U-ISAYA 55

“Nina noke enomileko,

yenize emanzini!

Nani eninganasiliva

yizani nithenge, nigome!

Yenize nithenge iwayini nebisi,

ngaphandle kwesiliva nezinye iindleko.

₂Nilinganiselani isiliva

ngalokho okungasi sisikwa

nomjulukwenu kokunganelisiko na?

Naningilalelisisako nizakubetha esimonyongwana,

umphimbenu uzakwenama ngamanoni.

₃Bekani indlebe, nize kimi,

nanilalelako nizakuphila.

Ngenza nani isivumelwano sanini nanini,

izenzo zomusa okwakungezikaDavida:

₄Qalani, ngamenza ufakazi ezizweni,

yena owabemrholi nomlawuli wezizwe.

₅Nje-ke wena Israyeli,

uzakubiza abantu abangakwaziko

nabantu abangakwaziko bazakutheleka kuwe

ngebanga lakaSomnini uZimakho

ongoCwengileko ka-Israyeli,

ngombana ukwembathise idumo.”

₆Funani uSomnini asafunyaneka,

nimbize asese seduze!

₇Isikhohlakali asilahle indlelaso embi

nowenza okumbi alahle amaqhingakhe.

Akaphendukele kuSomnini, uzakuba nomusa kuye,

iye, kuZimethu

ngombana yena uyathethelela nokuthethelela.

₈“Ngambala imicabangwami

ayifani namaqhingenu,

neendlela zenu akusizo zami.”

Watjho njalo uSomnini.

₉“Njengombana amazulu aphakamile kunephasi,

zinjalo neendlela zami kunezenu

nemicabangwami iphakamile kuneyenu.

₁₀Njengezulu neliqhwa kwehla kuvela phezulu,

akubuyeli emuva kungakasezeli iphasi,

kulenze lihlume belithele

kobana linikele umtjali imbewu

nogomako isikwa,

₁₁linjalo nelizwi lami eliphuma emlonyenami:

Angeze labuyela kimi lidududu,

lingakafezi intando yami

beliphumelelise lokho engilithume khona.

₁₂“Ngambala nizakuphuma ngethabo,

nihlahlwe ngokuthula.

Iintaba nemibundu

kuzakuzwakalisa ukuhlokoma phambi kwenu,

iye, yoke imithi yommango

iwahle izandla zayo.

₁₃Esikhundleni somunga kuzakumila umsayipurusi;

esikhundleni sameva kumile imiritlili.

Lokhu kuzakuba sikhumbuzo kuSomnini,

kube sibonakaliso sanini nanini,

nesingeze satjhabalaliswa.”