U-ISAYA 29

₁Uzazizwa wena Ariyeli, kehla yomlilo;

iye, wena Ariyeli,

dorobho elivinjezelwe nguDavida!

Ragelani phambili umnyaka nomnyaka,

nenze iminyanya ngesikhathi sayo,

₂kodwana ngizakuhlunguphaza i-Ariyeli,

kube nokulila nokuzila;

iye, idorobheli kimi lizakuba yikehla yomlilo.

₃Ngizakuvimbezela mahlangothi woke,

ngikuragelele mazombe ngeenthala,

ngenze imiqaqado magegana nawe.

₄Uzakuguqiswa, utjhebe phasi ngomlomo,

ukhume ihlabathi,

uzakuginya amagama nawukhulumako,

ungundaze inga uyathethelela,

iye, ilizwi lakho lihlebe ethulini.

₅Nokho, ngomzuzwana nje,

iwoma lezitha zakho

lizakuba njengethudlana,

nesiqubuthu sabanelunya

sibe njengomungu ophetjhulwa mumoya.

₆Uzakukhanjelwa nguSomnini uMninimandlawoke ngomdumo,

ukusikinyeka kanye netjhada elikhulu;

ngesivunguvungu nangesiwuruwuru

kanye namalangabi womlilo oqothulako.

₇Isiqubuthu sazo zoke izizwe ezisahlela i-Ariyeli,

boke abalwa nayo kanye nesiphephelo sayo

nalabo abayibandezelako,

bazakufana nebhudango,

iye, umbono webusuku.

₈Njengomuntu olambileko nabhudanga agoma,

aphaphame asaphethwe yindlala,

nanyana owomileko nabhudanga asela,

aphaphame abogaboga aphethwe mrhawu,

sizakuba njalo nesiqubuthu sezizwe zoke,

esilwa nentaba yeZiyoni.

₉Zimangazeni, nimangale,

niziphophaze niphophale!

Abaphorofidi bayadakwa,

kodwana ingasi ngewayini

nabaphristi bayatherezela,

kodwana ingasi ngamarhugu!

₁₀Mbala, uSomnini urhutjhulele phezu kwenu

ummoya wobuthongo,

uvale amehlwenu, okutjho abaphorofidi,

wembese iinhloko zenu, okutjho ababoni.

₁₃USomandla uthe:

“Ngebanga lokobana abantwaba,

batjhidela kimi ngemilomabo,

bangidumisa ngeembhena zabo,

khisibe iinhliziyo zabo zikude nami,

nokungilotjha kwabo

kungokweemfundiso zabantu,

₁₄ngalokho ngizakubuyelela godu,

ngenze okumangazako ngabantwaba,

iye, okurarako nokungakaqheleki:

Ukuhlakanipha kweenhlakaniphi zabo kuzakuphupha

nengqondo yobuhlakani babo izakunyelela.”

₁₅Maye kini

nina enifihlela uSomnini amano ngokuzikileko,

nina eninezenzo zobumnyama,

nenithi: “Ngubani osibonako?

Ngubani osaziko?”

₁₆Ukonakala okungaka!

Umbumbi angathathwa bona mdaka na?

Okudaliweko kungathi kumdali okudalileko,

“Akakangidali kuhle!”,

namkha okubunjiweko kuthi kokubumbileko,

“Umbumbami lo akanangqondo!” na?

₁₇Ngokukopheza kwelihlo

iLibhanoni izakuba yisimu enothileko,

iye, isimu enothileko ibonakale seyinjengehlathi.

₁₈Mhlokho iinthulu zizakuzwa amezwi womsongo;

kuthi iimphofu zivuleke amehlo

ekufifiyeleni nebumnyameni bazo.

₁₉Abazithobileko bazakubuye bathabe kuSomnini

nabadududu khulu bahlokome koCwengileko wakwa-Israyeli.

₂₀Onelunya akasazukuba khona,

nomnyefuli uzakuphelelwa,

boke labo abaquphe ukwenza ubumbi bazakujutjwa,

₂₁iye, labo abadurhisa abantu ngamezwi,

babekele umlamuli isifu ebandla,

baphayele olungileko ngeqadi ngelize.

₂₂Ngalokho nakhu okutjhiwo nguSomnini owahlenga u-Abrahamu,

malungana nekumba kaJakopo:

“UJakopo akasazukuba neenhloni,

nobuso bakhe abusazukuphaphatheka

₂₃ngombana lokha abantwabakhe nababona

umsebenzi wezandla zami phakathi kwabo,

bazakudumisa ibizo lami,

badumise oCwengileko kaJakopo,

besabe uZimu ka-Israyeli.

₂₄Labo abadurhileko emmoyeni, bazakuzwisisa,

nabanghonghoyilako bazakufunda ukuba nengqondo.”