UJOROMIYA 27

₁Emnyakeni wesine wokubusa kwakaTsedekhiya umsa kaJosiya ikosi yakwaJuda, kwafika nanti ilizwi kuJoromiya libuya kuSomnini: ₂Nakhu okwatjhiwo nguSomnini kimi: “Zenzele iindrobho neenkeyi bese ubeka iinkeyi ezimbili nesidrobho entanyenakho. ₃Thumela ezinye ekosini ye-Edomu, yeMowabi neyama-Amoni, yeTire neyeTsidoni ngesandla sabazenda ebagade beze kuTsedekhiya, ikosi yakwaJuda eJerusalema. ₄Bayale bonyana bakhulume kubaphathi babo bona uSomnini, uMninimandlawoke, uZimu wakwa-Israyeli uthi, ‘Tjelani abaphathi benu nakhu okulandelako: ₅Mina ngenza iphasi nabantu balo kanye neenlwana ezikilo ngamandlami amakhulu nangengalwami eluliweko. Lokho ngikunikela nanyana ngubani engimbona alungile kimi. ₆Iye, mina nginikele zoke iinarha zenu esandleni sencekwami uNebukadinetsari, ikosi yeBhabheli. Ngitjho neenlwana zommango ngizazenza bona zimsebenzele. ₇Zoke izizwe zizamsebenzela yena nendodanakhe kanye neenzukulwana zakhe bekufike isikhathi senarhakhe ngitjho nesakhe isikhathi. Izizwe ezinengi namakhosi anamandla azamsebenzela enarhenakhe. ₈Nakube kukhona isizwe nanyana umbuso ongafuni ukusebenzela uNebukadinetsari ikosi yeBhabheli, namkha ongafuni ukuthwala ijogi lekosi yeBhabheli, ngizakuhlunguphaza isizweso ngesabula, ngendlala nangamatshwenyeko, kufikela lapha ngisirhayila khona ngesandla sakhe. Kutjho uSomnini. ₉Yeke ningalaleli abaphorofidi benu, izangoma, abahlathululi bamabhudango, izanusi namkha abaloyi benu abanitjela bathi: Anizukulotjha ikosi yeBhabheli! ₁₀Baphorofida amanga kini ukuze nisuswe endawenenu niye kude. Ngalokho ngizaniqotjha benibhubhe. ₁₁Kodwana isizwe esizakufaka intamo yaso ngaphasi kwejogi lekosi yeBhabheli siyisebenzele, ngizasinzinzisa enarhenaso kobana silime besihlale lapho. Kutjho uSomnini.’ ”

₁₂Mina Joromiya ngakhuluma noTsedekhiya ikosi yakwaJuda ngawo woke amezwi la, ngathi: “Nanifaka intamenu ngaphasi kwejogi lekosi yeBhabheli, niyisebenzele kanye nabantu bayo, khona-ke nizakuphila. ₁₃Uzakuthi ufelani wena nabantu bakho ngesabula, ngendlala nangamatshwenyeko njengombana uSomnini athe uzawehlisela esizweni esingeze sasebenzela ikosi yeBhabheli na? ₁₄Ningalaleli amezwi wabaphorofidi abathi kini ningasebenzeli ikosi yeBhabheli ngombana baniphorofida ngamala. ₁₅USomnini uthi, ‘Abakathunywa ngimi. Nakungibo baphorofida amala ebizweni lami. Ngalokho ngizaniqotjha nibhubhe, nina kanye nabaphorofidi abaniphorofidakwabo.’ ”

₁₆Yeke mina Joromiya ngatjela abaphristi nabo boke abantwaba bonyana uSomnini uthi: “Ningalaleli abaphorofidi abathi kini, ‘Msinyana izitja zethempeli lakaSomnini zizakuthathwa eBhabheli zibuyiswe.’ Mamala kwaphela abakuphorofida kini! ₁₇Ningabalaleli. Nanisebenzela ikosi yeBhabheli, nizakuphila. Kubayini kumele idorobheli libe marubhi na? ₁₈Nakube babaphorofidi mbala begodu banelizwi lakaSomnini, khona-ke abancenge uSomnini uMninimandlawoke kobana ipahla esele ngethempelini lakaSomnini, esigodlweni sekosi yakwaJuda kanye neJerusalema, ingeze yathathwa isiwe eBhabheli ₁₉ngombana nakhu okutjhiwo nguSomnini uMninimandlawoke mayelana neensika zethempeli, ibhada ekulu ekhethekileko, iinjamiso zezitja zokuhlambela kanye nenye ipahla etjhiywe ngedorobheneli, ₂₀koke uNebukadinetsari ikosi yeBhabheli angazange akuthathe lokha nathatha uKoniya umsa kaJehoyakhimu ikosi yakwaJuda eJerusalema amusa ekuthunjweni eBhabheli kanye nabo boke abosaziwako bakwaJuda neJerusalema, ₂₁iye, nakhu okutjhiwo nguSomnini uMninimandlawoke, uZimu wakwa-Israyeli mayelana nepahla etjhiywe ngethempelini lakaSomnini, esigodlweni sekosi yakwaJuda nangeJerusalema, ₂₂‘Izakuthwalwa isiwe eBhabheli, ihlale lapho bekufike isikhathi lapha ngizayitjheja khona. Yeke ngizayenyula ngiyibuyisele endaweni le.’ Kutjho uSomnini.”