UJOBHO 5

₁“Nawubizako, uzakuphendulwa ngubani?

Ngisiphi seendalwa zezulu ozakuphendukela kiso na?

₂Ngambala itukuthelo kaZimu iyasibulala isidlhadlha

nesikhwele sakhe simadlha isidlhamatletle.

₃Mina ngikhe ngabona isidlhadlha siphumelela,

khonapho ikumbaso yaba sisiga sokuthuwelelisa.

₄Abantwabaso abakavikeleki,

indababo ayithathwa ebandla,

akakho obasekelako.

₅Isivuno saso sigonywa bomalambana,

basithuthela hlangana nameva;

imigulukudu leyo irharhela ilifa laso.

₆Ngambala ukonakala akuveli ethulini

nehlekelele ayiqubuki equlwanini:

₇Umuntu unemvelo yokonakala asabelethwa

njengombana kuyimvelo yedlanga ukuphaphela phezulu.

₈“Thana benginguwe, bengizazifunela uZimu,

ngethule kuye indabami.

₉Nguye ongumenzi wokukhulu nokungahlathululekiko

okuzizinto ezimkariso nezinganasibalo:

₁₀Unisa izulu phezu komhlaba,

athumele amanzi phezu kwemimango

₁₁ukuze aphakamisele phezulu labo abaphasi,

abalilako abanyusele ekwenameni.

₁₂Utjharaganisa amaqhinga wamaqili,

ukuze izandla zawo zingaphumeleli.

₁₃Abahlakaniphileko ubabamba ngobuqili babo,

amaqhinga wamaqili apheliswe msinyana.

₁₄Emini bahlangana nobumnyama,

baphumbuthe inga kusebusuku.

₁₅Iye, uZimu usindisa abadududu esabuleni,

emlonyeni nezandleni zabanamandla,

₁₆ukuze abakhwahlileko babe nethemba

begodu ukungalungi kuvaleke umlomo.

₁₇“Tjheja-ke, ubusisiwe umuntu okhalinywa nguZimu,

yeke unganyazi ukusolwa ngoSabekako.

₁₈Iye, ubanga ubuhlungu,

kodwana uyapholisa,

godu amadlhe,

kodwana isandla sakhe sibuye selaphe.

₁₉Uzakwenyula kasithandathu ematshwenyekweni,

nakwesikhomba kungabi nobumbi obukuthintako.

₂₀Nakunendlala uzakuhlenga ekufeni,

nakunepi akuhlenge emandleni wesabula.

₂₁Uzakuvikeleka elimini elinesihlungu,

ungesabi ukubhujiswa nakukufikelako.

₂₂Uzakuhleka ukubhujiswa nendlala,

angeze waba nevalo ngeembandana zephasi;

₂₃ngombana uzakuba nesivumelwano neenlwana,

iimbandana zommango zilawulwe nguwe.

₂₄Uzakwazi bonyana itende lakho liphephile,

nawuhlola ipahlakho, kungabikho elahlekileko.

₂₅Godu uzakwazi

bona iinzukulwana zakho zizakwanda,

nabantwabakho bahlume njengotjani ehlabathini.

₂₆Ithuna lakho lizakwamukela sele ukhulile,

kube njengesithala sekoroyi

nasiwela eselelweni ngesikhathi sakhona.

₂₇Iye, sikuhlolile lokhu, yeke kuliqiniso.

Kulalele, ulemuke bese uyakusebenzisa.”