U-ISAYA 56

“Gcinani ukulunga nenze okufaneleko

ngombana isindiswami seyitjhidele

nehlalohle yami sele izokwembulwa.

₂Ubusisiwe obhubhako owenza lokho,

iye, umuntu obambelela kikho,

okutjho ukugcina iSabatha, angalisilaphazi,

alonde isandla sakhe singenzi okumbi.”

₃Umqhamuka ozibandakanya noSomnini

awukameli uthi:

“Ngambala uSomnini uzangihlukanisa nabantu bakhe.”

Umphakulwa akakameli athi:

“Awa, mina sengisigodo esomileko.”

₄Mbala, nakhu okutjhiwo nguSomnini:

“Abaphakulwa abagcina amaSabatha wami

nabakhetha ukwenza intandwami,

babambelele esivumelwaneni sami,

₅ngizabanikela okungcono

kunamadodana namadodakazi

okutjho isikhumbuzo nebizo ngethempelini lami

nangaphakathi kwemithangala yedorobho lami.

Iye, ngizabanikela ibizo lanini nanini

elingeze lasulwa.

₆Imiqhamuka ezibandakanya noSomnini,

kobana imlotjhe, beyithande ibizo lakhe

kobana ibe ziinceku;

iye, yoke egcina iSabatha, ingalisilaphazi,

ibambelele esivumelwaneni sami,

₇ngizayiletha entabenami ecwengileko,

ngiyinikele itokozo ngekumbenami yokuthandaza.

Imihlabelwayo yokutjhiswa neyetjhebiswano

izakwamukelwa e-aldarini lami

ngombana ikumbami izakuthiwa

‘Yikumba yokuthandaza yezizwe zoke.’ ”

₈Nakhu okutjhiwo nguSomnini uSomandla

obuthelela abahlakazekileko bakwa-Israyeli uthi:

“Ngizakubuthelela abanye godu,

ngaphandle kwalabo esele babuthelelwe.”

₉“Nina mbandana zommango

yizani noke nizokurhiribidela,

iye, noke nina mbandana zehlathi!

₁₀Abelusi babantu bami baphophele,

boke abanalwazi,

boke bazizinja eziziingolwana,

iye, ezibhalelwa kukhonkotha,

ziyarutharutha khisibe zilele,

iye, zithanda ukuyenda.

₁₁Bazizinja ezinephango,

abaneliswa lilitho.

Kazi babelusi nabanjalo!

Boke njalo abanangqondo,

omunye nomunye uphendukela eendleleni zakhe

iye, sebayafana barhubhela kesabo.

₁₂Omunye nomunye uthi:

‘Yizani, ngisesenewayini!

Ngithi asibutupeni utjwalobu!

Nakusasa kube ngiswesi,

kube ngaphezu kwalokhu.’ ”