URHABAKHUKHU 2

₁Ngizakujama esithaleni sami

ngibe sesiqongolweni somthangala.

Ngizakuqalisisa ngibone

bonyana uSomnini uzokuthini kimi;

nokuthi uzakuphendula

athini ekunghonghoyileni kwamokhu.

₂USomnini wangiphendula wathi:

“Tlola isambulwesi phasi

sibonakale kuhle emqebethwini

ukuze sifundeke lula.

₃Ngambala isambulwesi sizakuzaliseka

ngesikhathi esifaneleko;

sikhuluma ngesiphetho,

angeze savuka simamala.

Nanyana siriyada nje, silindele,

sizakuzaliseka nakanjani, angeze besiriyade.

₄“Tlola uthi,

‘Ongakalungi uzakubhubha,

kodwana olungileko uzakuphila ngokukholwa kwakhe.

₅Ngambala, umnono uyamkhohlisa ozikhukhumezako

begodu angeze aphumelela;

umarhamaru njengethuna,

urhiribidela njengokufa;

ubuthelela izizwe zoke kuye,

athumbe boke abantu.’

₆“Ngambala, izizwe zizamphendula ihlaya,

zimtlhorholoje ngokumvuma ingoma zithi,

‘Uzazizwa loyo ozidindelela iimpahla zokwetjiwa,

azinjingisa ngobugirikijani!

Kuzabe kube nini kulokho kwenzeka na?’

₇Ngambala, abakuhlawulako bazakururhuluka,

abakuthuthumelisako bakuvukele, bakuthumbe.

₈Wena waphanga izizwe ezinengi;

yeke abantu boke bazakuphanga.

Bazakuphanga ngombana nawe waphalaza

iingazi zabantu,

wabhubhisa iinarha namadorobho

naye woke umuntu ohlala lapho.

₉“Uzazizwa loyo ohlawulisa ngobugirikijani,

bona azakhele umuzi ophephileko.

Umzakhe uzakwehlelwa manikelela.

₁₀Isigungu osakhileko sirhubutjhe umzakho.

Ngokurhayila abantu abanengi,

waloba ipilwakho.

₁₁Ngambala, amatje azakurhuwelela ebodeni,

ubuphaziphazi bufakaze.

₁₂“Uzazizwa loyo owakha idorobho

ngokuphalaza iingazi,

ajamise umuzi ngobukhohlakali.

₁₃Ngambala, uSomnini uMninimandlawoke uqunte

bonyana ukutjhabatjheka kwabantu

kube ziimvuthiso zomlilo,

nokuthi izizwe zibhidlangele ilize.

₁₄Iye, njengelwandle lizele amanzi,

iphasi lizakuzala ilwazi,

lazise iphazimulo kaSomnini.

₁₅“Uzazizwa loyo oseza abomakhelwana bakhe

utjwala obubukhali,

basele badakwe babehlubule

ukuze abone ububhunubhunu babo.

₁₆Ukarekela ukurhubutjha abantu

kunobana uhlonitjhwe.

Sela nawe bewube bhunubhunu.

Ikapho esesandleni sokugoma sakaSomnini

inqophe ngakuwe,

ukuhlonipheka kwakho kuzakuba lihlazo.

₁₇Iye, umonakalo owawenza eLibhanoni

uzakufikela

nokurhayila kwakho iimbandana kuzokwethusa

ngombana uphalaze iingazi zabantu,

wabhubhisa iinarha

namadorobho naye woke umuntu ohlala lapho.

₁₈“Sizakubhadekela ngani isithombesibazwa

njengombana sabazwa mumuntu nje na?

Sisiza ngani isithombesibunjwa

nomfundisi wamala na?

Iye, loyo owasibumbako wethembele

emsebenzini wezandla zakhe,

ilize lakolize elingakhulumiko!

₁₉Uzazizwa loyo othi esigodweni,

‘Phaphama!’

Nanyana athi elitjeni elingakhulumiko,

‘Vuka!’

Intwenje ingakuyala na?

Qala nje, yembeswe ngegolide nesiliva,

abeyiphili do.

₂₀Kodwana uSomnini usethempeleni lakhe elicwengileko.

Akuthi iphasi lithi du phambi kwakhe.”