UJOBHO 35

₂“Wena Jobho,

udlumbana bona lokhu kulungile

lokha nawuzitjela uthi,

‘Anginamlandu ngehlangothini lakaZimu’,

₃nalokha nawubuza uthi, ‘Kungisizani nje?

Ngizathi ngizuzani nangingoniko?’

₄Mina ngizakuphendula-ke,

wena nabangani bakhwabo:

₅Qala phezulu emazulwini uyelele,

ubone amafu aphakeme ngehla kwakho.

₆Nawonako, lokho kumthinta ngani uZimu?

Nakube iimphambeko zakho ziba zinengi,

kumgugunaphi yena?

₇Nakube wena ulungile, yini oyiletha kuye?

Wamukela ini kuwe na?

₈Ubukhohlakali bakho buthinta kwaphela umuntu onjengawe,

nokulunga kwakho kuthinta kwaphela indoda efana nawe.

₉“Abantu bayarhahlawula ngabagandeleli abanengi,

balila ngebanga lamandla wabanengi,

₁₀esikhundleni sokuthi, ‘Uphi uZimu,

umDalami ongikhoselisa ebumnyameni,

₁₁osenze sehluka eembandaneni zephasi,

nosihlakaniphise kuneenyoni zomkayi na?’

₁₂Ebandlapho baliliswa kuziphakamisa kwabambi,

kodwana uZimu akaphenduli.

₁₃Ngambala uZimu akasilaleli isililo esingatjho litho,

oSabekako akasinaki.

₁₄Nanyana ungamboni asenza ilitho,

yazi bonyana indabakho iphambi kwakhe.

Wena mlindele nje kwaphela.

₁₅Nawungenzi njalo, itukuthelwakhe izakwehlela;

yena akayeleli umuntu oqoqomako.

₁₆UJobho lo ukhuluma ummoya,

wande ngamezwi aqinileko anganangqondo.”