UJOROMIYA 7

₁USomnini wakhuluma noJoromiya wamtjela bona ₂ajame esangweni lethempeli lakaSomnini amemezele umlayezo lo lapho athi: “Yizwani ilizwi lakaSomnini noke nina bantu bakwaJuda abangena emasangweni la kobana nimlotjhe. ₃Nakhu okutjhiwo nguSomnini uMninimandlawoke, uZimu wakwa-Israyeli uthi, ‘Lokha nanilungisa iindlela nezenzo zenu, khona-ke ngizanenza nihlale enarheni le.’ ₄Ningathembeli emazwini adurhisako athi:

₉“Nicabanga bona nizakweba benibulale, nihlobonge benifunge ngekohliso, nitjhisele uBhali itjhwalo benidlhemadlheme ngemva kwabosingazimu ebeningabazi erhalawumbeni ₁₀bese nizokujama phambi kwami ethempelini elibizwa ngami nithi, ‘Siphephile!’ khisibe niragela phambili ngokwenza iinyenyiswezi na? ₁₁Ithempeli elibizwa ngameli, nicabanga bona sele lilirholo labadlelezeli na? Kodwana yazini bona ngihlala nginiqalile!” Kutjho uSomnini.

₁₂“Ningaya khona nje endawenami ebegade iseTjhilo lapha nganzinzisa khona ibizo lami kokuthoma, niyokubona lokho engakwenza kiyo ngebanga lobukhohlakali babantu bami u-Israyeli.

₁₃“Nje-ke, isigwebo sakaSomnini sithi: Ngebanga lokobana nenze zoke izintwezi begodu ngakhuluma nani imini yoke, kodwana azange nilalele; nganibiza kodwana azange nisabele; ₁₄yeke engakwenza eTjhilo ngizakwenza phezu kwethempeli elibizwa ngami, iye, ithempeli enithembele kilo, naphezu kwenarha engayinikela nina naboyihlo. ₁₅Ngizaniqotjha ebukhoneni bami njengombana ngaqotjha boke abafowenu, iye, zoke iinzukulwana zakwa-Efrayimu.

₁₆“Ngalokho wena Joromiya, ungabathandazeli abantwaba, ungabalileli namkha ubakhulumele. Ungabancengeli kimi ngombana angeze bengilalele. ₁₇Kghani awukuboni abakwenza emadorobheni wakwaJuda neendledlaneni zeJerusalema na? ₁₈Abantwana batheza iinkuni, aboyise baphemba umlilo, abonina babhica ihlama kobana babhagele indlovukazi yomkayi amabhagwana wokulotjha. Baphahlela abosingazimu kobana bangivusele itukuthelo. ₁₉Bathukuthelisa mina na?” Kutjho uSomnini. “Abazilimazi ngokwabo ngokuzirhubutjha na? ₂₀Ngalokho-ke nakhu okutjhiwo nguSomnini uSomandla, ‘Itukuthelwami nelaka lami lizokuthulukela phezu kwenarha le, phezu kwabantu neenlwana, phezu kwemithi yesivande naphezu kwesithelo semasimini. Izakuvutha ingacimi.’ ”

₂₁Godu nakhu okutjhiwo nguSomnini uMninimandlawoke onguZimu wakwa-Israyeli: “Ragelani phambili ningezelele imihlabelwenu yokutjhiswa neyetjhebiswano bese nitla inyama yakhona leyo! ₂₂Mbala, lokha nangikhuluma naboyihlo ngesikhathi ngibakhupha eGibhide, azange sengibanikele nje kwaphela imiyalo emalungana nemihlabelo yokutjhiswa neyetjhebiswano, ₂₃kodwana ngabadosa ngendlebe ngomyalo lo ngathi, ‘Nanithobela ilizwi lami, khona-ke ngizakuba nguZimenu, nina nibe babantu bami. Khambani ngazo zoke iindlela enginiyala ngazo ukuze kunikhambele kuhle.’ ₂₄Kodwana aboyihlo azange balalele bebayelele, esikhundleni salokho balandela iindlela zokukhunyalala kweenhliziyokazi zabo ezimbi. Badedela emuva kunobana baye phambili. ₂₅Kusukela ngesikhathi aboyihlo baphuma eGibhide bekube gadesi, abantwaba ngabathumela iinceku zami, abaphorofidi imihla ngemihla, imini yoke. ₂₆Kodwana azange bangilalele namkha bayelele. Gade baneentanyana begodu bakhambelela ekwenzeni ubumbi kunaboyise.

₂₇“Lokha nawubatjela koke lokhu, angeze bakulalela. Lokha nawubarhuwelelako, abazukuphendula. ₂₈Ngalokho yithi kibo, ‘Lesi sisizwe esingazange sithobele uSomnini uZimaso namkha sizwe lokha nasikhalinywako. Iqiniso liphelile, litjhabalele emilonyenaso.’ ”

₃₀USomnini uthi: “Abantu bakwaJuda benze ubumbi emehlwenami: Babeke iinyenyiso zabo ngethempelini elibizwa ngami, ngalokho balisilaphaza. ₃₁Bakhe indunduma yeTofethi emrhobeni weBheni-Hinomu kobana batjhise khona amadodana namadodakazabo njengomhlabelo, okuyinto engingazange ngiyale ngayo namkha ibe semkhumbulwenami. ₃₂Nje-ke, qalani, ayeza amalanga lapha abantu bangeze basayibiza khona ngeTofethi namkha umrhoba weBheni-Hinomu, kodwana bazakuthi mrhoba wokuHlatjwa ngombana bazakungcwaba abafileko eTofethi kufikela lapha kutlhogeka khona indawo.” Kutjho uSomnini. ₃₃“Godu iindumbu zabantwaba zizakuba kukudla kweenyoni zomkayi neembandana zommango, kungabi nomuntu ozethusako. ₃₄Ngizakuphelisa itjhada lokujabula nokuthaba, nephimbo lomlobokazi nomkhwenyana emadorobheni wakwaJuda neendledlaneni zeJerusalema ngombana inarha izabe inganamuntu.”