U-ISAYA 2

₂Kuzakuthi emihleni yokuphela

intaba yethempeli lakaSomnini inzinziswe

esiqongolweni seentaba.

Izakuphakanyiswa ngaphezu kwemibundu

nezizwe zoke ziwulukele kiyo.

₃Nabantu abanengi bazakuza bathi:

“Nambani sikhuphukeleni entabeni kaSomnini,

ethempelini lakaZimu kaJakopo

ukuze asifundise iindlela zakhe

kobana sikhambe ngemizilakhe.”

Mbala, umthetho uzakuvela eZiyoni

nelizwi lakaSomnini eJerusalema.

₄USomnini uzakugweba hlangana nezizwe

abe enze kube nokulunga ebantwini abanengi.

Bona bazakwenza iinsabula zabo amalembe wokulima

nemikhontwabo imikhwa yokuqopha isidiribe.

Isizwe angekhe sisaphakamisela esinye iinkhali,

iye, ngitjho nokuzibandulela ipi.

₅Yewize wena kumba kaJakopo,

namba sikhambe ekukhanyeni kwakaSomnini.

₆Maye, Somnini!

Ulahle abantu bakho,

indlu kaJakopo:

Bagcwele ukuhlohlozelwa kwepumalanga

nokuphengula njengamaFilista

ngebanga lokuhlanganisa izandla nabatjhili.

₇Inarhabo igcwele isiliva negolide;

amagugwabo akapheli.

Godu igcwele iinjomani;

iinkarana zabo zepi azipheli.

₈Inarhabo igcwele abosingazimu;

bakhothamela umsebenzi wezandla zabo,

lokho okwenziwe miminwabo.

₉Ngaleyondlela abantu bayathotjiswa;

iye, omunye nomunye wabo arhubutjhwe.

Yeke ungabathetheleli Somnini!

₁₀Ngenani emipharwini,

nizifihle ehlabathini,

nibalekele ubukhali bakaSomnini

nephazimulo yobukhosi bakhe!

₁₁Inyazo lomuntu ozikhakhazisako lizakuthotjiswa,

ukuziphakamisa kwabantu kuguqiswe,

nguSomnini kwaphela ozakuphakanyiswa mhlokho.

₁₂USomnini uMninimandlawoke unelanga

alijamisele boke abaziphakamisako nabakhukhumeleko,

iye, ukuze athobise boke abazitjhayako:

₁₃yoke imisedari yeLibhanoni emide nephakamileko,

yoke imithi yama-owuku yeBhatjhani,

₁₄zoke iintaba eziphakamileko,

yoke imibundu edlhodlhomeleko,

₁₅yoke imibhotjhongo emide,

yoke imithangala eqinileko,

₁₆yoke imikhumbi yokurhweba

nazo zoke iinthayamanzi ezithwele amagugu.

₁₇Inyazo lomuntu ozikhakhazisako lizakuguqiswa,

nokuziphakamisa kwabantu kuthotjiswe;

nguSomnini kwaphela ozakuphakanyiswa mhlokho.

₁₈Abosingazimu bazakuphela nya.

₁₉Abantu bazakugijimela emipharwini

nemigodini yehlabathi,

babalekele ubukhali bakaSomnini

nephazimulo yobukhosi bakhe,

lokha nasikimela ukwethusa iphasi.

₂₀Mhlokho abantu bazakulahlela abosingazimu

emakhondlweni nakibonomaphelaphelana;

iye, abosingazimu babo besiliva negolide

ababenze bona babakhothamele.

₂₁Bazakwenza lokho

lokha nabangena emaweni

nemipharwini yamadwala,

babalekele ubukhali bakaSomnini

nephazimulo yobukhosi bakhe,

lokha nasikimela ukwethusa iphasi.

₂₂Lisa ukwethembela emuntwini

onomphefumulo kwaphela eempumulweni!

Njekhona yini into angiyo?