U-ISAYA 46

₁UBhele ukhothamile,

uNebo utjekamile.

Imifanekiso yabo, nina maBhabheli

ebegade ninande niyithwala,

kwanjesi sekuyipahla ethwelwe ziinkomo,

iye, sebamuthwalo wefuyo ediniweko.

₂Batjekamile bebakhothamile bobabili,

abakwazi nokusindisa ipahla abanayo,

ngitjho nabo ngokwabo baya ekuthunjweni.

“Yewungilalele, wena ndlu kaJakopo,

iye, noke nina eniseleko endlini ka-Israyeli:

Nanithwelwe kusukela esibelethweni,

nimumethwe kusukela esiswini

₄begodu bekube sekuluphaleni nginguye owenza lokho

iye, benithukghele ngizakunisekela.

Lokho mina engikubumbileko, ngiyakuthwala,

iye, ngimi onisekelako nonisindisako!

₅Nizangifanisa nobani

nanyana ningilinganise nobani?

Ngubani eningangimadanisa naye

kobana silingane?

₆Labo abathulula igolide emigodlenabo,

balinganisa isiliva esilinganisweni,

baqatjha umkhandigolide

kobana abumbe usingazimu,

bamkhothamele, bamlotjhe.

₇Bayamguga, bamthwale emahlombe;

bamnzinzise endawenakhe bese uyajama-ke.

Uzalokho atshimalele

lapha bambeke khona.

Nanyana kunomuntu omlilelako, akaphenduli,

akasindisi umuntu loyo esizini lakhe.

₈“Khumbulani lokhu, niqine amandla

benicabangisise, nina mahlubuka.

₉Iye, khumbulani izinto zaphambilini,

zekadeni:

NginguZimu begodu akakho omunye.

NginguZimu begodu akakho ofana nami

₁₀omemezela isiphetho ekuthomeni,

iye, ekadeni lokho okungakenzeki.

Ngithi, ‘Ihloswami izakujama

begodu ngizakwenza koke engikufunako.’

₁₁Ngibiza idlanga ngepumalanga,

iye, umuntu enarheni ekude

ozakufeza ihloswami.

Mbala, engikukhulumileko ngizakufeza;

iye, engikutlamileko ngizakwenza.

₁₂Ngilalelani nina maphikakani ndina,

nina enikude nokulunga.

₁₃Ngitjhideza ihlalohle yami eduze, ayisikude

begodu isindiswami ayizukuriyada.

Ngizakunikela iZiyoni isindiso,

iphazimulwami izakwambulwa ku-Israyeli.”