UJOBHO 19

₂“Nizangizwisa ubuhlungu bekube nini,

nilokhu ningiqoba ngamezwi na?

₃Ningirhubutjhe kalitjhumitjhumi!

Aninanhloni zokungiwurubaja na?

₄Nanyana bekuliqiniso bonyana ngiphosisile,

ukuphosisa kwami yindabami.

₅Nakube ngambala nizikhukhumezela mina,

nenze ihlazo lami libe yinto yokungiphikisa,

₆yazini bonyana uZimu ungibeke ngemmoyeni,

yinedakhe engirhobele ngaba nje.

₇Nanyana ngirhuwelela ngithi, ‘Ngoniwe!’

akakho ophendulako.

Nangimemeza ngifuna isizo,

nalapho akukho ukulunga.

₈Ungakhele isiqabo emzilenami

angikghoni ukudlula,

wabeka ubumnyama eendleleni zami.

₉Ungihlubulise idumo lami,

wangemuka isihlohlo ehloko.

₁₀Ungirhiriza mahlangothi woke, angisekho,

wasiphula ithemba lami njengomuthi.

₁₁Ungivuthelise ngetukuthelwakhe,

wangibalela kabajamelene naye.

₁₂Amabuthwakhe ahlangana ndawonye,

ahloma amatendawo angizombeleza,

angivimbezela njengedorobho.

₁₃“Umndenami ubekwe kude nami,

engijayelene nabo bami bangihlamukile.

₁₄Iinhlobo zami nabangani bami bangilahlele izandla,

sengilibelwe ₁₅naziimvakatjhi ekumbenami.

Iincekukazi zami zingithatha njengomyeni,

sese nginjengephandle emehlwenazo.

₁₆Nangibiza incekwami, iyazithulela,

bengisuke mina ngincengane nayo.

₁₇Ummoyami usivunda kumkami,

ngisinyenyiso ebantwaneni bakwethu.

₁₈Sese nginyazwa naziinratjhana,

nangikhuluma nazo, ziyangifulathela.

₁₉Boke abakhozi bami bayanginyenya,

iye, labo engibathandako sebangijikele.

₂₀Umphefumulwami uhlulukela abaziingazi zami,

kodwana angisenabani.

₂₁Akhese ningirhawukele hle!

Ngirhawukelani bangani bami,

ngombana ngigandelelwe sisandla sakaZimu.

₂₂Kubayini nani ningigijimise njengoZimu?

Ananeliswa ngenyamami na?

₂₃Maye, kubethana amezwami lawa gade atloliwe!

Iye, ngathana gade atlolwe emsongweni!

₂₄Atlolwe ngesimbi elitjeni,

kuzaliswe imisele yakhona ngomthofi,

ngaleyondlela agobhodlhwe unomphela!

₂₅Mina ngathana bengazi bonyana umhlengami uyaphila,

asikime ebandla ajamelane nabasephasini;

₂₆nasele asikimile, babone amabono.

Nje-ke, ngizambona ongiphathele iindaba ezihle,

iye, osidalwa sezulu.

₂₇Kwanga mina ngingambona ngamehlwami la,

iye, abonwe ngimi ngenyama.

Umphefumulwami ukomele lokho!

₂₈Lokha nanithi, ‘Utjhiswa yini,

nakube isisusa sendaba silele kuye?’

₂₉yelelani isabula

ngombana lezo zizono ezifanela ukufa!

Nje-ke, nizakwazi bonyana kunesigwebo.”