U-ISAYA 9

₂Abantu abakhamba ebumnyameni

babone ukukhanya okukhulu,

kilabo abahlala enarheni yethunzi elesabekako

ukukhanya kwakhanya phezu kwabo.

₃Sewusikhulisile isizwe, wandisa nokuthaba kwaso,

sijabulile phambi kwakho njengokujabulela isivuno,

iye, nanjengabantu abajabulako nababelana ipango.

₄Mbala, njengamhlana kuhlulwa iMidiyani,

uliphohlozile ijogi elidisibeza isizwe,

okulibhoko elivundle emahlombaso,

iye, intonga yabatjhotjhozeli baso.

₅Elinye nelinye inyathelo lejoni

elibhaduza ngetjhada

nenaka lalo elichaphazelwe ziingazi

lizakutjhiswa lidliwe mlilo.

₆Mbala, sibelethelwe umntwana,

siphiwe indodana.

Umbuso uzakuba semahlombayo,

izakubizwa bona nguMlulekimmangalisi,

uZimumandla, uBabasiphelani noKosikuthula,

₇ukuze umbuso wenabe

nokuthula kungapheli

esihlalweni sakaDavida nembuswenakhe.

Izawunzinzisa ngokuwusekela ngobulungiswa nokulunga

ukusukela ngesikhathesi bekube nini nanini.

Itjisakalo kaSomnini uMninimandlawoke

izakuphelelisa koke lokhu.

₈USomandla uthumele umlayezo kuJakopo,

wona wehlela kuma-Israyeli.

₉Soke isizwe,

okutjho u-Efrayimu nabahlali beSamariya,

bazizwela wona,

kodwana ngokuziphakamisa nokuzikhakhazisa

kwehliziyo bathi:

₁₀“Iintina ziwele phasi,

kodwana sizakwakha ngamatje abaziweko;

imithi yamakhiwani igawuliwe,

kodwana sizayijamiselela ngemithi yemisedari.”

₁₁Nje-ke uSomnini wandise izitha zakaRetsini

bona zijamelane nama-Israyeli,

watlhorholoja namanaba wawo,

₁₂okutjho ama-Aramu ngepumalanga

namaFilista ngetjingalanga.

Wona agomojela u-Israyeli!

Kikho koke lokho

ubukhali bakaSomnini akhange busuke

nesandla sakhe sahlala siphakamile.

₁₃Khonapho abantu akhange babuyele kobabethileko

begodu azange bafune uSomnini uMninimandlawoke.

₁₄Yeke uSomnini waqunta u-Israyeli ihloko nomsila,

wamhluba iimpiko.

₁₅Ihloko yaka-Israyeli baphathi neenkhulu,

umsila kube baphorofidi abafundisa amanga.

₁₆Iye, abarholi babantwaba bayabalahla

nebegade badinga ukuhlahlwa bebakakamele.

₁₇Ngebangelo uSomandla akhange athabe ngamasokanabo,

begodu azange arhawukele ntandani namhlolokazi.

Mbala, soke isizwe besinganaZimu, siziingilamkhuba

nemilomo yoke ikhuluma ubudlhayela.

Kikho koke lokho

ubukhali bakaSomnini akhange busuke

nesandla sakhe sahlala siphakamile.

₁₈Ubukhohlakali buvutha njengomlilo,

buqothula iminga nameva,

butjhisa isithurha

kube sikhatha sentuthu ekhuphukako.

₁₉Ngobukhali bakaSomnini uMninimandlawoke

inarha izakuba libhudu

nabantu bafane neensahlela zomlilo.

Akuzukuba namuntu obabalela wakwabo.

₂₀Barhiribidela ngesidleni, kodwana baba nephango,

badla ngesinceleni, kodwana banganeliseka.

Iye, omunye nomunye wadla umfowabo:

₂₁UManase wadla u-Efrayimu

no-Efrayimu wadla uManase,

bobabili njalo bebajamelene noJuda.

Kikho koke lokho,

ubukhali bakaSomnini akhange busuke

nesandla sakhe sahlala siphakamile.