U-ISAYA 65

“Bengitholakala kilabo

abangazange bazikhathaze ngami,

bengifunyanwa ngabangazange bangifune.

Esizweni esingazange sibize ibizo lami,

ngathi, ‘Ngilapha, ngilapha.’

₂Imini yoke ngelulele izandla zami

ebantwini abanekani,

abakhamba eendleleni ezingakalungi,

balandela imicabangwabo,

₃iye, abantu abahlalele ukungitlhorholoja emtarini:

Benza imihlabelo eemvandeni zabosingazimu,

batjhise netjhwalo e-aldarini leentina.

₄Bahlala ngemathuneni

ebusuku baditjha eendaweni ezisithekileko.

Bagoma inyama yewotji

neembiza zabo zinomhluzi wenyama esinyenyiso,

₅Ngibo abathi, ‘Sukela le, ungatjhideli kimapha

ngombana ngicwenge khulu kunawe!’

Eempumulweni zami abanjalo bayintuthu

evela emlilweni ovutha imini yoke.

₆Qala, phambi kwami kutlolwe kwathiwa,

‘Angizukuthula kodwana ngizazibuyisela ngokuzeleko.’

Iye, ngizanibuyisela ngokuzeleko

₇izono zenu nezaboyihlo ndawonye.”

Watjho njalo-ke uSomnini.

“Godu aboyihlo batjhisa imihlabelo eentabeni,

bangiphoqa emibundwini.

Ngalokho ngalinganisa ikokhelo ezeleko

yezenzo zabo ezandleni zabo.”

₈Nakhu okutjhiwo nguSomnini:

“Njengombana umhluzi usafunyaneka

ehlukuzweni lamadiribe

bese abantu bathi, ‘Ungawalahli

ngombana anobuhle’,

nami-ke ngizakwenza njalo

ngenca yeenceku zami:

Angeze ngazilahla zoke.

₉Ngizakuveza iinzukulwana kuJakopo nakuJuda,

ezizokuzuza iintaba zami;

iye, abantu bami abakhethiweko bazakuthumba inarha,

iinceku zami zihlale lapho.

₁₀ITjharoni izakuba mrhula weembuzi nezimvu,

umrhoba we-Akori ube yindawo yokuphumula kweenkomo;

iye, kube lilifa labantu bami abangifunako.

₁₁“Kodwana nina enifulathela uSomnini

nikhohlwe intabami ecwengileko,

ngokwendlalela uzinyana uGadi itafula,

nizalisela uzinyana uMeni

imijeka yewayini elivangiweko,

₁₂ngizanibekela isabula

kobana ibe likusasa lenu.

Noke nizakugoba kobana nihlatjwe

ngombana ngibizile kodwana nangasabeli,

ngakhuluma kodwana nangalaleli.

Nenze ubumbi emehlwenami,

nakhetha engingakuthandiko.”

₁₃Nje-ke nakhu okutjhiwo nguSomnini uSomandla:

“Qalani, iinceku zami zizakugoma,

kodwana nina nizakulamba.

Qalani, iinceku zami zizakusela,

kodwana nina nizakoma,

Qalani, iinceku zami zizakujekezela,

kodwana nina nizakurhubutjhwa.

₁₄Qalani, iinceku zami zizakuhlokoma

ngethabo leenhliziyo zazo,

kodwana nina nizakurhahlawula

ngeenhliziyo ezibuhlungu,

nilile ngebanga lokwephuka ummoya.

₁₅Nizakutjhiyela abalungileko bami amabizwenu,

bawasebenzise njengesithuko ebantwini, bathi,

‘Ngokunjalo uSomnini uSomandla uzanibulala’.

Kodwana eencekwini zami ngizakubeka elinye ibizo

₁₆okuzakuthi nanyana ngubani obusisako enarheni

abusise ngalo ngokuthi,

‘NgoZimu othembekileko’.

Godu owenza isifungo enarheni

afunge athi,

‘NgoZimu othembekileko’.

Mbala, imiraro yaphambilini izakulitjalwa

begodu ifihlakale ebusweni bami.

₁₇Qalani, sele ngizokudala izulu elitjha

nephasi elitjha:

Izinto zaphambilini azisazokukhunjulwa,

namkha ziyelelwe emkhumbulweni.

₁₈Ngambala, thokozani nithabe nini nanini

kilokho engikudalako:

Qalani, sele ngizokudala iJerusalema

ibe lithabo

nabantu bayo babe yitokozo.

₁₉Ngizakwethaba ngeJerusalema,

ngithokoze ngabantu bami;

Godu akusazukuzwakala kiyo amatjhada wesililo

nokurhuwelela ngokufuna isizo.

₂₀Godu akusazukuba khona kiyo

isana eliphila amalangana kwaphela,

namkha iqhegu eliluphala belithukghele.

Mbala, isana lizakuhlongakala

sele lineminyaka elikhulu,

umuntu ongafikeleli ekhulwini leminyaka

uzakuthathwa njengothuwelelisiweko.

₂₁Abantu beJerusalema

bazakwakha iinkumba bebahlale kizo,

batjale iindiribe, bagome isithelo sakhona.

₂₂Angeze bakha bese kuhlala omunye,

batjale bese kugoma omunye

ngombana njengamalanga womuthi

azakuba njalo-ke namalanga wabantu bami

begodu abakhethiweko bami

bazazikholisa mndundu ngomsebenzi wezandla zabo.

₂₃Abazukujulukela ilize

namkha babelethele abantwana ihlekelele,

ngombana bazakuba ziinzukulwana

zababusisiweko bakaSomnini

iye, bona nabantwana babo.

₂₄Ngaphambi kobana babize, ngizaphendula,

kuthi basakhuluma, mina ngizwe.

₂₅Ipisi nemvu zizakudla ndawonye,

ibhubezi lidle utjani njengekomo,

ithuli libe kukudla kwenyoka.

Angeze zalimaza namkha zitjhabalalise

kiyo yoke intabami ecwengileko.”

Watjho njalo-ke uSomnini.