UGENESISI 13

₁Nje-ke u-Abramu wanyuka asuka eGibhide yena nomkakhe kanye nakho koke egade kungekwakhe wanqomba ngesewula yeKanana. ULothi naye wakhamba naye. ₂U-Abramu wanjinga khulu ngefuyo, ngesiliva nangegolide.

₃Ukusuka ngesewula wakhamba iindawo ngeendawo ukuyela ngeBhethe-Eli, lapha itende lakhe belikhona phambilini phakathi kweBhethe-Eli ne-Ayi. ₄Endaweni lapha akha khona i-aldari phambilini wafese wathandaza uSomnini.

₅ULothi ogade asoloko agega no-Abramu, naye gade anezimvu, iimbuzi, iinkomo namatende. ₆Inarha akhange isabanela bona bangahlala bobabili. Bebanefuyo enengi sele kungasakghoneki bona ingakarula ndawonye. ₇Nje-ke kwavela ukurhitjhana phakathi kwabelusi baka-Abramu nebakaLothi. Ngesikhatheso amaKanana namaPerizi nawo gade asahlala enarhenapho.

₈Yeke u-Abramu wathi kuLothi: “Akungabi khona ukurhitjhana phakathi kwami nawe namkha phakathi kwabelusi bami nebakho ngombana thina sibomfo. ₉Yeke kungcono sihlukane mfo. Ummango unabile. Wena nawukhetha ihlangothi langetlhagwini, mina ngizakuthatha langesewula. Nawukhetha ihlangothi langesewula, mina ngizakuthatha langetlhagwini.”

₁₀Kodwana uLothi waphakamisela amehlo ngepumalanga, wabona umrhoba weJordani bona uswakamile. Ngaphambi kobana uSomnini atjhabalalise iSodoma neGomora umrhoba weJordani nca ngeTsowari bewunjengesivande sakaZimu nanjengenarha yeGibhide. ₁₁Yeke uLothi wazikhethela woke umrhoba weJordani. Wanqomba ngepumalanga. Bahlukana njalo-ke abafo laba: ₁₂U-Abramu wahlala enarheni yeKanana, uLothi wayokuhlala emrhobeni weJordani. Wahloma amatendakhe hlanu kwamadorobho ukuyela ngeSodoma. ₁₃Abantu beSodoma bebakhohlakele begodu bebasona khulu kuSomnini.

₁₄UZimu wakhuluma no-Abramu emva kobana uLothi ahlukene naye wathi: “Phakamisa amehlwakho lapho ukhonapho uqale ngetlhagwini nesewula, epumalanga netjingalanga, ₁₅ngombana yoke inarha oyibonako le ngikunikela yona wena neenzukulwana zakho nini nanini. ₁₆Ngizakwenza isizukulwana sakho sibe ngangethuli lehlabathi ukuze kuthi nange kungaba nomuntu obala ithuli lehlabathi, khona-ke neenzukulwana zakho zingabaleka. ₁₇Yeke sikima, udabule inarha ubude nobubanzi bayo ngombana ngiyinikela wena.”

₁₈Nje-ke u-Abramu wathutha amatendakhe wayokuhlala eduze nemithi yeMamre eRhebroni, lapha akhela khona uSomnini i-aldari.