UJOBHO 31

₁Ngenze isivumelwano namehlwami,

kobana ngingaqali itlawu ngokulikhanukela.

₂Siyini isabelo somuntu kuZimu ongaphezulu,

ilifa alifumana koSabekako ekuphakameni na?

₃Lokho kuyihlekelele yokhohlakeleko,

nelitjhwa kabenza okuphambeneko.

₄Ingabe uZimu akaboni iindlela zami,

abe abale woke amagadangwami na?

₅Ngiyafunga bona

akhange ngikhambe magwegwe,

namkha inyawo lami lirhabele ikohliso!

₆Nakube uZimu ungibeke esilinganisweni seqiniso,

uzakubona ubuqotho bami.

₇Ngiyafunga bona

amagadangwami akhange aphambuke endleleni,

ihliziywami akhange ilandele amehlwami

nezandla zami akhange zichaphazelwe yisila.

₈Nakungasinjalo,

engikutjalileko akugonywe ngabanye,

iye, basiphule ngitjho nesivuno sami.

₉Ngiyafunga bona

ihliziywami akhange iyengwe mfazi,

akhange nginanabele umkamakhelwanami.

₁₀Nakungasinjalo,

umkami akasilele omunye,

angenwe nanyana ngiyiphi indoda.

₁₁Ngambala ukuyengwa mfazokho,

bekuzakuba lihlazo lakohlazo,

kube sisono sokwahlulelwa;

₁₂iye, kube mlilo ongatjhisa ubulale,

kungibize isivuno sami soke!

₁₃Ngiyafunga bona

akhange ngilahle indaba yekhoboka

neyekhobokakazi lami,

lokha nanghonghoyila kimi.

₁₄Bengizokwenza njani

lokha uZimu nasikima ngokujamelana nami na?

Bengizokuphendula ngithini nagade angiphenya?

₁₅Owangibumba esibelethweni,

nguye owabumba nekhoboka.

Nguye yedwa owasidala esiswini.

₁₆Ngiyafunga bona

azange ngigodle iinrhuluphelo zabadududu,

namkha ngifiphaze amehlo womhlolokazi.

₁₇Godu azange ngigome isikwa sami ngedwa,

kodwana nentandani yaba nesabelo kiso,

₁₈ngombana ukusukela ebutjheni bami

uZimu wangiphatha njengobaba,

iye, wangihlahla ukusukela esibelethweni sakamma.

₁₉Ngiyafunga bona

akhange ngithi nangibona uzulani aswela izambatho

namkha otlhagileko akhamba hlubule, ngimlise.

₂₀Imizimbabo beyithokoza ngami,

nasele ifuthumele ngoboya bezimvu zami.

₂₁Ngiyafunga bona

akhange ngikhombe omsulwa ngeguduva,

lokha nangizibona nginabasekeli ebandla.

₂₂Nakungasinjalo,

isiphanga sami asiwohloke ehlombe lami,

umkhonwami ukhwamuke esiphangeni.

₂₃Ngambala, benginevalo ngehlekelele evela kuZimu;

bengingeze ngakwazi ukujamelana nephazimulwakhe!

₂₄Ngiyafunga bona

akhange ngibeke ithemba lami egolideni,

namkha ngathi egolidenimbala,

‘Wena usibambelelo sami’.

₂₅Akhange ngename ngomnonwami ongangobaba,

namkha ngamandla wenzuzo yawo.

₂₆Ngiyafunga bona

akhange ngiqale ilanga ekukhanyeni kwalo,

namkha inyezi nayikhamba ekuphazimuleni kwayo.

₂₇Godu ihliziywami akhange iyengeke buntumba,

namkha ngincwange isandla sami.

₂₈Ngambala lokho bekuzakuba sisono ekumele sahlulelwe,

bengizabe ngingakathembeki kuZimu ophezulu.

₂₉Ngiyafunga bona

akhange ngithabele ihlekelele eyehlela ongizondako,

namkha ngibukise ngobumbi obumehleleko.

₃₀Akhange ngivumele umlomami bona wone,

ngokumhlolozela ngamanikelela wokufa.

₃₁Ngiyaqinisa bona

amalunga womzami gade ahlala asithi,

‘Ngubani ongazange azisuthise etafuleni lakaJobho na?’

₃₂Ngambala akunasikhonzi esakhe salala ebaleni,

iminyangwami beyihlala ivulekele isikhambi.

₃₃Ngiyafunga bona,

nanyana ngimumuntu wenyama,

akhange ngisibekele isono sami.

Azange ngifihle umlandwami esifubeni,

₃₄ngebanga lokwesaba isiqubuthu.

Akhange ngesabe kobana imindeni izangirhubutjha

bese ngathula, ngangaphumela tjhatjhalazi.

₃₅“Ngiphetha ikulumami ngokutlikitla!

Inga uZimu angangizwa,

oSabekako angiphendule!

Kwanga ongimangalelako angatlola phasi indabakhe!

₃₆Ngiyafunga bona

lokho ngizakutjatha emahlombe,

ngikuthwale njengesihlohlo.

₃₇Ngizamnikela imininingwana yelinye nelinye igadango lami,

njengalokha bengizakunikela umgwebi

ngokunjalo ngizamnikela yona.

₃₈Ngiyafunga bona

amasimami azange akhe angimangalele,

imisedlanayo akhange ilile phambi kwakaZimu.

₃₉Iye, akhange ngigome iinthelo zawo simahla,

azange ngibangele

bona iinsebenzi zawo zidose nzima.

₄₀Nakungasinjalo,

akumile ameva esikhundleni sekoroyi,

kumile ikhula esikhundleni sebhali.”