UJOROMIYA 47

“Qalani, amanzi akhuphuka

avela ngetlhagwini,

azakuba ziinkhukhula eziphuphumako.

Azakuphuphuma enarheni

nakiyo yoke into ekiyo;

iye, emizini nebahlalini bayo.

Abantu bazakurhuwelela,

boke abahlala enarheni barhahlawule

₃nabezwa ukuza kwesitha

ngokugabadula kweenqatha zeenjomani,

itjhada leenkarana zaso

nokurhuba kwamavili wakhona.

Aboyise abazukuqala emuva

ebantwaneni babo

ngombana izandla zabo azisenamandla,

₄ngebanga lokobana ilanga selifikile

lokubhubhisa woke amaFilista;

iye, ilanga lokuphelisa boke ababambisani

ebebangasiza iTirosi neTsidoni.”

Mbala, uSomnini sele azakubhubhisa amaFilista,

okutjho imisalela yangeligwini lamaKafitori.

₅IGaza iguda ihloko izile

ngombana i-Atjhikheloni iyabhujiswa.

Nina misalela esemrhuleni,

kuzabe kube nini nizirhaya na?

₆Maye wena sabula kaSomnini!

Kuzakuthathwa isikhathi esingangani

kobana uphumule na?

Buyela ngesilandeni sakho,

buya uzothe.

₇Kodwana isabula kaSomnini

ingaphumula njani,

nakube uyiyalile

kobana isahlele i-Atjhikheloni neligu na?

Iye, uyibekele zona.