UJOTJHUWA 18

₁Umkhambathi woke wama-Israyeli wahlangana eTjhilo wahloma itende lokuhlanganela lapho. Inarha leyo besele ihluliwe. ₂Gade kusese neenkoro ezilikhomba hlangana nama-Israyeli ebegade zingakabi ukwabelwa ilifa lazo. ₃UJotjhuwa wathi kuma-Israyeli: “Nizolokhu nitatazela kufika nini ningangeni nithathe inarha uSomnini uZimu waboyihlo aninikele yona le? ₄Khuphani amadoda amathathu ekorweni ngayinye, mina ngizawathuma kobana aphume adabule inarha athale ubujamo bayo ukuze yabiwe njengelifa. Lokha nabuyela kimi ₅izakuhlukaniswa iingcenye ezilikhomba. Ilifa lakwaJuda lizakuhlala linjalo ngesewula nelifa lekumba kaJosefa ngetlhagwini. ₆Lokha nasele nithale inarha iingcenye ezilikhomba, lethani ihlathululo leyo kimi ukuze ngenze ifumbe yokwaba inarha khonapha phambi kwakaSomnini uZimethu. ₇AmaLevi akanasabelo phakathi kwenu ngombana ubuphristi bakaSomnini bulilifa lawo. BakwaGadi, bakwaRubeni kanye nesiquntu sakwaManase sebafumene ilifa labo ngaphetjheya kweJordani ngepumalanga okuyinarha ebayabelwa nguMosi inceku kaSomnini.”

₈Kuthe lokha amadoda ebekakhethelwe ukuyokuthala inarha nasele alungele ukuphuma uJotjhuwa wabuyelela umyalwakhe kiwo wathi: “Khambani nidabule inarha niyithale bese nibuyela kimi. Mina ngizanenzela ifumbe khona eTjhilwapha phambi kwakaSomnini.”

₉Amadoda aphuma-ke adabula inarha, atlola emsongweni ihlathululwayo ngokwamadorobhayo iingcenye ezilikhomba. Abuyela kuJotjhuwa ekampeni eTjhilo. ₁₀UJotjhuwa wawenzela ifumbe eTjhilo phambi kwakaSomnini, wahlukanisela ama-Israyeli inarha khonapho. Ikoro ngayinye yafumana isabelo sayo.

₁₁Ifumbe yawela ekorweni yakwaBhenjamini ngokwemindenayo. Inarha eyabelwa yona yaba hlangana kwekoro yakwaJuda neyakwaJosefa. ₁₂Umkhawulo ongetlhagwini wathoma eJordani, wakhuphukela ngehlangothini langetlhagwini yentaba yeJerikho, wakhuphuka njalo uqamula intaba waya ngetjingalanga, wayokubetha erhalawumbeni leBhethe-Aveni. ₁₃Ukusuka lapho umkhawulo waqamula ngehlangothini langesewula yentatjana yeLuzi (okutjho iBhethe-Eli) ukuya enzasi e-Atharothi-Adari ukudabula phezu kwentaba engesewula yeBhethe-Rhoroni esenzasi. ₁₄Khonapho wajika waba mkhawulo wangetjingalanga.

Ukusuka entabeni engesewula hlanu kweBhethe-Rhoroni umkhawulo wanqomba ngesewula wayokutjhayisa eKhiriyathi-Bhali (okutjho iKhiriyathi-Jeyarimu), okulidorobho lekoro yakwaJuda. Lowo-ke bekumkhawulo wangetjingalanga. ₁₅Umkhawulo wangesewula bewuthoma hlanu kweKhiriyathi-Jeyarimu; ukusuka ngetjingalanga uye emthonjeni weNefitowarhi, ₁₆wehlele emathomeni wentaba ehlanu komrhoba weBheni-Hinomu nangetlhagwini yomrhoba weRafa, urhubalale njalo ukwehlela enzasi emrhobeni kaHinomu bese uqamule ihlangothi langesewula yentaba yamaJebusi, wehlele emthonjeni weRogeli. ₁₇Ukusuka lapho ujikele ngetlhagwini-pumalanga uye emthonjeni weTjhemetjhi bese lapho-ke unqombe eGelilothi emalungana nomkghotha we-Adumimi, wehle njalo unqombe elitjeni lakaBhohani osizukulwana sakaRubeni. ₁₈Umkhawulo lowo udlulele ngehlangothini langetlhagwini yentaba magegana neBhethe-Araba, wehlele emrhobeni weJordani. ₁₉Godu udlulele ngehlangothini langetlhagwini yentaba yeBhethe-Rhogila bese uyokuphelela ngetlhagwini yeligu lelwandle leTswayi ekugcineni kweJordani. Lowo-ke bekumkhawulo wangesewula. ₂₀IJordani beyimkhawulo wangepumalanga.

Leyo-ke bekumikhawulo mazombe yelifa lekoro yakwaBhenjamini ukuya ngokwemindenayo.

₂₁Amadorobho wekoro yakwaBhenjamini ukuya ngokwemindenayo gade kuyiJerikho, iBhethe-Rhogila, i-Emekhi-Ketsitsi, ₂₂iBhethe-Araba, iTsemarayimu, iBhethe-Eli, ₂₃i-Avimu, iPara, i-Ofira, ₂₄iKefara-Hamoni, i-Ofini neGeba. Kwaba madorobho alitjhumi nambili nemizanawo.

₂₅Amanye bekuyiGibiyoni, iRama, iBherothi, ₂₆iMitsiphe, iKefira, iMotsa, ₂₇iRekhemu, iJiripiyeli, iTarala, ₂₈iTsela, i-Elefi, iJebusi (okutjho iJerusalema), iGibeya neKhiriyathi-Jeyarimu. Kwaba madorobho alitjhumi nane nemizanawo.