako ngebanga leenkghabhudlho zoke ezenziwa kilo.” ₅Kwabanye wakhuluma ngimlalele wathi: “Rabhulani idorobho emva kwakhe nibhubhise. Amehlwenu angababaleli begodu ningabi nezwelo. ₆Bulalani nirhayile abadala, amasokana neentombi, abomma nabentwana, kodwana ningathinti noyedwa onephawu. Nithome endawenami ecwengileko.” Nje-ke bathoma ngabaphathi ebegade balapho phambi kwethempeli. ₇Godu wathi kibo: “Silaphazani ithempeli, nizalise iinrhodlo ngababuleweko. Yeke khambani.” Ngalokho bahlabela phambili ngedorobheni babhubhisa. ₈Kuthe basabhubhisa njalo, ngazifunyana ngisele ngedwa, nje-ke ngawa ngobuso ngarhuwelela ngathi: “Awu, Somnini Somandla, ingabe uzakurhayila yoke imisalela yakwa-Israyeli ngokuthulula ilaka lakho phezu kweJerusalema na?”

₉Wabuye wathi kimi: “Icala lendlu yakwa-Israyeli neyakwaJuda selidlulele khulu. Inarha igcwele iingazi nedorobho lizele ukungalungi ngombana bathi, ‘USomnini utjhiye inarha begodu uSomnini akaboni.’ ₁₀Nje-ke nakungimi, amehlwami angeze ababalela begodu angeze ngibe nezwelo, kodwana ngizobabetha ngeentonga zabo.”

₁₁Qala, umuntu owembethe ilineni onepotomende yokutlolela ehlangothini lakhe, wabuyisa umbiko wathi: “Zimu, ngenze njengombana ungiyalile.”