U-ISAYA 25

₁Somnini, wena unguZimami,

ngizakuphakamisa, ngidumise ibizo lakho

ngombana wenze imikarisomraro,

waphumelelisa amahlelo atlanywa ekadeni

ngokwethembeka nangeqiniso:

₂Wenze idorobho laba liqubi leququ,

idorobho elinemithangala laba marubhi,

iye, isiphephelo sabatjhili asisese lidorobho

begodu asisoze savuselelwa.

₃Yeke iintsitsirimba zizakudumisa wena Zimu,

amadorobho wezizwe ezinelunya akwesabe.

₄Mbala, ube buphephelo babachakileko

iye, ubuphephelo babadududu esizini labo,

usiphephelo esiwuruwurwini

nomthunzi emtjhisweni.

Lokha ukubhavumula kwabanelunya

nabekufana nesiwuruwu esitjhayisana neboda

₅nalokha umrhubo wabatjhili

nabewufana nomtjhiso wendawo eyomileko,

wena wehlisa umtjhiso loyo ngomthunzi welifu

ukuze ukubhina kwabanelunya kuthuliswe.

₆Entabeni le, uSomnini uMninimandlawoke

uzokulungiselela boke abantu

umnyanya weenkhanakhana

newewayini eliyihleza;

iye, iinkhanakhana ezinomhlosi

newayini eliyihleza elitsengiweko.

₇Entabeni leyo uzakuqeda isigubuzeso,

iye, isigubuzeso esisebusweni babantu boke

ekuyingubo embese zoke izizwe.

₈Uzakuqeda ukufa unomphela.

USomandla onguSomnini uzokusula zoke iinyembezi

kibo boke ubuso;

asuse ihlazo ebantwini bakhe,

kilo loke iphasi.

Mbala, uSomnini ukhulumile.

₉Mhlokho abantu bazakuthi:

“Ngambala, uZimethu ula;

samqalelela bona asisindise.

Iye, nguye-ke uSomnini lo esathembela kuye;

yeke asithabeni, sithokoze esindiswenakhe.”

₁₀Isandla sakaSomnini sizakunzinza entabeni le,

kodwana uMowabi uzakugadangelwa phasi

njengotjani bugadangelwa emgodini womsuqwa.

₁₁UMowabi uzakwelula izandla zakhe ngemgodinapho,

njengomdudi nakelula izandla bonyana athaye.

USomnini uzakuthobisa ukuziphakamisa kwakhe,

phezu kobana anezandla ezinekghono.

₁₂Imithangalakhe yokuzivikela ephakamileko,

uSomnini uzoyibhuruza ayiwise,

iye, ayigirize ilale ehlabathini, ibe lithuli.