UJOROMIYA 51

“Qalani, ngizakuvusa ummoya womtjhabalalisi

ujamelane neBhabheli nabantu beLebu-Khamayi.

₂Ngizokuthumela abeli eBhabheli

kobana bele bebabhubhise inarha yakhona;

bazalithelekela ncazoke ngelanga lehlekelele.

₃Umdumuzi ngomsebe angatjhaphululi umsebakhe

namkha ahlubule isambatho sakhe sepi.

Ningababaleli amasokanalo,

bhubhisani loke ibutho lalo.

₄Abahlatjwe ngesabula bazakuwa

enarheni yamaKasidi

nabalinyaziweko eendledlaneni zeBhabheli.

₅Mbala, u-Israyeli noJuda abanabuhlolokazi,

abakasuswa kuZimabo,

iye, kuSomnini uMninimandlawoke,

nanyana inarhabo yembethwe mlandu

phambi koCwengileko ka-Israyeli.

₆“Balekani niphume eBhabheli!

Omunye nomunye asindise ipilwakhe.

Ningabhujiswa ngebanga lezono zalo.

Sele kusikhathi sokuzibuyiselela kwakaSomnini;

uzalikhokhela lokho okulifaneleko.

₇IBhabheli beliyikapho yegolide

esandleni sakaSomnini,

ladakisa loke iphasi.

Izizwe zasela iwayinalo,

nje-ke, ziyadlharuma.

₈IBhabheli lizakuwa msinyana belephuke.

Lilileleni, lifunyaneleni intatha yobuhlungu balo,

mhlamunye lingaphola.”

₉Abakhozi balo bathi:

“Besizalelapha iBhabheli,

kodwana angeze lelapheka.

Asilisukeleni!

Omunye nomunye wethu

aziyele enarhenakhe

ngombana isigwebo salo

sifikelela emkayini,

siphakeme njengamafu.”

₁₀Abathunjwa bathi:

“USomnini uvuselele ubuntu bethu!

Yeke nambani siyokubika eZiyoni

izenzo zakaSomnini uZimethu.”

₁₁Lolani imisubela,

nigcwalise iinlanda ngayo.

USomnini uvuse ummoya wamakhosi wamaMede

ngombana ihloswakhe kubhubhisa iBhabheli.

USomnini uzozibuyiselela,

iye, abuyiselele ithempeli lakhe.

₁₂Phakamisani iphawu emithangaleni yeBhabheli!

Qinisani abalindi,

bekani ababekilihlo,

nizilungiselele ukunanabela!

Mbala, uSomnini uhlosile

bewafeza lokho akukhulume

mayelana nabahlali beBhabheli.

₁₃Wena ohlala hlanu komlambo omkhulu

nonamagugu amanengi,

isiphetho sakho sifikile,

isikhathi sokobana ujutjwe.

₁₄USomnini uMninimandlawoke uzifungile:

“Ngambala ngikuzalisa ngamadoda

kube inga lijuma leentethe;

azakuhlaba umkhosi wokuhlula

ngawe Bhabheli.”

₁₅Nguye owenze iphasi ngamandlakhe,

wasekela ilizwe ngokuhlakanipha kwakhe,

wendlala amazulu ngelwazi lakhe.

₁₆Lokha nazwakalisa ilizwi lakhe,

kuhlokoma amanzi emazulwini;

wenza amafu amhlophe aphume epelazwe.

Uthumela imibani ekhambisana nezulu,

aphephethise ummoya eenlulwini zakhe.

₁₇Woke umuntu usidlhayela begodu akanalwazi;

woke umncibilikisi uhlaziswa bosingazimu bakhe.

Iinthombembunjwa zakhe zimamala,

azinamphefumulo ngaphakathi kwazo.

₁₈Zililize lakolize, ziziinkohliso;

isikhathi sokugwetjwa kwazo nasifikako,

zizakubhubha.

₁₉Kodwana osisabelo sakaJakopo akasinjalo,

ngombana ungumbumbi wakho koke,

ngitjho no-Israyeli, oyikoro engeyakhe.

Ibizo lakhe nguSomnini uMninimandlawoke.

₂₀“Wena Joromiya uyipinga yami,

isikhali sami sepi,

ngawe ngiphohloza izizwe,

ngawe ngibhubhisa imibuso,

₂₁ngawe ngiphohloza injomani nomkhwelayo,

ngawe ngiphohloza ikarana yepi nomtjhayelayo,

₂₂ngawe ngiphohloza indoda nomfazi,

ngawe ngiphohloza omdala nomutjha,

ngawe ngiphohloza isokana nomntazana,

₂₃ngawe ngiphohloza umelusi nomhlambi,

ngawe ngiphohloza umlimi nekomo,

ngawe ngiphohloza ababusi neenkhulu.

₂₅“Qala, ngijamelene nawe,

wena ntaba yomrhayili,

wena orhayila iphasi loke.”

Kutjho uSomnini.

“Ngizakwelula isandla sami ngijamelane nawe,

ngikuphosele phasi ekuzikeni,

ngikwenze ube yintaba etjhisiweko.

₂₆Akunalitje elizakuthathwa kuwe

ukwenza ijika,

namkha elinye ilitje

kobana kwenziwe isisekelo,

ngombana uzakuhlala umarubhi wamlibe.”

Kutjho uSomnini.

₂₇“Phakamisani iphawu enarheni!

Vuthelani ipalapala hlangana nezizwe!

Cwengisani izizwe

kobana ziye epini zilwe neBhabheli.

Buthelani ndawonye imibuso le,

ijamelane nalo:

i-Ararathi, iMini ne-Atjhikenazi.

Bekani umlawuli wepi ajamelane nalo,

nithumele iinjomani ezembatha inarha yoke

njengewoma leentethe.

₂₈Cwengisani izizwe kobana zilwe nalo:

amakhosi wamaMede,

ababusi neenkhulu zawo

kanye nazo zoke iinarha

ezibuswa makhosi lawo.

₂₉Nje-ke inarha izakuthuthumela beyikoropane

ngombana ihloso kaSomnini ngeBhabheli isajamile,

ukwenza isifunda seBhabheli sibe libhudu

ukuze kungabikho ohlala khona.

₃₀Iingorho zeBhabheli zilisile ukulwa;

zihlezi ngeemphephelweni.

Amandlazo aphelile,

sese zifana nabafazi.

Imizi yeBhabheli ithungelelwe ngomlilo,

iinqabo zamasangwayo zephuliwe.

₃₁Isigijimi sigijima sihlangabeze esinye

nesithunywa sihlangabeze isithunywa

ukubikela ikosi yeBhabheli

bonyana idorobho layo lithunjwe

mahlangothi woke.

₃₂Amazibuko avinjezelwe,

umgaba emlanjeni uthungelwe ngomlilo,

amajoni anevalo.”

“Indodakazi yeBhabheli ifana neselelo

lokha nasigangadelweko,

isikhathi sokuvuna sizakufika msinyana.”

₃₄“UNebukadiretsari ikosi yeBhabheli ungirhiribidele

wangiminyelela ngoma kere,

wangifuthela phasi njengomjeka onganalitho.

Ungiginye njengenyoka,

wazalisa isisu sakhe ngomhlosi wami,

wagcina ngokungikhafula.

₃₅Inturhu nokulinyazwa okwenziwe kimi

akube phezu kweBhabheli.”

Kutjho iZiyoni.

“Iingazi zami zibe

phezu kwabahlali benarha yamaKasidi.”

Kutjho iJerusalema.

“Qalani, ngizokujamela indabakho,

ngikubuyiselele wena Jerusalema.

Ngizakomisa ilwandle leBhabheli

ngitjhise nomthombalo.

₃₇IBhabheli lizakuba siqorho samatje,

idzaba leempungutjha,

ibhudu nento yokurarekelwa,

indawo engahlalwa mumuntu.

₃₈Kwanje abantu balo

basabhodla ndawonye njengamabhubezi,

iye, barora njengamabhubezana.

₃₉Kodwana kuzakuthi lokha nabasagugekileko

ngibalungiselele umnyanya, ngibadakise

ukuze bahlekele phezulu

bese balalela safuthi

bangasavuka godu.”

Kutjho uSomnini.

₄₀“Ngizabehlisela ebuhlabelweni njengezimvu,

iye, njengamaqama neempongo.

₄₁“Maye, iTjhetjhaki lithunjiwe!

Idorobho elikhethekileko ephasini loke, libanjiwe!

Maye, iBhabheli selibe sinyenyiso

hlangana nezizwe!

₄₂Ilwandle likhuphukele ngehla kweBhabheli,

ukubhodla kwamadlambalo kuligubuzesile.

₄₃Imizanalo ilibhudu,

iye, iyindawo yesomiso nerhalawumba,

yindawo engahlalwa mumuntu

nalapha kungadluli khona umuntu.

₄₄Ngizakuhlunguphaza uBhele eBhabheli,

ngimkhafulise akuginyileko.

Izizwe angeze zisawulukela kuye.

“Umthangala weBhabheli uwe bhusu!

₄₅Nje-ke, phumani kilo bantu bami!

Omunye nomunye asindise ipilwakhe

etukuthelweni evuthako kaSomnini.

₄₆Nakungasinjalo nizakunyefa ummongo

benesabe amahlebezi azwakala enarheni;

iye, ihlebezana yomnyaka nomnyaka ngenturhu enarheni

kanye nangombusi ovukela umbusi.

₄₇“Ngambala isikhathi siyeza

lapha ngizokuhlunguphaza khona

iinthombe zeBhabheli.

Yoke inarhalo izakuhlaziswa

nabahlatjwe ngesabula balo

bazakurabhalala ngaphakathi kwalo.

₄₈Yeke izulu nephasi nakho koke okukikho

kuzakuhlokoma ngeBhabheli.

Ngambala abarhayili balithelekela

bavela ngetlhagwini.”

Kutjho uSomnini.

₄₉“IBhabheli nalo kufanele liwe

ngebanga labakwa-Israyeli ababuleweko,

njengombana ababuleweko bephasi loke

bawe ngebanga leBhabheli.

₅₀Nina abaphunyurhe esabuleni,

khambani, ningajami!

Khumbulani uSomnini nisenarheni ekude

neJerusalema libe semkhumbulwenenu.

₅₁Nina nithi, ‘Sihlazisiwe,

sizizwile iinhlamba

nehlazo lembese ubuso bethu

lokha abaqhamuki nabangena

ngeendaweni ezicwengileko

zethempeli lakaSomnini.’

₅₂Yeke, qalani isikhathi siyeza

lapha ngizakuhlunguphaza khona

iinthombe zalo

begodu kiyo yoke inarhalo

abahlatjwe ngesabula bazakububula.”

Kutjho uSomnini.

₅₃“Ngitjho nanyana iBhabheli lifika emkayini

liqinise isiphephelo salo esiphakemeko,

abarhayili abavela kimi bazakungena kilo.”

Kutjho uSomnini.

₅₄“Itjhada lesililo livela ngeBhabheli,

iye, itjhada lokubhujiswa okukhulu

enarheni yamaKasidi.”

₅₅USomnini uzokurhayila iBhabheli,

athulise itjhada lalo elikhulu.

Amavili weenkarana zepi zezitha

arhaza njengamanzi amanengi;

kuzwakala ukuhlokoma kwamezwazo.

₅₆Umrhayili uthelekela iBhabheli,

iye umrhayili ujamelana nalo.

Iingorho zalo ziyathunjwa,

imisebe yazo iyaphohlozwa

ngombana uSomnini unguZimu wokubuyiselela;

mbala, nakukubuyiselela, uyabuyiselela.

₅₇“Ngizakudakisa iinkhulu nabahlakaniphileko balo

ababusi, iinduna kanye neengorho zalo ngokunjalo,

bazakulalela safuthi bangasavuki.”

Kutjho uSomnini oyiKosi,

ibizo lakhe elinguMninimandlawoke.

₅₈Nakhu okutjhiwo nguSomnini uMninimandlawoke:

“Umthangala obanzi weBhabheli uzakufadalaliswa,

amasangwalo aphakemeko athungelelwe ngomlilo.

Iye, abantu basebenzela ilize

nezizwe iimvuthiso zomlilo,

lokho kwaba mtjhikatjhika wazo.”