U-ISAYA 31

₁Bazazizwa abehlela eGibhide

kobana bayokufuna isizo.

Bathembele eenjomanini,

iye, bathembela eenkaraneni zepi

nebakhwelini bazo ngombana zizinengi khulu,

kodwana bangaqaleleli koCwengileko ka-Israyeli,

namkha bafune uSomnini!

₂Kodwana ungohlakaniphileko yena

begodu unekghono lokwehlisa ihlekelele.

Yena akatjhuguluki emezwinakhe

kodwana uzakujamelana nesigungu seenkhohlakali,

nabasizi beengilamkhuba.

₃AmaGibhide ababantu, akasinguZimu,

iinjomani zawo ziyinyama, azisimumoya.

Lokha uSomnini nelula isandla sakhe,

umsizi oliGibhide uzakukhutjwa, nosizwako uzakuwa,

boke bazakubhubha ndawonye.

₄Nakhu okwatjhiwo nguSomnini kimi:

“Njengebhubezi namkha ibhubezana

elirorako nalibambe inyamazanalo,

nanyana iwoma labelusi lijamelana nalo,

alesatjiswa kurhuwelela kwabo,

namkha lihlehle etjhadeni labo;

ngokunjalo uSomnini uMninimandlawoke uzokwehla,

kobana avikele intaba yeZiyoni,

nemibundu yalo.

₅Njengokuphapha kweenyoni ngehla,

ngokunjalo uSomnini uMninimandlawoke uzakuvikela iJerusalema;

iye, uzayivikela bekayitjhaphulule,

ayibabalele bekayisindise.”

₆Bantu bakwa-Israyeli, buyelani kiloyo

abantu abangazange bamthembakalele.

₇Mbala, mhlokho noke nizakudela

abosingazimu benu besiliva nebegolide

enibenzelwe zizandla zenu ngokona.

₈“Ama-Asiriya azakubulawa ngesabula,

kodwana kungabi ngesandla somuntu;

iye, azakurhiribidelwa yisabula,

kodwana ekungasiyo yobhubhako.

Ibutho le-Asiriya lizakubalekela isabula leyo

bese amasokana wakhona akatelelwe ngomsebenzi.

₉Idwala layo lizakunyamalala ngebanga levalo

neenkhulu zayo zitjhiye iphawu ngokwesaba.”

Watjho njalo uSomnini uMninimandlawoke.

Umlilwakhe useZiyoni

nekehlakhe iseJerusalema.