UJOTJHUWA 13

₁UJotjhuwa bekasele aluphele namalanga ayile. USomnini wathi kuye: “Sele uluphele begodu namalanga sele ayile, kanti kusese nenarha ekulu ekusafanele ithunjwe. ₂Nasi inarha esaseleko: Zoke iimfunda zamaFilista nezamaGetjhuri ₃ukusuka emlanjaneni omkhawulo wangepumalanga yeGibhide ukuyokufika emkhawulweni we-Ekhironi ngetlhwagwini. (Iindawezo bezithathwa bona ngezamaKanana kodwana bezibuswa babusi abahlanu bamaFilista eemfundeni ezilandelako: iGaza, i-Atjhidodi, i-Atjhikeloni, iGathi, ne-Ekhironi. Ama-Awi nawo gade ahlala ₄ngesewula yenarha.) Yoke inarha yamaKanana, okutjho ukusuka e-Ara yamaTsidoni ukuya e-Afekhi ukufika emkhawulweni wama-Amori. ₅Godu nenarha yamaGibili neLibhanoni yoke ngepumalanga, ukusuka eBhali-Gadi ngenzasi kwentaba iRherimoni ukuya eLebo-Rhamathi. ₆Lokhu kutjho boke abahlali bangeentabeni ukusuka eLibhanoni ukuya eMisirefothi-Mayimu ngitjho woke amaTsidoni. Ngizabaqotjha mina ngokwami phambi kwama-Israyeli, wena yabela nje kwaphela ama-Israyeli inarha leyo ibe lilifa lawo njengombana ngakuyala. ₇Yeke hlukanisa inarha le kobana ibe lilifa leenkoro ezilithoba kanye nesiquntu sakwaManase.”

₈UMosi inceku kaSomnini wabela isiquntu sekoro yakwaManase, ikoro yakwaRubeni neyakwaGadi isabelo sazo ngaphetjheya kweJordani ngepumalanga. Iinkorwezo zathatha ilifa lazwelo, kwaba njengombana zabelwa nguMosi. _9-10Imikhawulo yenarhazo beyisuka edorobheni i-Aroweri eliseligwini lomlanjana i-Arinoni ngekabeni yomrhoba wakhona ukuyokufika emkhawulweni wama-Amoni. Beyifaka phakathi inarha eyikangala ukusuka eMedeba ukuya eDibhoni kanye nawo woke amadorobho wakaSirhoni ikosi yama-Amori ogade abusa eRhetjhibhoni. ₁₁Imikhawulo yenarhazo leyo godu beyinabela eGiliyadi, emkhawulweni wamaGetjhuri namaMakathi, kiyo yoke intaba iRherimoni neBhatjhani ukuya eSaleka, ₁₂okutjho yoke imibuso ka-Ogi weBhatjhani obusa e-Atjhitarothi ne-Edreyi. (U-Ogi lo besele kunguye kwaphela oseleko hlangana nemisalela yamaRafa.) UMosi wahlula ama-Amori lawo bewawaqotjha, ₁₃kodwana ama-Israyeli azange aqotjhe amaGetjhuri namkha amaMakathi; yeke izizwezo zazihlalela hlangana nama-Israyeli bekube kunamhlanje.

₁₄Kwaba yikoro yamaLevi kwaphela uMosi angazange ayabele ilifa ngombana ilifa lawo bekuminikelo ekhethekileko kuSomnini uZimu wakwa-Israyeli njengombana atjho kuye.

₁₅UMosi wanikela ikoro yakwaRubeni ilifa ukuya ngemindenayo. ₁₆Imikhawulwayo beyisuka edorobheni i-Aroweri eliseligwini lomlanjana i-Arinoni ngekabeni yomrhoba wakhona ukufaka phakathi yoke ikangala ukuyokufika eMedeba ₁₇neRhetjhibhoni kanye nemizanayo yoke esekangala. Imikhawulo yenarha leyo beyifaka phakathi iDibhoni, iBhamothi-Bhali, iBhethe-Bhali-Mewoni, ₁₈iJahatsi, iKhedemothi, iMefathi, ₁₉iKhiriyathayimu, iSibima, iTserethi-Hatjharhari entabeni ethulamele umrhoba, ₂₀iBhethe-Pewori, amathomo wentaba iPisiga kanye neBhethe-Jetjhimoni. ₂₁Ngilawo-ke amadorobho wekangala okutjho yoke imibuso kaSirhoni ikosi yama-Amori owabusa eRhetjhibhoni. UMosi wabulala uSirhoni loyo kanye nabarholi beMidiyani, u-Evi, uRekhemu, uZuri, uRhuri noReba okumakhosana kaSirhoni agade ahlala enarhenapho. ₂₂Hlangana nabo boke ababulawa ma-Israyeli ngesabula kwakunoBhiliyamu umsa kaBhewori, umbhuli. ₂₃Umlambo iJordani gade umkhawulo wamaRubeni. Amadorobho lawo nemizanawo gade kulilifa lamaRubeni ukuya ngemindenawo.

₂₄UMosi godu wabela ikoro yakwaGadi ilifa ukuya ngokwemindenayo. ₂₅Imikhawulo yenarhayo kwakuyiJazeri nawo woke amadorobho weGiliyadi nesiquntu senarha yakwa-Amoni ukuya e-Aroweri engepumalanga yeRabha. ₂₆Imikhawulo leyo beyithoma eRhetjhibhoni ukuya eRamathi-Mitsiphe neBhethonimu nokusuka eMarhanayimu ukuya emkhawulweni weLo-Debhara. ₂₇Godu beyifaka phakathi amanye amadorobho angemrhobeni weJordani, okutjho iBhethe-Haramu, iBhethe-Nimra, iSukothi neTsafoni. Lokhu kutjho ubunengi bombuso kaSirhoni ikosi yeRhetjhibhoni ngepumalanga yomlambo iJordani. IJordani leyo kwaba mkhawulo wakhona ukuyela ngesewula yelwandle leKinerethi. ₂₈Amadorobho lawo nemizanawo gade kulilifa lamaGadi ukuya ngokwemindenawo.

₂₉UMosi godu wabela isiquntu sekoro yakwaManase ilifa ngokwemindenaso. ₃₀Imikhawulo yaso isuka eMarhanayimu ifake phakathi iBhatjhani yoke, okutjho woke umbuso ka-Ogi ikosi yakhona nemizi yoke yeRhavothi-Jayire eseBhatjhani, ebeyingaba madorobho amatjhumi asithandathu. ₃₁Imikhawulo leyo godu beyifaka phakathi isiquntu sakwaGiliyadi, i-Atjhitarothi ne-Edreyi, okumadorobho wobukhosi baka-Ogi eBhatjhani. Lezo bekuziindawo ezanikelwa isiquntu sekoro yakwaManase okuziinzukulwana zakaMakiri ngokwemindenazo.

₃₂Lelo-ke kwaba lilifa uMosi alaba lokha nagade angemrhobeni weJordani kwaMowabi malungana neJerikho. ₃₃UMosi azange ayabele litho ikoro yamaLevi ngombana isabelo sayo nguSomnini uZimu njengombana kwatjhiwo njalo kiyo.