ISILILO 3

₁Ngimumuntu owazi ubuhlungu

beswazi letukuthelo kaSomnini.

₂Ungiqotjhile bewangikhambisa

ebumnyameni obunganamkhanyo.

₃Ngambala, isandla sakhe singiphendukele

kanenginengi, imini yoke.

₄Ukhehlise isikhumba nenyamami,

wafahlaza amathambami.

₅Ungivimbezele ngeenqabo,

wangizombeleza ngobuthi nangobudisi.

₆Ungihlalise eendaweni ezimnyama

njengalabo abafa kade.

₇Ungibiyele ngeboda ukuze ngingabaleki;

wenza amakhamandelami aba budisi.

₈Ngitjho nanyana ngirhuwelela ngifuna isizo,

uvalela umthandazwami ngaphandle.

₉Uqabe iindlela zami ngamatje abaziweko,

wasonganisa imizilami.

₁₀Ulibhere elinanabelako,

iye, ibhubezi elibadaleleko.

₁₁Uvale iindlela zami, wangidabula;

wangenza ihlekelele.

₁₂Wacupha umsebakhe,

wangenza isinenjwa semisubelakhe.

₁₃Wahlaba indenami

ngemisubela engemgodlenakhe.

₁₄Ngaba sihlekiso sabo boke abantu bekhethu,

iye, ingomabo yesiphoqo imini yoke.

₁₅Wangifunza umhlonyani

wangiseza isibharha.

₁₆Wenza amazinywami aququda igagadu,

wangibhudabhuda emlotheni.

₁₇Umphefumulwami awunakuthula

nokuhle angisakwazi.

₁₈Yeke ngathi: “Idumo lami liphelile;

iye, ebengilirhuluphele kuSomnini.”

₁₉Somnini, khumbula isizi nokuzula kwami,

iye, isibharha nobuthi.

₂₀Umphefumulwami uhlala ukukhumbula lokhu

nommoyami uphasi.

₂₁Kodwana nakhu engizakubeka engqondweni

ngalokho nginerhuluphelo:

₂₂Kungebanga lokwethembeka kwakaSomnini kobana singabhujiswa,

iye, kungenca yesirhawu sakhe esingapheliko.

₂₃Siba sitjha njalo ekuseni;

mbala, bukhulu ubuqotho bakhe.

₂₄Umphefumulwami uthi:

“USomnini usisabelo sami,

yeke ngizakurhuluphela kuye.”

₂₅USomnini ulungile

kilabo abathembela kuye,

iye, kiloyo omfunako.

₂₆Ulungile uSomnini,

nje-ke, rhuluphela ngokuthula isindiswakhe.

₂₇Iye, ulungile emuntwini

lokha nathwala ijogi asesemutjha.

₂₈Akahlale yedwa athule,

ngombana uSomnini umthwese lona.

₂₉Akawe ngobuso phasi,

mhlamunye kunethemba lapho.

₃₀Akanikele umhlathakhe kiloyo omwakalako,

abe anele ngehlazo.

₃₁Ngambala, uSomandla

akalahleli safuthi.

₃₂Nanyana ahlunguphaza, uzakuba nesirhawu

ukuya ngokwethembeka kwakhe okukhulu

₃₃ngombana akuveli ehliziywenakhe ukugandelela

nokuhlunguphaza abantu.

₃₄Abantu bathi: “Isitha sigadangele ngaphasi kweenyawo zaso

zoke iimbotjhwa zenarha.

₃₅Siphambanisa amalungelo wobuntu

ngaphambi kongoPhezulu;

₃₆simdlelezela ilungelo lomthetho.

Kodwana uSomandla akakuboni lokho.”

₃₇Ngubani oyale ukwenzeka kwehlekelele?

Lokho azange kuvele emlonyeni kaSomandla.

₃₈Emlonyeni wongoPhezulu akuveli okumbi,

kodwana okuhle kodwa.

₃₉Kubayini umuntu ophilako anghonghoyila

ngomphumela wezono zakhe na?

₄₀Asihloleni iindlela zethu sizizizinye,

sibuyeleni kuSomnini.

₄₁Asiphakamiseleni iinhliziyo nezandla zethu

kuZimu osezulwini, sithi:

₄₂“Ngithi esiphambukileko besahlubuka

begodu wena azange ukhohlwe.

₄₃“Uzembese ngetukuthelo bewasigijmisa,

warhayila ngaphandle kwesirhawu.

₄₄Uzembese ngelifu

kobana ungafikelelwa mthandazo.

₄₅Usenze amanyela neenzibi

hlangana nezizwe.

₄₆“Zoke izitha zethu zikhulume khulu ngathi.

₄₇Isabelo sethu kukwesaba nethunzi elimnyama,

ukubhujiswa nokutjhabalaliswa.”

₄₈Amehlwami awuluka imilanjana yamanzi

ngebanga lokuphodlheka kwabantu bami.

₄₉Amehlwami azakugeleza mlibe,

iye, angaqedi

₅₀kufikela lapha uSomnini aqala khona phasi,

abone asezulwini.

₅₁Engikubonako kungilethela isizi

ngebanga lawo woke amadodakazi

wedorobho lekhethu.

₅₂Izitha zami zangizuma njengenyoni,

ngaphandle kwesizathu.

₅₃Zaqeda ipilwami ngemthathamanzini:

Zangiphosa ngamatje;

₅₄amanzi angigubuzesa,

ngadlumbana bona kuphelile ngami!

₅₅Ngabiza ibizo lakho wena Somnini,

ngisekuzikeni komphathamanzi;

₅₆wezwa isililo sami lokha nangithi:

“Ungavali indlebakho

ngokurhitjhwa kwami

nalokha ngifuna isizo.”

₅₇Nangikubizako begade useduze nami,

wathi kimi: “Ungesabi.”

₅₈Somandla, wajamela indabami

lokha umphefumulwami usengozini,

wahlenga ipilwami.

₅₉Somnini, ubonile ukugandelelwa kwami,

nje-ke, jamela indabami!

₆₀Ubonile koke ukuzibuyiselela kwabo,

woke amano abanawo ngami.

₆₁Somnini, uzizwile iinhlamba zabo,

woke amano wabo ngami,

₆₂ukuhlebeza nokuphoqa kwabajamelani bami

imini yoke.

₆₃Yelela koke abakwenzako;

sengiyingomabo yesiphoqo.

₆₄Bavuze njengokubafaneleko, Somnini,

ngokuya ngemisebenzi yezandla zabo.

₆₅Banikele ihliziyo enesizi,

amanikelelakho abe phezu kwabo!

₆₆Bagijimise ngetukuthelo, ubabhubhise

ngaphasi kwamazulwakho, Somnini.