UJUWELI 2

“Vuthelani ipalapala eZiyoni;

nihlabe umkhosi entatjaneni yami ecwengileko.”

Akuthi zoke izakhamuzi zihlengezele

ngombana ilanga lakaSomnini liyeza;

iye, selitjhidele khulu.

₂Lilanga elimnyama nelifipheleko,

ilanga lamafu nesigayegaye.

Njengokusa kugubuzesa iintaba,

kuza ibutho elikhulu;

elingazange khelibekhona elinjalo nekadeni,

nelingasoze labakhona eenkhathini ezizako.

₃Phambi kwalo kurhayila umlilo,

ngemuva kwalo kurubha ilangabu.

Phambi kwalo inarha injengesivande se-Edeni,

ngemuva kwalo kube libhudu lerhalawumba.

Akunalitho elisindako kilo.

₄Ibuthweli liqaleka njengeenjomani;

ligijima njengeenjomani zabakhweli.

₅Lilakutja eenqongweni zeentaba,

ngetjhada elinjengeleenkarana zepi.

Linjengokuthuthumba komlilo obabula amawunguwungu;

linjengepi nayijokola evadleni.

₆Ngokuvela kwalo izizwe ziyavevezela;

boke bethuka bomelele.

₇Ibuthweli lisahlela njengeenkutani;

bakhuphuka ngomthangala njengamajoni.

Boke banqomba rwe,

abaphambuki emnqophenabo.

₈Abaliyani endleleni,

omunye nomunye unqophe phambili.

Nanyana baphoswa ngemikhonto ngapha nangapha,

abaphambuki emnqophenabo.

₉Batheleka emzini,

bagijime emthangaleni,

bakhwela ezindlini,

bangene emafesiderini njengamasela.

₁₀Phambi kwabo kudengezela iphasi,

isibhakabhaka sihlengezele.

Ilanga nenyanga kufiphale,

iinkwekwezi zingasakhanyi.

₁₁USomnini uzwakalisa ilizwi phezu kwebutho lakhe.

Ngambala amabuthwakhe manengi khulu

begodu baqinile abalalela imiyalwakhe.

Iye, ilanga lakaSomnini likhulu,

lesabeka kwamambala.

Ngubani ongalijamela na?

“Nanjesi buyelani kimi ngehliziywenu yoke,

ngokuzila nokulila nokubibitheka.”

₁₃Dabulani iinhliziyo zenu,

ingasi izambatho zenu kwaphela.

Buyelani kuZimu uSomnini,

ngombana unomusa nesirhawu,

uthathela kude ukusilingeka,

uthembeka khulu,

uyariyada ekurhayileni.

₁₄Ngubani owaziko?

Mhlamunye angajika atjhugulule umkhumbulo;

anitjhiyele isibusiso:

umnikelo wamabele nokuselwako kwakaSomnini uZimenu.

₁₅Vuthelani ipalapala eZiyoni;

bekani ilanga lokuzila,

nimemezele umhlangano okhethekileko.

₁₆Bizelani abantu ndawonye,

nihlambulule ibandla,

hlanganisani abaphathi ndawonye,

nibuthelele abantwana,

iye, ngitjho nabamunyako.

Umkhwenyana akaphume ngelawini lakhe,

nomlobokazi ngetendeni lakhe.

₁₇Abaphristi abalotjha phambi kwakaSomnini,

abalile hlangana namathuri wethempeli ne-aldari,

bathi: “Hawu Somnini! Rhawukela abantu bakho.

Ungavumi bona ilifa lakho lirhubutjhwe

libe sisiga hlangana nezizwe.

Kubayini abantu bebathi ezizweni:

‘Njekhona uphi uZimabo loyo?’ ”

₁₈Yeke, uSomnini wamela inarhakhe,

warhawukela abantu bakhe.

₁₉USomnini waphendula wathi ebantwini bakhe:

“Nginithumelela amabele,

isitjhidela sewayini namafutha we-oliva

bona kunisuthise.

Angeze ngisavuma bona babe siphoqo ezizweni.

₂₀Ngizakudedisela ibutho letlhagwini kude nani;

ngilihlakazele enarheni eyomileko neligagadu.

Ihlokwalo iqale ngepumalanga yelwandle,

umsilalo uqale ngetjingalanga yelwandle.

Kukhuphuke umnukwalo,

kuvuke isivunda salo

ngombana benze izinto ezesabekako.”

₂₁Ungesabi wena hlabathi,

kodwana thaba uthokoze

ngombana uSomnini uzokwenza izinto ezikulu.

₂₂Ningesabi nina mbandana zommango,

ngombana amadlelo emrhuleni azokuba lihlaza;

nemithi ithele iinthelo zayo;

imithi yamakhiwani nesidiribe kuhlome kuphuke.

₂₃Thabani nani bantu beZiyoni,

nithokoze kuSomnini uZimenu

ngombana uzanipha labo

abazanifundisa indlela efaneleko;

uzaninisela izulu, okutjho ikhukhulamungu nesewula njengaphambilini.

₂₄Izelelo zizakuzala amabele

neembekelelo ziphuphume ngesitjhidela sewayini

namafutha we-oliva.

“Ngizanibuyisela amabele

adliwa sikhonyani, yikumbi, newoma leentethe,

okulibutho lami elikhulu engalithumela phakathi kwenu.

₂₆Nje-ke, nizakuba nenala nidle nanele;

nizakudumisa ibizo lakaSomnini uZimenu,

owanenzela imikarisomraro.

Isizwe sami angeze sisaphoqeka.

₂₇Nizakutjho bona ngiphakathi ko-Israyeli,

nokuthi nginguSomnini uZimenu akakho omunye.

Isizwe sami angeze sisaphoqeka.”

₂₈“Kuzakuthi emuva kwalokho

ngithululele uMoyami kibo boke abantu.

Amadodanenu namadodakazenu azakuphorofida;

abadala benu babhudange amabhudango;

abatjha benu babone imibono.

₂₉Iye, emalangeni lawo ngizakuthululela uMoyami

naphezu kweenceku neencekukazi.

₃₀Ngizakuveza amabono ezulwini nephasini:

iingazi nomlilo nesimukumuku sentuthu.

₃₁Lokhu kuzakwenzeka

ngebanga lokuza kwelanga lakaSomnini elikhulu nelesabekako;

ilanga lizakuphenduka libe nzima

nenyezi ibe ziingazi.”

₃₂Kuzakuthi boke ababiza ibizo lakaSomnini basindiswe,

njengombana uSomnini atjho, asithi:

“Phezu kwentaba yeZiyoni neJerusalema kuzakubakhona isindiso.”

Nalabo uSomnini azababiza phakathi kwezizwe bazakusindiswa.