U-ISAYA 14

₁Ngaleyondlela uSomnini uzakurhawukela uJuda

abuye akhethe u-Israyeli,

ababuyisele enarhenabo.

Abatjhili bazazifaka hlangana nabo

bazinamatheze ekumbeni kaJakopo.

₂Izizwe zizabathatha zibalethe endawenabo.

Ikumba ka-Israyeli izazithumba

njengamakhoboka namakhobokakazi enarheni kaSomnini.

Bazakuthumba labo ebegade babathumbile,

babuse phezu kwalabo ebegade babagandelele.

“Akhese nithi niyaqala ukuphelelwa komgandeleli!

Ubunzima sebuphelile!

₅USomnini wephule idondolo labakhohlakeleko,

iye, intonga yababusi.

₆Elakeni labo, baphobola abantu

amaduma anganamkhawulo.

Ebukhalini babo, babusa izizwe

ngelandelela enganasirhawu.

₇Iphasi loke liphumulile begodu linokuthula,

abantu bazwakala ngokuhlokoma.

₈Ngitjho nemisayipurusi ithabile ngekosi leyo,

imisedari yeLibhanoni ithi,

‘Soloko walaliswa phasi,

abagawuli abasenyukeli kithi.’

₉“Indawo yabafileko ngaphasi iyasikinywa,

kobana ikuhlangabeze nawufikako:

ngebanga lakho ivusa iinthunzi;

iye, boke ebegade babarholi bephasi.

Iphaphamise eenhlalweni zobukhosi

boke ebegade bamakhosi wezizwe.

₁₀Boke bazakufakaza bathi kuwe,

‘Nawe sele ubuthakathaka njengathi!

Sele ufana nathi patsi!’

₁₁Idumo lobukhosi bakho lehliselwe

endaweni yabafileko

kanye netjhada lamaharibhakho.

Iimpethu zimuseme ngaphasi kwakho

neembungu zimukghadi ngehla kwakho.

₁₂“Maye, ukuwa kwakho ezulwini wena Khwezi,

iye, wena ndodana yamarimarima!

Wehliselwe equlwanini,

wena owise izizwe!

₁₃Nguwe owathi ehliziywenakho,

‘Ngizakwenyukela ezulwini,

ngivuse isihlalo sami sobukhosi

ngaphezu kweenkwekwezi zakaZimu;

ngizakuhlala entabeni yehlangano yeendalwa zezulu,

emajukujukwini wentaba yabozinyana.

₁₄Ngizakwenyukela esitlhorini samafu,

ngizithathe njengofana nongoPhezulu.’

₁₅Kodwana wehliselwe endaweni yabafileko,

iye, emajukujukwini welizwe labaleleko.

₁₆Abakubonako bazakugolozela,

bakuqalisise kuhle, bathi,

‘Umrhali lo, akusuye loya owanyakazisa iphasi,

wasikinya nemibuso na?

₁₇Nguye owenza ilizwe laba njengerhalawumba,

wagiriza amadorobhalo,

wangavuma bona abathunjwa bakhe

babuyele ekhaya.’

₁₈Woke amakhosi wezizwe alele ngedumo,

enye nenye ethuneni layo,

₁₉kodwana wena ulahlelwe kude nezindla lakho,

njengombungu ongabulungwa emathuneni.

Wena wembethwe ngabafileko,

abahlatjwe ngesabula,

abatjhinga phasi emgodini,

badibizeswe ngamatje.

Njengesidumbu esigadangwako

₂₀angeze wangcwatjwa njengamakhosi amanye

ngombana urhayile inarhakho,

wabulala abantu bekhenu.

Inga iinzukulwana zabenza okumbi

angeze kusakhulunywa ngazo nini nanini.

₂₁Lungisani indawo yokubulalela amadodanakhe,

ngebanga lezono zaboyise.

“Akangasavuki kobana azuze iphasi

namkha agcwalise ubuso belizwe ngamadorobho,

₂₂ngombana ngizakujamelana nawo.”

Watjho njalo uSomnini uMninimandlawoke.

“Ngizakuqunta eBhabheli ibizo nemisalela,

abantwana neenzukulwana.”

Watjho njalo uSomnini uMninimandlawoke.

₂₃“Ngizayenza ibe sitete

nendawo yokuhlala abogubudu.

Ngizayithanyela ngomthanyelo orhayilako.”

Watjho njalo uSomnini uMninimandlawoke.

₂₄USomnini uMninimandlawoke ufunge wathi:

“Njengombana ngicabangile, kuzakuba njalo

nanjengombana ngitlamile, kuzakwenzeka.

₂₅Ngizakwephula ama-Asiriya enarhenami,

ngiwatshidlhe ngeenyawo eentabeni zami.

Ijogi lawo lizakususwa ebantwini bami

nomthwalwawo emahlombabo.

₂₆Leli liqhinga elihloselwe iphasi loke;

iye, sisandla sami esilulekele

ngaphezu kwazo zoke izizwe.”

₂₇Ngambala uSomnini uMninimandlawoke

ukuhlosile lokho,

nje-ke ngubani ongakutshwilisa na?

Isandla sakhe selulekile,

ngubani ongasirhunyeza na?

₂₉Noke nina eFilistiya ningajekezeli

ngokuphuka kwentonga enimadlhako

ngombana emsileni wenyoka

kuzakuphuma imbedla

nesithelo sayo kuzakuba yinyoka emhlwazi,

emsinyana inga iyaphapha.

₃₀Abachake khulu kwa-Israyeli

bazakufumana amadlelo

nabadududu balale baphephile.

Kodwana ngizakubulalisa umrabhakho ngendlala,

iye, indlala ibulale imisalelakho.

₃₁Lila wena sango;

rhahlawula nawe dorobho,

phelani amandla noke nina eFilistiya

ngombana kuvela intuthu ngetlhagwini

begodu akakho otjhiyiweko ekampeni yebutho.

₃₂Izakuthini ipendulo eenthunyweni zamaFilista na?

Izakuthi: USomnini usekele iZiyoni

nabadududu ebantwini bakhe

bazakufumana ubuphephelo kiyo.